សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ មានបំណងជំរុញឱ្យវិស្វករ និងស្ថាបត្យករកម្ពុជា ទៅបម្រើការងារនៅក្រៅប្រទេស ដើម្បីទទួលបានទាំងប្រាក់ចំណូល និងបទពិសោធន៍ថ្មីៗលើវិស័យសំណង់ មកចូលរួមអភិវឌ្ឍន៍ប្រទេសជាតិ។
ក្នុងឱកាសបើកសិក្ខាសាលាពិគ្រោះយោបល់ និងប្រមូលធាតុចូលលើសេចក្តីព្រាងប្រកាសស្តីពីបទប្បញ្ញត្តិបច្ចេកទេសសំណង់ ដែលរៀបចំដោយក្រសួងរៀបចំដែនដី នគរូបនីយកម្ម និងសំណង់ នៅទីស្តីការក្រសួង កាលពីថ្ងៃទី២៩ ខែមិថុនា ឆ្នាំ២០២៦ ឯកឧត្តមឧបនាយករដ្ឋមន្ត្រី សាយ សំអាល់ បានថ្លែងអំណរគុណដល់ថ្នាក់ដឹកនាំ និងមន្ត្រីបច្ចេកទេសទាំងអស់ ដែលបានខិតខំប្រឹងប្រែងប្រើប្រាស់ទាំងកម្លាំងកាយ កម្លាំងចិត្ត និងចំណេះដឹង ក្នុងការសិក្សា ស្រាវជ្រាវ និងរៀបចំលិខិតបទដ្ឋានគតិយុត្តិ និងបទប្បញ្ញត្តិបច្ចេកទេសសំណង់ឱ្យមានភាពត្រឹមត្រូវ ស្របតាមគោលនយោបាយសង្គម និងស្ថានភាពជាក់ស្តែងរបស់ប្រទេសកម្ពុជា។
ឯកឧត្តមឧបនាយករដ្ឋមន្ត្រី បានមានប្រសាសន៍ថា បទពិសោធន៍ដែលកម្ពុជាបានឆ្លងកាត់ក្នុងដំណើរប្រវត្តិសាស្ត្រ គឺជាចន្លុះបំភ្លឺផ្លូវសម្រាប់កម្ពុជាធ្វើដំណើរទៅមុខប្រកបដោយភាពត្រឹមត្រូវគ្រប់ជំហាន។ ដូច្នេះ រាល់ការរៀបចំលិខិតបទដ្ឋានគតិយុត្តិ និងបទប្បញ្ញត្តិពាក់ព័ន្ធនឹងវិស័យសំណង់ ត្រូវផ្អែកលើចំណេះដឹងវិជ្ជាជីវៈជាគោល គួបផ្សំនឹងស្ថានភាពជាក់ស្តែងរបស់ប្រជាពលរដ្ឋ និងប្រទេសជាតិ។
ជាមួយគ្នានេះ ឯកឧត្តមឧបនាយករដ្ឋមន្ត្រី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានបង្ហាញបំណងចង់ឱ្យមានការបញ្ជូនវិស្វករ និងស្ថាបត្យករកម្ពុជា ទៅបម្រើការងារនៅក្រៅប្រទេស ដូចជាប្រទេសសិង្ហបុរីជាដើម ដើម្បីទទួលបានទាំងប្រាក់ចំណូល បទពិសោធន៍ និងបច្ចេកវិទ្យាថ្មីៗលើវិស័យសំណង់ ហើយអាចនាំយកចំណេះដឹង និងជំនាញទាំងនោះ មកចូលរួមអភិវឌ្ឍវិស័យសំណង់ និងប្រទេសជាតិនាពេលអនាគត។
ឯកឧត្តមឧបនាយករដ្ឋមន្ត្រី ក៏បានណែនាំឱ្យអង្គសិក្ខាសាលាពិចារណាឱ្យបានទូលំទូលាយអំពីអត្ថប្រយោជន៍នៃគ្រឿងបង្គុំសំណង់ និងទិដ្ឋភាពរួមផ្សេងៗទៀតលើសពីកិច្ចការសំណង់ ដើម្បីរួមចំណែកពង្រឹងសមត្ថភាពរបស់អ្នកជំនាញខ្លួនឯងផ្ទាល់ និងភាពរឹងមាំរបស់ប្រទេសជាតិ ព្រមទាំងលើកកម្ពស់គុណភាពជីវិតប្រជាពលរដ្ឋ តាមរយៈការអភិវឌ្ឍវិស័យសំណង់ ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត ដែលបានដាក់ចេញនូវគោលនយោបាយ និងទិសដៅច្បាស់លាស់ ក្នុងការពង្រឹងខឿនសេដ្ឋកិច្ចជាតិឱ្យមានភាពរឹងមាំ មានភាពម្ចាស់ការ និងការអភិវឌ្ឍប្រកបដោយចីរភាព៕
អត្ថបទ៖ វណ្ណលុក
រូប៖ គ្រី សម្បត្តិ
Account
Security
Favourite Content