សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងបញ្ជាក់ថា ក្រោយមានកិច្ចព្រមព្រៀងបទឈប់បាញ់រវាងកងទ័ពកម្ពុជា-ថៃ គឺខាងភាគីកម្ពុជាបានរក្សានូវភាពស្ងប់ស្ងាត់គឺក្នុងគោលបំណងកាត់បន្ថយបញ្ហា កាត់បន្ថយការបាត់បង់ជីវិតមនុស្ស ទាំងទាហាន ទាំងប្រជាជន និងទាំងទ្រព្យសម្បត្តិ ខណៈកម្ពុជាចង់ស្តារសភាពការណ៍ឱ្យមានភាពល្អប្រសើរឡើងវិញ ដែលនេះវាបានចូលទៅក្នុងអភិក្រមនៃការបញ្ចប់ជម្លោះ និងដើម្បីភ្ជាប់ទំនាក់ទំនងឡើងវិញ។
ការថ្លែងបញ្ជាក់របស់ប្រមុខរាជរដ្ឋាភិបាលកម្ពុជាយ៉ាងដូច្នេះ ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអាកាសយានដ្ឋានអន្តរជាតិតេជោ នាព្រឹកថ្ងៃទី២០ ខែតុលា ឆ្នាំ២០២៥។
កន្លងមកមានបងប្អូនខ្លះបាននិយាយថា ចាំបាច់ត្រូវភ្ជាប់ទំនាក់ទំនងឡើងវិញធ្វើអ្វី ដែលទាំងនៅកម្ពុជា ក៏មាននិយាយយ៉ាងនេះ ទាំងនៅប្រទេសថៃក៏មាននិយាយយ៉ាងនេះដែរ។ ការនិយាយរបស់បងប្អូនដែលជាប្រជាជន គឺនិយាយតាមអារម្មណ៍ ប៉ុន្តែបើមេដឹកនាំនៅប្រើកំហឹងទល់កំហល់ដាក់គ្នានោះ អាចមិនមានលទ្ធផលល្អនោះទេ ពោលគឺមានតែអាក្រក់ ។ ដូច្នេះ ការបញ្ចប់ជម្លោះគឺជាគោលដៅសំខាន់ ដែលសង្ឃឹមថាក្នុងពេលឆាប់ៗនេះនឹងមានការចុះកិច្ចព្រមព្រៀងសន្តិភាព ខណៈដែលប្រមុខរាជរដ្ឋាភិបាលកំពុងធ្វើយ៉ាងណាដើម្បីបញ្ចប់ជម្លោះនេះ ដែលនេះគឺជាអភិក្រមរបស់រដ្ឋាភិបាល ការពារសុខសន្តិភាពជូនប្រជាជនកម្ពុជា។
សម្ដេចមហាបវរធិបតី ហ៊ុន ម៉ាណែត បានថ្លែងថា ៖
«ម៉ោងនេះ គ្មានភាពចាំបាច់និយាយរឿងបាត់បង់ ឬទ័ពខ្មែរអន់បែបនេះ បែបនោះឡើយ ព្រោះសង្គ្រាមគ្មានចំណេញទាំងថៃ និងកម្ពុជា នោះទេ ដូច្នេះសូមបន្ដទុកចិត្តលើរាជរដ្ឋាភិបាលក្នុងការដោះស្រាយបញ្ហាព្រំដែន ហើយអ្នកនៅសមរភូមិមុខ ត្រជាក់ជាងអ្នកនៅក្រោយ ហើយតែងចង់ឱ្យបញ្ហាបញ្ចប់ដោយឆាប់រហ័ស។ នៅក្នុងពេលឆាប់ៗខាងមុខនេះ នឹងមានការចុះកិច្ចព្រមព្រៀងបញ្ចប់ជម្លោះរវាងកម្ពុជា-ថៃ។ ការជជែកដោះស្រាយគ្នាដោយជ្រើសរើសវិធីសាស្ត្រសន្តិ គឺជាដំណោះស្រាយដ៏ល្អសម្រាប់ប្រទេសជាប់ព្រំដែនជាមួយគ្នា ជៀសវាងការប្រើប្រាស់កម្លាំងកងទ័ពតទល់គ្នា»។
