ភ្នំពេញ៖ ផ្លូវជាតិលេខ៥ គឺជាផ្នែកមួយនៃផ្លូវអាស៊ានហាយវ៉េលេខ១ (AH1) ដែលតភ្ជាប់គ្នារវាងរាជធានីភ្នំពេញ ទីក្រុងបាងកក និងទីក្រុងហូជីមិញ និងជាខ្សែផ្លូវស្ថិតក្នុងរបៀងសេដ្ឋកិច្ច​ដ៏មានសក្តានុពល។ ផ្លូវជាតិនេះមានប្រវែងសរុប ៤០៧,៤៥ គីឡូម៉ែត្រ ឆ្លងកាត់ខេត្តកណ្តាល កំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ។

ផ្លូវជាតិលេខ៥ ផ្តល់អត្ថប្រយោជន៍យ៉ាងធំធេងក្នុងការបង្កើនការនាំចេញ-នាំចូល និងបម្រើវិស័យសេដ្ឋកិច្ចកម្ពុជា ពិសេសអាចកាត់បន្ថយគ្រោះថ្នាក់ និងការកកស្ទះចរាចរណ៍បានយ៉ាងច្រើន។ លើសពីនេះទៅទៀត ផ្លូវនេះក៏បានជួយសម្រួល និងធ្វើឱ្យជីវភាពប្រជាពលរដ្ឋកាន់តែល្អប្រសើរតាមរយៈកំណើននៃការអភិវឌ្ឍ វិនិយោគ និងទេសចរណ៍។ ផ្លូវជាតិជាង៤០០ គីឡូម៉ែត្រនេះ ឆ្លងកាត់ខេត្តកណ្តាល កំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ ដែលចំណាយទឹកប្រាក់សាងសង់ និងស្តារឡើងវិញប្រមាណ​៥០០ លានដុល្លារអាមេរិក ក្រោមហិរញ្ញប្បទានសប្បទានពីប្រទេសជប៉ុន។

ផ្លូវជាតិលេខ៥នេះបែងចែកចេញជា ៣កំណាត់៖ – កំណាត់ផ្លូវភាគខាងត្បូង (ព្រែកក្តាម-ធ្លាម្អម)៖ ប្រវែង ១៣៥,២៥គីឡូម៉ែត្រ ចាប់ផ្ដើមពីស្ពានព្រែកក្តាម ឆ្លងកាត់ខេត្តកណ្ដាល ខេត្តកំពង់ឆ្នាំង និងខេត្តពោធិ៍សាត់ ,កំណាត់ផ្លូវភាគកណ្តាល (ធ្លាម្អម-បាត់ដំបង) ប្រវែង ១១០,៩០គីឡូម៉ែត្រ ចាប់ផ្ដើមពីធ្លាម្អម ឆ្លងកាត់ខេត្តពោធិ៍សាត់ និងខេត្តបាត់ដំបងnigកំណាត់ផ្លូវភាគខាងជើង (បាត់ដំបង-សិរីសោភ័ណ)៖ ប្រវែង ៨៤,៧៤គីឡូម៉ែត្រ ចាប់ផ្ដើមពីខេត្តបាត់ដំបង បន្តរហូតដល់ក្រុងសិរីសោភ័ណ ខេត្តបន្ទាយមានជ័យ។ បើកការដ្ឋានសាងសង់ថ្ងៃទី ២៦ខែមីនាឆ្នាំ២០១៨ បញ្ចប់ការសាងសង់ថ្ងៃទី១០ខែមករាឆ្នាំ២០២២។រយៈពេលសាងសង់ ៥៥ខែជា ប្រភេទផ្លូវ បេតុងកៅស៊ូ (AC) សាងសង់ដោយ ក្រុមហ៊ុនសម្ព័ន្ធក្រុមហ៊ុន Tekken-Taiyo JV និងក្រុមហ៊ុនសម្ព័ន្ធក្រុមហ៊ុន Daiho-Asanuma JV  ត្រួតពិនិត្យបច្ចេកទេសដោយ ក្រុមហ៊ុនទីប្រឹក្សាបច្ចេកទេស KEI-OCG-KCI Joint Venture in association with KCEC និង TANCONS។

​សម្ដេច​មហាបវរធិបតី ហ៊ុន ម៉ាណែត នាយករដ្ឋមន្ត្រី​នៃ​ព្រះរាជា​ណា​ច​ក្រកម្ពុជា​ ក្នុងពេលសម្ពោធឱ្យប្រើប្រាស់ផ្លូវនេះកាលពីចុងឆ្នាំ២០២៣ បានមានប្រសាសន៍ថា ផ្លូវជាតិលេខ​៥ មិនមែន​ត្រឹមតែផ្ដល់​ភាព​ងាយស្រួលសម្រាប់ពលរដ្ឋ​ធ្វើដំណើរ​ឡើង​ចុះរាជធានីភ្នំពេញ​នោះទេ ប៉ុន្តែវា​បានជួយ​ត​ភ្ជាប់​​រវាងពលរដ្ឋ​រស់​នៅ​តាម​បណ្ដោយ​ផ្លូ​វ​​នេះទៅ​នឹង​តំបន់​ផ្សេងៗទៀត ​និង​តំបន់​ដាច់ស្រយាលមក​កាន់​តំបន់​​ទី​ប្រជុំ​ជន ។​ បន្ថែមពីលើ​នេះ ផ្លូវ​មួយ​នេះដែរ​នឹង​ជួយ​ជំរុញ​សកម្មភាពសេដ្ឋកិច្ច និងលើកកម្ពស់​ជីវភាព​ប្រជា​ព​ល​រដ្ឋ​ដែលអាស្រ័យលើផ្លូវជាតិលេខ​៥ និងលែង​ឱ្យ​ប្រជាពលរដ្ឋ​ដែលធ្លាប់​រស់​នៅតំបន់​ដាច់​ស្រយាល​ឯកោ​ទៀត​ហើយ ។

សម្ដេច​បន្តថា​ ផ្លូវ​នេះ​រដ្ឋាភិបាល​បាន​ប្រើប្រាស់​កម្ចីឥណទាន ពីបរទេស​ដើម្បីសាងសង់ ប៉ុន្តែទោះបីជា​ផ្លូវ​នេះ​ ត្រូវ​បានប្រើប្រាស់ថវិកា​ច្រើនប៉ុនណា​ក៏ដោយ ក៏រដ្ឋាភិបាលចំណាយថវិកា​ក្នុងការ​សាងសង់ដើម្បីជួយ​ស​ម្រួ​ល​​ដល់ការ​ដឹកជញ្ជូន​របស់​ប្រជាពលរដ្ឋ​ ជំរុញកំណើន​សេដ្ឋកិច្ច​តាមរយៈពន្លឿន​ការដឹកជញ្ជូន​ទំនិញ​ចេញ​ចូល​​ប្រទេស ជួយ​ជំរុញឱ្យ​មានការ​វិនិយោគ​លើឧស្សាហកម្ម​ រោងចក្រ​ ទៅដល់​ជិត​ផ្ទះ​បងប្អូន​ប្រជា​ពលរដ្ឋ​ឱ្យ​​ពួកគាត់មានការងារ​ធ្វើ​ មានប្រាក់ចំណូល​សម្រាប់ផ្គត់ផ្គង់ជីវភាព​ ៕