បរទេស ៖ ប្រធានាធិបតីអាម៉េរិក លោក ដូណាល់ ត្រាំ បានបញ្ជារដ្ឋាភិបាលរបស់លោកឱ្យផ្អាករាល់សកម្មភាពពាណិជ្ជកម្មភ្លាមៗជាមួយអេស្ប៉ាញ ពាក់ព័ន្ធនឹងការបដិសេធមិនព្រមបង្កើនការចំណាយទៅលើណាតូ និងបដិសេធអាម៉េរិកពីការប្រើប្រាស់មូលដ្ឋានទ័ពអាកាសរបស់ខ្លួន ។

យោងតាមការចេញផ្សាយរបស់បណ្តាញសាព័ត៌មានអន្តរជាតិបានឱ្យដឹងថា ការសម្រេចចិត្តនេះបានធ្វើឡើងនៅក្នុងកិច្ចប្រជុំកំពូលរបស់អង្គការណាតូ នាទីក្រុងអង់ការ៉ា ប្រទេសតួកគី ដែលធ្វើឱ្យកម្តៅនយោបាយ និងសេដ្ឋកិច្ចរវាងប្រទេសទាំងពីរកាន់តែឡើងកម្តៅខ្លាំង បើទោះបីជាសហភាពអឺរ៉ុប (EU) មានច្បាប់តម្រូវឱ្យការចរចាពាណិជ្ជកម្មនានាត្រូវធ្វើឡើងក្នុងនាមជាប្លុកតែមួយក៏ដោយ។ មូលហេតុចម្បងនៃការកាត់ផ្តាច់ពាណិជ្ជកម្ម ដោយសារអេស្ប៉ាញបដិសេធមិនព្រមបង្កើនការចំណាយលើវិស័យការពារជាតិឱ្យដល់គោលដៅថ្មីរបស់ណាតូ គឺ ៥ ភាគរយនៃ GDP និងការមិនសហការនៅក្នុងសង្រ្គាមអ៊ីរ៉ង់ ជាពិសេស ក្រោយពេលនាយករដ្ឋមន្ត្រីអេស្ប៉ាញ លោក Pedro Sanchez បដិសេធមិនអនុញ្ញាតឱ្យអាម៉េរិកប្រើប្រាស់មូលដ្ឋានទ័ពអាកាសរបស់ខ្លួនសម្រាប់ប្រតិបត្តិការសង្រ្គាមប្រឆាំងនឹងអ៊ីរ៉ង់។

លោក ដូណាល់ ត្រាំ បានហៅអេស្ប៉ាញថា ជា «ដៃគូដ៏អាក្រក់បំផុត»។ លោក ត្រាំ បញ្ជាផ្ទាល់ទៅកាន់រដ្ឋមន្ត្រីក្រសួងហិរញ្ញវត្ថុ លោក Scott Bessent ឱ្យកាត់ផ្តាច់ពាណិជ្ជកម្ម និងរាល់ការទស្សនកិច្ចនានា។ ទន្ទឹមនឹងនេះ ក្រសួងហិរញ្ញវត្ថុ ក្រសួងពាណិជ្ជកម្ម និងការិយាល័យតំណាងពាណិជ្ជកម្មអាមេរិក កំពុងរៀបចំបញ្ជីមុខទំនិញរបស់អេស្ប៉ាញដើម្បីដាក់ទណ្ឌកម្មសេដ្ឋកិច្ចក្នុងពេលឆាប់ៗខាងមុខនេះ ហើយលោក ត្រាំ អាចនឹងប្រើប្រាស់ច្បាប់ស្តីពីអំណាចសេដ្ឋកិច្ចក្នុងគ្រាអាសន្នអន្តរជាតិ (IEEPA) ដើម្បីអនុវត្តហាមឃាត់ការនាំចូល។