គួរកត់សម្គាល់ថា បញ្ហាព្រំដែន គឺជាបញ្ហាស្មុគស្មាញ ដែលនៅក្នុងសហគមន៍អាស៊ានមានប្រទេសតិចណាស់ដែលគ្មានបញ្ហាព្រំដែនជាមួយប្រទេសជិតខាង ដោយបញ្ហាវាបានបន្សល់ទុកតាំងពីជំនាន់អាណានិគមរាប់រយឆ្នាំ។ ប៉ុន្តែ ការជ្រើសរើសសម្រាប់ការដោះស្រាយគឺដោយវិធីសាស្ត្រ ដោយសន្តិវិធី តាមយន្តការនេះ តាមយន្តការនោះ ដោយមិនប្រើប្រាស់ការប្រយុទ្ធគ្នាដោយកំហឹងនោះទេ ត្រូវមានការនិយាយគ្នាដើម្បីដោះស្រាយបញ្ហា ហើយប្រជាពលរដ្ឋត្រូវជឿជាក់លើច្បាប់អន្ដរជាតិ កម្ពុជា មិនចង់យកសង្គ្រាមដោះស្រាយសង្គ្រាមនោះដែរ។ នេះបើតាមការលើកឡើងរបស់សម្ដេចធិបតី ហ៊ុន ម៉ាណែត។
សម្តេចធិបតីបានអះអាងថា កម្ពុជាគ្មានសោះឡើយនូវគោលបំណងរំលោភលើអធិបតេយ្យភាព បូរណភាព របស់អ្នកណាឡើយ តែកម្ពុជាក៏មិនឱ្យអ្នកណាមករំលោភលើអធិបតេយ្យភាព បូរណភាពរបស់ខ្លួនបានដែរ នេះគឺជាគោលការណ៍។ ការដោះស្រាយបញ្ហាព្រំដែនគឺត្រូវធ្វើឡើងតាមគោលការណ៍ដែលប្រទេសអាស៊ានផ្សេងៗបានធ្វើរួចមកហើយ ក្នុងនោះគឺមានគណៈកម្មាធិការកិច្ចការព្រំដែន មានច្បាប់អន្តរជាតិ មានសន្ធិសញ្ញា និងអនុសញ្ញាជាដើម ដែលកម្ពុជាបានធ្វើ២០ឆ្នាំមកហើយ។
សម្ដេចធិបតី ហ៊ុន ម៉ាណែត បានបញ្ជាក់ថា៖
«នេះហើយគឺជាការត្រៀមដើម្បីពន្លត់ជម្លោះព្រំដែនដោយសន្តិវិធី ដែលការឯកភាពគ្នាទ្វេភាគីគឺគ្មានអ្នកណាបាត់អ្វីនោះទេ។ ដូច្នេះ សូមបងប្អូនប្រជាពលរដ្ឋយល់ពីអត្ថប្រយោជន៍នៃភាពស្ងាត់របស់រាជរដ្ឋាភិបាល ខណៈដែលយើងស្ងាត់ តែមិនស្ងៀមទេ គឺយើងបានធ្វើរាល់សកម្មភាពទាំងអស់ដើម្បីបទឈប់បាញ់ និងសន្តិភាព»។
នៅក្នុងឱកាសជាមួយគ្នានេះដែរ សម្ដេចធិបតី ហ៊ុន ម៉ាណែត ក៏បានមានប្រសាសន៍ពីការចាប់ទាហានខ្មែរ១៨នាក់ គឺសម្ដេចបានទាក់ទងភ្លាមៗទៅនាយករដ្ឋមន្ដ្រីម៉ាឡេស៊ី ក្រោយទាហានថៃចាប់ខ្លួន ដើម្បីកុំឱ្យប៉ះពាល់ដល់អាយុជីវិតកងទ័ពខ្មែរ ហើយសុខទុក្ខរបស់ទាហានខ្មែរទាំង១៨នាក់ ត្រូវបានធានាតាមរយៈអង្គការ ICRC។ ចំពោះពលរដ្ឋដែលរងគ្រោះនៅភូមិជោគជ័យ និងព្រៃចាន់ ថ្នាក់ដឹកនាំបន្ដយកចិត្តទុកដាក់ជួយសង្គ្រោះ ដោយមិនបោះបង់ពលរដ្ឋណាម្នាក់ចោលនោះឡើយ៕
Account
Security
Favourite Content