សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ប្រធានាធិបតីជាប់ឆ្នោតថ្មីរបស់អាមេរិក លោក Donald Trump ដែលល្បីល្បាញខាងធ្វើសង្គ្រាមពាណិជ្ជកម្មជាមួយនឹងប្រទេសចិននោះបានវិលត្រឡប់មកកាន់សេតវិមានវិញហើយ ថែមទាំងបានព្រមានថានឹងបង្កើនពន្ធនាំចូលលើគ្រប់ទំនិញរបស់ចិនបន្ថែម១០ភាគរយទៀតផងនៅពេលដែលលោកឡើងកាន់តំណែងជាផ្លូវការនាថ្ងៃទី២០ ខែមករា ឆ្នាំ២០២៥ ខាងមុខនេះ។
ឆ្លើយតបទៅនឹងបំណងរបស់លោក Trump នៅថ្ងៃចន្ទសប្តាហ៍នេះ ស្ថានទូតចិនប្រចាំនៅសហរដ្ឋអាមេរិកបានលើកឡើងដោយពន្យល់ថា សង្គ្រាមពាណិជ្ជកម្មរវាងប្រទេសទាំងពីរនឹងមិនអាចឲ្យភាគីណាទទួលបានជ័យជំនះនោះឡើយ។
អ្នកនាំពាក្យរបស់ស្ថានទូតចិនប្រចាំនៅទីក្រុងវ៉ាស៊ិនតោន លោក Liu Pengyu បានពោលបែបនេះថា ៖
« ចំពោះបញ្ហានៃការតម្លើងពន្ធនាំចូលដោយសហរដ្ឋអាមេរិកនឹងត្រូវធ្វើឡើងក្នុងកម្រិតណានោះទេ ប៉ុន្តែប្រទេសចិនជឿជាក់ថា ជាធម្មជាតិរបស់វា ទំនាក់ទំនងសេដ្ឋកិច្ច និងកិច្ចសហប្រតិបត្តិការរវាងចិន និងអាមេរិក ទើបអាចផ្តល់ប្រយោជន៍ឲ្យគ្នាទៅវិញទៅមកបាន។ ដូច្នេះយើងនឹងមិនអាចមើលឃើញថាអ្នកណានឹងទទួលជ័យជំនះនៅក្នុងសង្គ្រាមពាណិជ្ជកម្មមួយនេះឡើយ»។
យ៉ាងណាក្តី បន្ថែមពីលើការព្រមានបន្ថែមពន្ធនាំចូលនោះ លោក Trump ក៏បានថ្លែងដែរថា លោកនឹងបញ្ឈប់ការតម្លើងពន្ធគ្រប់មុខទៅលើទំនិញចិនដរាបណារដ្ឋាភិបាលទីក្រុងប៉េកាំងនឹងបញ្ឈប់ការនាំចូលសារធាតុគិមីខុសច្បាប់ ជាពិសេសសារធាតុញៀនហេ្វតានីល (fentanyl)មកកាន់ទីផ្សារអាមេរិក។
គួរកត់សម្គាល់ថា កាលពីឆ្នាំ២០២៣ មេដឹកនាំចិន លោក Xi Jinping និងប្រធានាធិបតីអាមេរិក Joe Biden ធ្លាប់បានអនុវត្តកិច្ចព្រមព្រៀងគ្នារួចមកហើយទៅលើការប្រយុទ្ធប្រឆាំងទៅនឹងសារធាតុគិមីនានាដែលនាំចូលពីប្រទេសចិន ហើយជាលទ្ធផលកាលពីខែសីហា រដ្ឋាភិបាលទីក្រុងប៉េកាំងបានឈានទៅដល់ការរឹតបន្តឹងទៅលើការនាំចូលសារធាតុគិមីចំនួន៣ប្រភេទដែលជាធាតុផ្សំដ៏សំខាន់ក្នុងការផលិតថ្នាំញៀនប្រភេទហ្វេតានីលទាំងនោះផងដែរ។
កន្លងមក សហរដ្ឋអាមេរិកដែលជាប្រទេសមានចរាចរ និងប្រើប្រាស់សារធាតុ fentanyl ច្រើន ហើយវាបានក្លាយជាមូលហេតុចម្បងនៃការបាត់បង់ជីវិតពលរដ្ឋអាមេរិកយ៉ាងច្រើនជារៀងរាល់ឆ្នាំ។ ហេតុនេះ បានជាសហរដ្ឋអាមេរិកតែងតែដាក់សំពាធចំពោះប្រទេសចិនដើម្បីឱ្យអនុវត្តច្បាប់កាន់តែតឹងរ៉ឹង រួមទាំងការដោះស្រាយបញ្ហាទូទាត់ខុសច្បាប់ និងការទប់ស្កាត់បន្ថែមទៀតលើសារធាតុគីមីដែលនាំចេញទាំងនោះ៕
Account
Security
Favourite Content