បរទេស​ ៖​ យោងតាមប្រភពព័ត៌មានពី The Investor រាយការណ៍ថា ធនាគារពិភពលោក (World Bank) banព្យាករណ៍ថា កំណើនផលិតផលក្នុងស្រុក (GDP) របស់វៀតណាមអាចកើនឡើងក្នុងអត្រា ៦,‌១ ភាគរយសម្រាប់ឆ្នាំ២០២៤ ប៉ុន្តែក៏មានការកើនឡើងអតិផរណា និងបញ្ហាប្រាក់កម្ចីផងដែរ។

ថ្មីៗនេះ ធនាគារពិភពលោក (World Bank) បានព្យាករណ៍ថា កំណើនផលិតផលក្នុងស្រុកសរុប (GDP) របស់វៀតណាមនឹងកើនឡើង ៦,‌១ ភាគរយសម្រាប់ឆ្នាំនេះ ប៉ុន្តែស្ថាប័នដ៏ធំជាសកលមួយនេះបានព្រមានថា បញ្ហាប្រាក់កម្ចីនៅតែជាកង្វល់ និងគួរឱ្យព្រួយបារម្ភ។ មិនត្រឹមតែប៉ុណ្ណោះ ការនាំចេញផ្នែកផលិតកម្មនៅក្នុងឆមាសទី ២ អាចធ្លាក់ចុះ បន្ទាប់ពីកំណើនស្ទុះងើបឡើងវិញ ១៦,៩ ភាគរយកាលពីឆមាសទីំ១ ដោយសារតម្រូវការសកលលោក ជាពិសេសពីសហរដ្ឋអាមេរិក ដែលជាទីផ្សារនាំចេញធំបំផុតរបស់វៀតណាម។ បន្ថែមពីនេះ កំណើននៃការនាំចេញត្រូវបានរំពឹងថានឹងកើនឡើងក្នុងកម្រិតមធ្យមក្នុងឆ្នាំ២០២៥​-២០២៦ ដោយសារការរំពឹងទុកពាណិជ្ជកម្មសកល និងតម្រូវការខាងក្រៅពីដៃគូពាណិជ្ជកម្មសំខាន់ៗ ដូចជា សហរដ្ឋអាមេរិក តំបន់អឺរ៉ូ និងចិន។

ចាប់តាំងពីច្បាប់ភូមិបាលបានចូលជាធរមាននៅខែសីហាឆ្នាំនេះ ទីផ្សារអចលនទ្រព្យកំពុងបង្ហាញសញ្ញានៃការងើបឡើងវិញ ខណៈដែលទីផ្សារភាគហ៊ុនសាជីវកម្មបានធូរស្រាល។ ជាមួយនឹងកំណើនការនាំចេញជាបន្តបន្ទាប់ និងសញ្ញានៃការងើបឡើងវិញនៃអចលនទ្រព្យ តម្រូវការក្នុងស្រុកត្រូវបានកំណត់ថានឹងកើនឡើងនៅក្នុងឆមាសទី២ ។ ទន្ទឹមនឹងនេះ អ្នកវិនិយោគ និងអ្នកប្រើប្រាស់មានអារម្មណ៍ប្រសើរជាងមុន ជាមួយនឹងការវិនិយោគពិតប្រាកដសរុប និងការប្រើប្រាស់ឯកជនពិតប្រាកដរំពឹងថានឹងកើនឡើង ៥,៨ ភាគរយ និង ៥,៦ ភាគរយរៀងគ្នានៅឆ្នាំ២០២៤។