គួររំលឹកផងដែរថា នេះជាលើកទីពីរហើយដែលប្រធានាធិបតីអាម៉េរិកបានគំរាមអេស្ប៉ាញបែបនេះ បន្ទាប់ពីការគំរាមលើកដំបូងកាលពីខែមីនា ប៉ុន្តែពាណិជ្ជកម្មរវាងប្រទេសទាំងពីរនៅតែបន្តជាធម្មតារហូតមកដល់ពេលបច្ចុប្បន្ន។

ជាការឆ្លើយតប នាយករដ្ឋមន្ត្រីអេស្ប៉ាញ លោក Pedro Sanchez បានព្យាយាមសម្រាលស្ថានភាពដោយលើកឡើងថា លោកមានកិច្ចសន្ទនាយ៉ាងរលូនជាមួយលោក ត្រាំ អំពីការប្រកួតបាល់ទាត់ពិភពលោក (World Cup) និងកីឡាវាយកូនហ្គោល ហើយមិនបានជជែកពីរឿងថវិកាយោធានោះទេ។ អេស្ប៉ាញអះអាងថា ខ្លួនគឺជាសម្ព័ន្ធមិត្តណាតូដ៏គួរឱ្យទុកចិត្ត ដោយបានបង្កើនការចំណាយយោធាយ៉ាងលឿនបំផុតដល់ ២% នៃ GDP របស់ខ្លួនក្នុងរយៈពេលពីរឆ្នាំចុងក្រោយនេះ និងបានបញ្ជូនទ័ពទៅកាន់ប្រទេសហ្វាំងឡង់ដើម្បីចូលរួមបេសកកម្មរបស់ណាតូថែមទៀតផង។ បន្ថែមពីនេះ ខាងការិយាល័យនាយករដ្ឋមន្ត្រីអេស្ប៉ាញបានគូសបញ្ជាក់ថា ទំនាក់ទំនងសេដ្ឋកិច្ចរវាងប្រទេសទាំងពីរធ្វើឡើងដោយក្រុមហ៊ុនឯកជន មិនមែនរដ្ឋាភិបាលឡើយ ហើយច្បាប់ពាណិជ្ជកម្មរបស់សហភាពអឺរ៉ុបក៏មិនអនុញ្ញាតឱ្យអាម៉េរិកដាក់ទណ្ឌកម្មលើប្រទេសណាមួយដាច់ដោយឡែកនោះទេ។

យ៉ាងណាក៏ដោយ បើទោះបីជាមានការគំរាមកំហែងពីលោក ត្រាំ ក៏ដោយ ប៉ុន្តែក្រុមហ៊ុនគ្រប់គ្រងទ្រព្យសកម្មធំជាងគេបំផុតនៅលើពិភពលោក BlackRock របស់អាម៉េរិក នៅតែចាត់ទុកអេស្ប៉ាញជាប្រទេសអាទិភាពឈានមុខគេសម្រាប់ការវិនិយោគ ដោយសារតែសេដ្ឋកិច្ចមានកំណើនលឿនជាងប្រទេសអភិវឌ្ឍន៍ដទៃទៀត។ BlackRock កំពុងក្តោបក្តាប់ទ្រព្យសកម្មប្រមាណ ១១៩ ពាន់លានដុល្លារនៅក្នុងប្រទេសអេស្ប៉ាញ។ ក្រៅពីនេះ អេស្ប៉ាញគឺជាប្រទេសនាំចេញប្រេងអូលីវធំជាងគេបំផុតលើលោក ហើយក៏នាំចេញគ្រឿងបន្លាស់រថយន្ត ដែកថែប គីមីភណ្ឌ និងស្រាទៅកាន់អាម៉េរិកផងដែរ។ ទោះជាយ៉ាងណាក្ដី ក្រុមអ្នកវិភាគមើលឃើញថា សេដ្ឋកិច្ចអេស្ប៉ាញរងផលប៉ះពាល់តិចតួចប៉ុណ្ណោះពីពាណិជ្ជកម្មជាមួយអាម៉េរិក បើធៀបនឹងបណ្តាប្រទេសអឺរ៉ុបដទៃទៀត៕