សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ តម្លៃប្រេងសកលបានឡើងថ្លៃបន្តិច បន្ទាប់ពីអាម៉េរិកបង្កើនសម្ពាធសេដ្ឋកិច្ចលើការដឹកជញ្ជូនប្រេងរបស់វេណេហ្ស៊ុយអេឡា និងបើកការវាយប្រហារតាមផ្លូវអាកាសប្រឆាំងនឹងពួកសកម្មប្រយុទ្ធនៅភាគពាយព្យប្រទេសនីហ្សេរីយ៉ា នេះបើយោងតាមសេចក្ដីរាយការណ៍ពីរ៉យទ័រ។
នៅថ្ងៃចុងសប្ដាហ៍នេះ ម្លៃប្រេងឆៅម៉ាក Brent បានឡើងថ្លៃដល់ ៦២,៤៨ ដុល្លារក្នុងមួយបារ៉ែល ដែលកើនឡើងពី ៥៩,៨២ ដុល្លារកាលពីសប្តាហ៍មុន ខណៈដែលតម្លៃប្រេងឆៅ West Texas Intermediate (WTI) បានឡើងថ្លៃដល់ ៥៨,៥៨ ដុល្លារក្នុងមួយបារ៉ែល កើនឡើងពី ៥៦,១៦ ដុល្លារ។
ជាមួយគ្នានេះ ស្របពេលដែលវេណេហ្ស៊ុយអេឡា និងនីហ្សេរីយ៉ា ជាប្រទេសផលិតប្រេងដ៏សំខាន់ ការកើនឡើងនៃភាពតានតឹងភូមិសាស្រ្តនយោបាយកំពុងបង្កការគំរាមកំហែងដល់ទីផ្សារប្រេងពិភពលោក។ យ៉ាងណាក៏ដោយ ទោះបីជាមានការវាយប្រហារតាមអាកាសរបស់អាម៉េរិកកើតឡើងដោយសារការស្នើឡើងដោយរដ្ឋាភិបាលនីហ្សេរីយ៉ាក៏ដោយ ប៉ុន្តែវាកំពុងបន្ថែមទៅនឹងហានិភ័យភូមិសាស្ត្រនយោបាយ។ ទន្ទឹមនឹងនេះ សេតវិមានបានបញ្ជាឱ្យកងកម្លាំងយោធារឹតបន្តឹងការដឹកប្រេងរបស់វេណេហ្ស៊ុយអេឡាយ៉ាងហោចណាស់ ២ ខែ ដែលបង្ហាញថា ទីក្រុងវ៉ាស៊ីនតោនកំពុងប្រើប្រាស់ការរឹតបន្តឹងសេដ្ឋកិច្ចជាជាងមធ្យោបាយយោធាដើម្បីដាក់សម្ពាធលើប្រទេសមួយនេះ។
ក្រៅពីនេះ ការនាំចេញប្រេងពីកាហ្សាក់ស្ថាន តាមរយៈបំពង់ Caspian អាចនឹងធ្លាក់ចុះដល់កម្រិតទាបបំផុតក្នុងខែធ្នូនេះ ដោយសារការវាយប្រហារដោយយន្តហោះគ្មានមនុស្សបើករបស់អ៊ុយក្រែនបានធ្វើឱ្យខូចខាតសម្ភារៈបរិក្ខារនៅឯស្ថានីយនាំចេញប្រេងដ៏សំខាន់។ បន្ថែមពីនេះ ទីផ្សារកំពុងរង់ចាំមើលការចេញផ្សាយនៃទិន្នន័យស្តុកប្រេងជាផ្លូវការដោយរដ្ឋបាលព័ត៌មានថាមពលរបស់អាម៉េរិក (EIA) នៅថ្ងៃចន្ទ សប្ដាហ៍ក្រោយនេះ ដែលយឺតជាងពេលធម្មតាដោយសារថ្ងៃឈប់សម្រាកបុណ្យណូអែល។ ទីផ្សាររំពឺងថា ទិន្ន័យនឹងបង្ហាញពីតម្រូវការប្រេងខ្ពស់នៅក្នុងអាម៉េរិក ដែលជាអ្នកប្រើប្រាស់ប្រេងធំបំផុតរបស់ពិភពលោក។
ទោះបីជាយ៉ាងណាក្តី តម្លៃប្រេងកំពុងឆ្ពោះទៅរកការធ្លាក់ចុះជាប្រចាំឆ្នាំដ៏ខ្លាំងបំផុតចាប់តាំងពីឆ្នាំ២០២០ ដោយសារអ្នកវិនិយោគថ្លឹងថ្លែងពីកំណើនសេដ្ឋកិច្ចរបស់អាម៉េរិក និងវាយតម្លៃហានិភ័យនៃការរំខានដល់ការផ្គត់ផ្គង់ប្រេង។ មិនត្រឹមតែប៉ុណ្ណោះ ទាំងតម្លៃប្រេង Brent និង WTI ត្រូវបានព្យាករណ៍ថា នឹងធ្លាក់ចុះប្រហែល ១៦% និង ១៨% រៀងគ្នានៅឆ្នាំនេះ បើគិតចាប់តាំងពីមានការរាតត្បាតកាលពីឆ្នាំ ២០២០ ៕
Account
Security
Favourite Content