ភ្នំពេញ ៖ ទោះបី​ស្ថានភាព​កម្ពុជា​ចាក​ចេញពី​ប្រទេស​ក្រីក្រ (Least Developed Country) ក្ដី សម្រាប់ចក្រភព​អង់គ្លេសបានសន្យាថានៅតែ​ផ្ដល់​ប្រព័ន្ធ​អនុគ្រោះ​ពន្ធ​ដល់​កម្ពុជាដដែល តាមរយៈ​ប្រព័ន្ធ​អនុគ្រោះ​ពន្ធ​ថ្មី ដែលនឹងត្រូវអនុវត្តនៅក្នុងអំឡុងខែមេសា ឆ្នាំ២០២៣នេះ។

ឯកឧត្តម ដូ​មី​និក វីល្លៀម ឯកអគ្គរាជទូតអង់គ្លេសប្រចាំកម្ពុជា នារសៀលថ្ងៃទី២៦ ខែមេសា ឆ្នាំ២០២៣ បាន​ថ្លែងថា ចក្រភព​អង់គ្លេស​នឹង​រៀបចំ​ដាក់​ចេញ​នូវ​ប្រព័ន្ធ​អនុ​គ្រោះ​ពន្ធ​ថ្មី (Developing Countries Trading Scheme – DCTS) ដែល​គ្រោង​នឹង​អនុវត្ត​នៅក្នុងអំឡុង​ខែ​មេសា ឆ្នាំ២០២៣ នេះ ហើយភាពខុសគ្នារវាងប្រព័ន្ធ GSP និង DCTS នេះនឹងផ្តោតសំខាន់ទៅលើច្បាប់នៃប្រភពដើម ហើយបើទោះបី​ស្ថានភាព​កម្ពុជា​ចាក​ចេញពី​ប្រទេស​ក្រីក្រ (Least Developed Country) ក៏​ចក្រភព​អង់គ្លេស នៅតែ​ផ្ដល់​ប្រព័ន្ធ​អនុគ្រោះ​ពន្ធ​ដល់​កម្ពុជា​ដែរ តាមរយៈ​ប្រព័ន្ធ​អនុគ្រោះ​ពន្ធ​ថ្មីនេះ។

ឯកឧត្តម ​ឯកអគ្គរាជទូត បាន​បន្ថែម​ថា តាមរយៈ​ការ​អនុគ្រោះ​នេះ កម្ពុជាបាន​ទទួល​អត្ថប្រយោជន៍​ជាច្រើន​ក្នុង​ការ​នាំចេញ​ទំនិញ​មួយ​ចំនួន​ទៅអង់គ្លេស ហើយ​ទំនិញ​សំខាន់ៗ ដែល​កម្ពុជា​នាំចេញ​ទៅ​ចក្រភព​អង់គ្លេស មាន​ដូចជា សម្លៀកបំពាក់ ស្បែកជើង កាបូប កង់ ​ផលិតផល​ធ្វើដំណើរ និង​ផលិតផល​កសិកម្ម​មួយ​ចំនួន ដោយ​គ្មាន​របាំង​ពន្ធ​ឡើយ ខណៈ​ផលិតផល​អង់គ្លេស​នាំ​ចូល​មក​កម្ពុជា មានរថយន្ត គ្រឿង​ម៉ាស៊ីន គ្រឿង​អគ្គិសនី គ្រឿង​អេឡិចត្រូនិក ​និង​​សំណល់ឧស្សហកម្មសម្រាប់ ផលិត​ចំណី​សត្វជាដើម។

ឯកឧត្តម ដូ​មី​និក វីល្លៀម ​ បាន​បញ្ជាក់​ទៀត​ថា ចក្រភព​អង់គ្លេស នឹង​បន្ត​ជំរុញ​ឲ្យ​មាន​ការ​បណ្ដុះបណ្ដាល TVET បន្ថែម​ទៀត នៅ​កម្ពុជា និង​បាន​ផ្ដល់​យោបល់ឱ្យ​ភាគី​កម្ពុជា អាច​បង្កើត​បណ្ដាញ TVET ក្នុង​ឱកាស​វេទិកា​អប់រំ​ពិភពលោក​លើក​ទី ១៩ នឹង​ប្រព្រឹត្តទៅ​ពី​ថ្ងៃ​ទី ៧-១០ ខែ​ឧសភា ឆ្នាំ២០២៣ នៅ​មជ្ឈមណ្ឌល​អេ​លីហ្សា​ប៊ែ​ត​ទី ២ ទីក្រុង​ឡុងដ៍ ចក្រភព​អង់គ្លេស។

