ភ្នំពេញ ៖ ជារៀងរាល់ឆ្នាំ របាយការណ៍ស្តីពីការនាំចេញកសិផលកៅស៊ូទៅកាន់ទីផ្សារអន្តរជាតិមានការកើនឡើងជាលំដាប់។ ដោយឡែក សម្រាប់រយៈពេល ៦ ខែដើមឆ្នាំ២០២៤កន្លងទៅនេះ សម្រេចបានទឹកប្រាក់សរុបចំនួន ២២៩លានដុល្លារ កើនឡើង ១៩,៨៣% បើធៀបនឹងរយៈ​ពេលដូចគ្នាក្នុងឆ្នាំ២០២៣ ដែលមានចំនួនត្រឹម ១៩១លានដុល្លារទៅកាន់ទីផ្សារប្រទេសម៉ាឡេស៊ី វៀតណាម សិង្ហបុរីនិងចិន កម្ពុជាមានផ្ទៃដីដាំកៅស៊ូចំនួនជាង៤០ម៉ឺនហិកតា(៤០៧,​១៧​២​)គិតត្រឹមឆ្នាំ២០​២​៣​។

នេះជាការលើកឡើងរបស់លោកស្រី ភាណ សោភ័ណ នាយិកានៃអង្គការអុកស្វាមនៅក្នុងកិច្ចសន្ទនាថ្នាក់ជាតិក្រោមប្រធានបទ «ប្រព័ន្ធគាំពា​រ​សង្គមដែលល្អប្រសើរសម្រាប់កម្មករនិងកសិករក្នុងខ្សែច្រវាក់ចេក និងកៅស៊ូ» នាព្រឹកថ្ងៃទី៣១ ខែតុលា ឆ្នាំ២០២៤នៅរាជធានីភ្នំពេញ។

លោកស្រីនាយិកាបានបន្តថា៖ សម្រាប់ដំណាំចេកអំបូងលឿង បើតាមទិន្នន័យរបស់ក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ការនាំចេញចេកអំបូងលឿងរបស់កម្ពុជាទៅកាន់ទីផ្សារអន្តរជាតិនៅក្នុងរយៈពេល ៧ ខែឆ្នាំ២០២៤ បានជាង ១៤ ម៉ឺន ៣ពាន់តោន ដោយទទួលបានទឹកប្រាក់ជាង ៩៦លានដុល្លារ មានការធ្លាក់ចុះជាង២០% បើធៀបនឹងរយៈពេលដូចគ្នាកាលពីឆ្នាំមុន។ កត្តាដែលនាំឱ្យមានការធ្លាក់ចុះនេះ គឺការប្រែប្រួលអាកាសធាតុ។ ផ្លែចេករបស់កម្ពុជាភាគច្រើននាំចេញទៅលក់នៅទីផ្សារវៀតណាម ថៃ ចិន កូរ៉េខាងត្បូង និងសហភាពអឺរ៉ុបជាដើម ហើយក៏មានលក់លើទីផ្សារក្នុងស្រុកផងដែរ។ បើតាមក្រសួងកសិកម្ម គិតត្រឹមឆ្នាំ២០២២ ប្រទេសកម្ពុជាមានផ្ទៃដីដាំដុះចេក ប្រមាណជាង១៦ពាន់ហិកតា និងផ្ទៃដីកំពុងប្រមូលផលជាង១១ពាន់ហិកតា ដោយក្នុងនោះខេត្តដែលមានដាំដុះចេកច្រើនជាងគេរួមមានខេត្តរតនគិរី ក្រចេះ ស្ទឹងត្រែង កំពត កំពង់ចាម និងកំពង់ស្ពឺ។

លោកស្រី ភាណ សោភ័ណ បានបញ្ជាក់ថា៖

«នៅពីក្រោយវាំងនននៃការគ្រប់គ្រងរបស់ក្រុមហ៊ុនវិនិយោគ គឺកំលាំងពលកម្មដែលមិនអាចខ្វះបានរបស់បងប្អូនជាកម្មករ កម្មការិនី ដែលមានវត្តមាននៅទីនេះ។ ពួកគាត់ត្រូវក្រោកពីយប់ងងឹត – គឺនៅពេលដែលយើងជាអ្នករស់នៅទីក្រុង ទីប្រជុំជន កំពង់សម្រានលង់លក់ (ខ្លះកំពង់យល់សុបិនផងនោះ) – ដាំបាយ រៀបចំម្ហូបអាហារដើម្បីទៅចៀជ័រកៅស៊ូ។ ដោយឡែក កម្មករ និងកម្មការិនីក្នុងចំការចេកវិញ ក៏មមាញឹកនឹងការបណ្តុះកូនចេក កាត់ត្រយូងចេក រុំផ្លែចេក បាញ់ថ្នាំការពារសត្វល្អិតផ្សេងៗ ដើម្បីទទួលបានទិន្នផលតាមស្តង់ដា និងការបញ្ជារទិញ។ ប្រសិនបើគ្មានកំលាំងចៀរ បក កាប់គាស់ ដឹកជញ្ជូន និងវេចខ្ចប់ទាំងនោះទេ ក្រុមហ៊ុនក៏នឹងមិនអាចសម្រេចផែនការតាមកិច្ចព្រមព្រៀងជាមួយដៃគូពាណិជ្ជកម្មរបស់ខ្លួនបានដែរ»។