យ៉ាងណាមិញ ធនាគារពិភពលោកព្យាករណ៍ថា អតិផរណារបស់វៀតណាមអាចបន្តកើនឡើង ៤,៥ ភាគរយសម្រាប់ឆ្នាំ២០២៤ ដែលកើនឡើងពី ៣,២ ភាគរយកាលពីឆ្នាំមុន។ ការឡើងថ្លៃតម្លៃអាហារមានឥទ្ធិពលដល់ការកើនឡើងអតិផរណា ប៉ុន្តែតម្លៃប្រេង និងទំនិញត្រូវបានព្យាករណ៍ថានឹងបន្តបន្ធូរបន្ថយនៅឆ្នាំនេះ។ ការព្យាករណ៍នេះឆ្លុះបញ្ចាំងពីការកើនឡើងតម្លៃអាហារដែលរួមចំណែកភាគច្រើនដល់អតិផរណានៅក្នុងឆមាសទី១ ហើយត្រូវបានរំពឹងថានឹងបន្តកើនឡើង ខណៈដែលមានការផ្ទុះឡើងនៃជំងឺប៉េស្តជ្រូកអាហ្រ្វិករីករាលដាលទូទាំងប្រទេស ទោះបីជាមានវិធានការពង្រឹងការគ្រប់គ្រង និងការការពារក៏ដោយ។ លើសពីនេះ ការកើនឡើងនៃប្រាក់ឈ្នួលសាធារណៈ និងប្រាក់សោធននិវត្តន៍ ត្រូវបានរំពឹងថា នឹងមានផលប៉ះពាល់តិចតួចលើអតិផរណា ដោយសារវិស័យសាធារណៈមានកម្រិត។ ក្នុងរយៈពេលមធ្យម អតិផរណាត្រូវបានព្យាករណ៍ថានឹងធ្លាក់ចុះដល់ ៤ ភាគរយក្នុងឆ្នាំ ២០២៥ និង ៣,៥ ភាគរយក្នុងឆ្នាំ ២០២៦។

ធនាគារពិភពលោកបានលើកឡើងផងដែរថា ទោះបីជាសេដ្ឋកិច្ចវៀតណាមមិនទាន់ត្រលប់ទៅរកផ្លូវកំណើនមុនការរាតត្បាត ប៉ុន្តែការបង្កើនល្បឿននៃការវិនិយោគសាធារណៈនឹងគាំទ្រដល់តម្រូវការសរុបក្នុងរយៈពេលខ្លី។ យ៉ាងណាមិញ អាជ្ញាធររូបិយវត្ថុអាចនឹងមិនទាន់បន្ថយអត្រាការប្រាក់បន្ថែមទៀតនោះទេ ដោយសារភាពខុសគ្នាដ៏ធំទូលាយនៃអត្រាការប្រាក់រវាងទីផ្សារក្នុងស្រុក និងបរទេស និងផលប៉ះពាល់ដែលអាចកើតមានលើអត្រាប្តូរប្រាក់។ ការរៀបចំលើកំណែទម្រង់ និងជំហានបន្ថែមទៀតនាពេលថ្មីៗនេះ ដើម្បីកាត់បន្ថយហានិភ័យ និងភាពងាយរងគ្រោះក្នុងវិស័យហិរញ្ញវត្ថុនៅតែជាកត្តាសំខាន់។ មិនត្រឹមតែប៉ុណ្ណោះ គុណភាពទ្រព្យសកម្មបានក្លាយជាកង្វល់នៅក្នុងវិស័យធនាគារ ខណៈដែលឥណទានមិនដំណើរការ (NPLs) សំដៅលើឥណទានដែលមានភាពយឺតយ៉ាវសងត្រឡប់ទៅតាមកាលបរិច្ឆេទដែលបានព្រមព្រៀង បានកើនឡើងយ៉ាងខ្លាំងពី ១,៩ ភាគរយក្នុងឆ្នាំ ២០២២ ដល់ ៤,៦ ភាគរយក្នុងឆ្នាំ ២០២៣។ ប្រសិនបើការរៀបចំប្រាក់កម្ចីឡើងវិញ និងបំណុលរបស់ក្រុមហ៊ុនអចលនទ្រព្យត្រូវបានរួមបញ្ចូល នោះភាគរយសរុបនៃប្រាក់កម្ចីដែលមានបញ្ហាអាចកើនឡើងដល់ ៧,៩ ភាគរយ៕