សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេលមួយឆ្នាំនៃការបង្កើតរាជរដ្ឋាភិបាលថ្មីអាណត្តិទី៧ កម្ពុជាទទួលបានទុនវិនិយោគសរុបប្រមាណ ៧ ៦០០លានដុល្លារអាមេរិក លើគម្រោងចំនួន ៣៩១ និងបានបង្កើតឱកាសការងារជូនប្រជាពលរដ្ឋបានរាប់ម៉ឺនកន្លែង ។ នេះបើតាមប្រសាសន៍សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងកាលពីពេលថ្មីៗនេះ ។
សម្ដេចធិបតីបានមានប្រសាសន៍ គិតចាប់តាំងពីខែកញ្ញា ឆ្នាំ២០២៣ ពោលគឺរាប់ចាប់តាំងពីបង្កើតរាជរដ្ឋាភិបាលថ្មី ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោកគចំនួន៣៩១គម្រោង មានទុនសរុបប្រមាណ ៧៦០០លានដុល្លារអាមេរិក លើវិស័យអាទិភាពនានា ក្នុងនោះមានឧស្សាហកម្ម ហេដ្ឋានរចនាសម្ព័ន្ធ កសិកម្ម ទេសចរណ៍ជាដើម ដែលបានបង្កើតការងាររហូតដល់៣៤ម៉ឺននាក់ ។
គួរកត់សម្គាល់ថា ចាប់តាំងពីសម្ដេចធិបតីត្រូវបានតែងតាំងជានាយករដ្ឋមន្ត្រីនៃព្រះរាជាណាចក្រកម្ពុជា សម្ដេចបានបំពេញទស្សនកិច្ចនៅបណ្ដាប្រទេសជាដៃគូជាច្រើន ដូចជាចិន សហរដ្ឋអាមេរិក បណ្ដាប្រទេសក្នុងតំបន់អឺរ៉ុបនិងបណ្ដាប្រទេសក្នុងតំបន់អាស៊ាន ជាដើម ហើយរាល់ដំណើរទស្សនកិច្ចរបស់សម្ដេចធិបតីនៅក្រៅប្រទេស សម្ដេចមិនភ្លេចក្នុងការជួបជាមួយវិនិយោគិន និងបង្ហាញពីសក្ដានុពលលើការវិនិយោគនៅក្នុងប្រទេសកម្ពុជា ដើម្បីទាក់ទាញវិនិយោគិនបរទេសមកបណ្ដាក់ទុនវិនិយោគនៅកម្ពុជានោះទេ ។
សម្ដេចធិបតី ហ៊ុន ម៉ាណែត ក៏បានណែនាំឱ្យមន្ត្រីថ្នាក់ខេត្ត ជាពិសេសអភិបាលខេត្តត្រូវបង្កើនសក្ដានុពលទាក់ទាញវិនិយោគទៅកាន់ខេត្តរបស់ខ្លួន ដើម្បីបង្កើតការងារជូនប្រជាពលរដ្ឋក្នុងខេត្ត ដោយមិនចាំបាច់បាច់ធ្វើចំណាកស្រុកទៅធ្វើការនៅក្នុងក្រុងភ្នំពេញក៏ដូចជានៅតាមបណ្ដាខេត្តផ្សេងទៀតនោះ ។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា ក៏បានលើកឡើងថា ចាប់តាំងពីការកកើតរាជរដ្ឋាភិបាលថ្មី ឯកឧត្តមបានដឹកនាំប្រតិភូជាន់ខ្ពស់កម្ពុជាជាច្រើនទៅបំពេញទស្សនកិច្ច និងបានជួបវិនិយោគិនបរទេសជាច្រើន ដូចជាប្រទេសចិន និងបណ្ដាប្រទេសក្នុងតំបន់អឺរ៉ុប ។ ដោយឡែក នៅខែក្រោយនេះ ឯកឧត្តមក៏នឹងដឹកនាំប្រតិភូ ព្រមទាំងសមាជិកនៃសមាគមឧកញ៉ាកម្ពុជាទៅប្រទេសមួយចំនួននៅមជ្ឈិមបូព៌ា សហរដ្ឋអាមេរិក ដើម្បីបង្ហាញពីសក្ដានុពលនៃការវិនិយោគរបស់កម្ពុជាទៅកាន់វិនិយោគិននៃប្រទេសទាំងនោះ ដើម្បីទាក់ទាញការវិនិយោគបន្ថែម ។
គួររម្លឹកថា ថ្មីៗនេះដែរ មានប្រតិភូក្រុមហ៊ុនមកពីប្រទេសចិនចំនួន១២ក្រុមហ៊ុន បានជួបជាមួយសម្ដេចមហាបវរធិបតី ហ៊ុន ម៉ាណែត ដោយក្រុមហ៊ុនទាំង១២នោះ បានជម្រាបជូនសម្ដេចពីការចាប់អារម្មណ៍មកបណ្ដាក់ទុនវិនិយោគនៅក្នុងប្រទេសកម្ពុជាលើវិស័យសំខាន់ៗមួយចំនួន ដូចជា ឧស្សាហកម្ម កសិកម្ម អចលនទ្រព្យ និងហេដ្ឋារចនាសម្ព័ន្ធជាដើម ។
សូមបញ្ជាក់ដែរថា ទន្ទឹមនឹងការទទួលបានទុនវិនិយោគជាបន្តបន្ទាប់ពីវិនិយោគិនទាំងបរទេស និងក្នុងស្រុក កម្ពុជាក៏បាន និងកំពុងអភិវឌ្ឍន៍ហេដ្ឋារចនាសម្ព័ន្ធជាច្រើនបន្ថែមទៀតដើម្បីសម្រួលដល់គម្រោងវិនិយោគនានា ដោយក្នុងនោះរួមមានផ្លូវល្បឿនលឿនភ្នំពេញ-ព្រះសីហនុ, គម្រោងផ្លូវល្បឿនលឿនភ្នំពេញ-បាវិត, គម្រោងផ្លូវល្បឿនលឿនភ្នំពេញ -សៀមរាប-ប៉ោយប៉ែត និងគម្រោងព្រែកជីកហ្វូណនតេជោ ដែលទើបនឹងបើកការដ្ឋានសាងសង់កាលពីពេលថ្មីៗនេះ ៕
Account
Security
Favourite Content