លោកស្រីបានលើកឡើងថា៖ បងប្អូនកម្មករ កសិករ ត្រូវតែទទួលបានការគាំទ្រកិច្ចគាំពារសង្គមដែលជាសសរស្តម្ភស្នូលមួយនៃការងារសមរម្យបានរួមបញ្ចូលនូវគោលនយោបាយ និងកម្មវិធីជាតិសំខាន់ៗជាច្រើនក្នុងន័យដើម្បីកាត់បន្ថយភាពក្រីក្រ និងភាពងាយរងគ្រោះក្នុងចំណោមប្រជាជនកម្ពុជា។ រាជរដ្ឋាភិបាល តាមរយៈក្រុមប្រឹក្សាជាតិគាំពារសង្គម និងបេឡាជាតិសន្តិសុខសង្គមនៃក្រសួង​ការងារ និងបណ្តុះបណ្តាលវិជ្ជាជីវៈ បានផ្តួចផ្តើមដាក់ឱ្យអនុវត្តគោលនយោបាយគាំពារសង្គមមួយចំនួន ជាពិសេសរបបសន្តិសុខសង្គមដែលបានផ្តល់អត្ថប្រយោជន៍យ៉ាងច្រើនដល់កម្មករ និយោជិតទាំងក្នុងវិស័យវាយណភ័ណ្ឌ និងវិស័យកសិ-ឧស្សាហកម្មផងដែរ។ តាមរយៈគោលនយោបាយនេះ កម្មករនិយោជិតអាចទទួលបាននូវសេវាថែទាំសុខភាពដោយអត់គិតថ្លៃ ទទួលបានអត្ថប្រយោ​ជន៍ហានិភ័យការងារ របបប្រាក់សោធន ដែលមានសារៈសំខាន់ណាស់ចំពោះសុខុមាលភាព សន្តិសុខប្រាក់ចំណូល និងភាពធន់របស់ពួកគេ។ ទន្ទឹមនឹងនេះ រាជរដ្ឋាភិបាលកម្ពុជា តាមរយៈក្រសួងជំនាញ ដោយមានការគាំទ្រពីអង្គការជាតិ និងអន្តរជាតិ អង្គការមិនមែនរដ្ឋាភិបាល បាន និងកំពុងធ្វើការពង្រីកវិសាលភាពគោលនយោបាយគាំពារសង្គម រួមទាំងគម្រោងធានារ៉ាប់រងសុខភាពសាធារណៈជាសកល អត្ថប្រយោជន៍មាតុភាព កម្មវិធីផ្ទេរសាច់ប្រាក់សម្រាប់ក្រុមគ្រួសារងាយរងគ្រោះ និងរបបប្រាក់សោធនសម្រាប់មនុស្សវ័យចាស់ជាដើម ក្នុងគោលបំណងលើកកម្ពស់សមធម៌សង្គម ជីវភាពរស់នៅ គាំទ្រដល់ការអភិវឌ្ឍន៍សេដ្ឋកិច្ច។

លោកស្រី ស៊ិន ពុទ្ធារី នាយិកាប្រតិបត្តិនៃអង្គការគណៈកម្មាធិការសហប្រតិបត្តិការដើម្បីកម្ពុជា (គ.ស.ក.)មានប្រសាសន៍ថា ៖ ក្នុងនាមជាអង្គការសមាជិកភាពដែលមានសមាជិកទាំងអង្គការក្នុងស្រុក និងអង្គការបរទេសចំនួន ១៨៦ ស្ថាប័ន អង្គការ គ.ស.ក. ធ្វើការក្នុងភាពជាដៃគូដើម្បីអភិបាលកិច្ចល្អ បរិយាកាសអំណោយផល និងនិរន្តរភាពនៃអង្គការសង្គមស៊ីវិល ហើយការចូលចំណែកដល់ការអភិវឌ្ឍគោលនយោបាយកិច្ចគាំពារសង្គម និងការងារសមរម្យសម្រាប់កម្មករ-និយោជិតជាមួយរាជរដ្ឋាភិបាល គឺជាដោះស្រាយបញ្ហាប្រឈមក្នុងការអភិវឌ្ឍទាំងនៅថ្នាក់ជាតិ និងថ្នាក់ក្រោមជាតិ។

លោកស្រី សេង រាសី នាយិកានៃអង្គការសីលការមានប្រសាសន៍ថា ៖ ស្រ្តី ជាកម្មករនិងកសិករ ដើរតួនាទីយ៉ាងសំខាន់ក្នុងខ្សែច្រវាក់ផលិតកម្មកសិកម្ម ដូច្នេះកិច្ចសន្ទនាពហុភាគីលើប្រព័ន្ធគាំពារសង្គមមានសារ:សំខាន់ណាស់ក្នុងការរកដំណោះស្រាយរួមដែលធានា​ការរស់នៅរបស់ពួកគាត់ប្រកបដោយសេចក្ដីថ្លៃថ្នូរ។

លោក ប៊ូ វរសក្ស នាយកប្រតិបត្តិអង្គការជីវិតធម្មជាតិ មានប្រសាសន៍ថា ៖ អង្គការជីវិតធម្មជាតិនៅកម្ពុជាកំពុងជួយសហគមន៍ព្រៃឈើចំនួន២ក្នុងខេត្តរតនគីរី កាត់បន្ថយទំនាស់ជាមួយក្រុមហ៊ុនចំការចេក និងកៅស៊ូ ហើយសូមលើកទឹកចិត្តអោយអ្នកពាក់ព័ន្ធនឹងខែ្សច្រវាក់ផលិតកម្មចេក និងកៅស៊ូទាំងអស់ បង្កើនទំនាក់ទំនង និងស្វែងរកដំណោះស្រាយលើបញ្ហាទំនាស់ដើម្បីធានាថាការរីកលូតលាស់នៃដំណាំឧស្សាហកម្មនេះបានផលប្រយោជន៍ទំាងអស់គ្នា៕