ឯកឧត្តមបណ្ឌិត អ៊ិត សំហេង បានលើកឡើងថា គម្រោងរោងចក្រកាន់តែប្រសើរ ILO-BFC មានរយៈពេល២០ឆ្នាំមកហើយ ក្នុងការបន្តអនុស្សរណៈនៃការយោគយល់គ្នា ដែលមានយន្តការត្រីភាគី។ ចំពោះការបណ្តុះបណ្តាលបច្ចេកទេស និងវិជ្ជាជីវៈ កម្ពុជាខិតខំបណ្តុះបណ្តាលឱ្យទាន់តម្រូវការ ដោយឥឡូវនេះកម្ពុជាកំពុងខ្វះខាតកម្លាំងពលកម្មជំនាញ ដូច្នេះហើយរាជរដ្ឋាភិបាលកម្ពុជាមានកម្មវិធីបណ្តុះបណ្តាលពិសេស៤ខែ លើសញ្ញាបត្របច្ចេកទេស និងវិជ្ជាជីវៈ (C1) ដល់យុវជនក្រីក្រចំនួន ១.៥លាននាក់ ចាប់អនុវត្តពីឆ្នាំ២០២៣នេះ។ ដូច្នេះការបណ្តុះបណ្តាលនេះ ប្រសិនជាមានការបណ្តុះបណ្តាលភាសាអង់គ្លេសបន្ថែមក្នុងកម្មវិធីនេះ ចាត់ទុកថាជាការបណ្តុះបណ្តាលជំនាញទន់ (Soft Skills Training)។

លោក​បណ្ឌិត អ៊ិត សំហេង បាន​ឱ្យ​ដឹង​ថា ការ​នាំចេញ​ផលិតផល​កាត់ដេរ​ទៅកាន់​ចក្រភព​អង់គ្លេស​មាន​ស្ថានភាព​ល្អ ដែល​ផ្តល់​ការងារ​ដល់​ស្ត្រី​កម្ពុជា​ជាច្រើន ខណៈ​ចក្រភព​អង់គ្លេស​នៅតែ​បន្ត​យកចិត្តទុកដាក់​លើ​ស្ត្រី​នៅ​កម្ពុជា​។ មិនតែប៉ុណ្ណោះ កម្ពុជា និង​ចក្រភព​អង់គ្លេស គ្រោង​នឹង​ចុះ​អនុស្សរណៈនៃ​ការ​យោគយល់​គ្នា (MoU) ស្ដីពី​ការ​បង្កើត​វេទិកា​ពាណិជ្ជកម្ម និង​វិនិយោគ​រួមគ្នានា​ពេល​ខាង​មុខ ដើម្បី​ជំរុញ​ការ​ដោះដូរ​ទំនិញ និង​ការ​វិនិយោគ​រវាង​ប្រទេស​ទាំងពីរ។

ចំពោះ​អ្នក​ជំនាញ​អង់គ្លេស​មក​បណ្ដុះបណ្ដាល​នៅ​កម្ពុជា ក្រសួង​ការងារអាច​ផ្តល់​បណ្ណ​ការងារ និង​កូតា សម្រាប់​បុគ្គលិក​ជនជាតិ​អង់គ្លេស​ដែល​មក​បម្រើ​ការងារ​នៅ​ក្នុង​ប្រទេស​កម្ពុជា ហើយ​ទន្ទឹម​នឹង​នេះ ក្រសួងក៏​នឹង​ផ្តល់​អាទិភាព​សម្របសម្រួល​អ្នក​ជំនាញ​ជាន់ខ្ពស់​ជូន​ភាគី​ចក្រភព​អង់គ្លេស​ផង​ដែរ។

សូមបញ្ជាក់ថា ក្នុង​ឆ្នាំ២០២២ កន្លងទៅ ទំហំ​ពាណិជ្ជកម្ម នៃ​ប្រទេស​ទាំងពីរ កម្ពុជា និង​ចក្រភព​អង់គ្លេស បាន​កើន​ដល់​ជាង ៩៧៧ លាន​ដុល្លារ​អាមេរិក មាន​ការ​កើន​ឡើង​ប្រមាណ ២៣.៩% ធៀប​នឹង​ឆ្នាំ ២០២១ ដែលបញ្ជាក់​ថា ទំហំ​ពាណិជ្ជកម្ម​ បាន​បន្ត​កើន​ឡើង​ជាប់​ជា​លំដាប់ ៕