សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាការកត់សម្គាល់ នៅក្នុងវិស័យអចលនទ្រព្យកម្ពុជា មានអ្នកប្រកបរបរ និងទទួលយកផលចំណេញពីវិស័យមួយនេះច្រើនណាស់ ជាពិសេសនៅក្នុងអំឡុងមុនពេលមានវិបត្តិកូវីដ១៩ ប៉ុន្តែក្នុងនោះមានប្រតិបត្តិករមួយចំនួនបានធ្វើអាជីវកម្មគ្មានច្បាប់ គ្មានទម្លាប់ គ្មានអាជ្ញាបណ្ណ និងគ្មានការដឹងឮពីអាជ្ញាធរ ដែលធ្វើឱ្យវិស័យត្រូវជួបប្រទះនឹងផលពិបាកដោះស្រាយនៅពេលកើតមានបញ្ហាណាមួយកើតឡើង ។ ក្នុងន័យនេះ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានស្នើឱ្យប្រតិបត្តិករដែលមិនទាន់អាជ្ញាបណ្ណ គួរស្វែងរកភាពស្របច្បាប់ដើម្បីពង្រឹងគុណភាពវិស័យនេះទាំងអស់គ្នា។
លោក សន សៀប ប្រធានសមាគមអ្នកវាយតម្លៃតម្លៃ និងភ្នាក់ងារអចលនវត្ថុកម្ពុជា (CVEA) បានមានប្រសាសន៍ឱ្យដឹងថា មែនទែនទៅ ក្នុងវិស័យអចលនទ្រព្យ ទាំងរាជរដ្ឋាភិបាល និងសមាគមបានរៀបចំឱ្យមានច្បាប់មានទម្លាប់រួចរាល់ហើយ ប៉ុន្តែនៅតែមានអ្នកមួយចំនួនបន្តប្រកបអាជីវកម្មប្រាសចាកពីច្បាប់ និងរកស៊ីក្រៅប្រព័ន្ធច្បាប់ដដែល ។ ដូច្នេះ ក្នុងនាមជាសមាគម សូមទទូចឱ្យអ្នកប្រតិបត្តិករ ក៏ដូចជាអ្នកប្រកបអាជីវកម្មក្នុងវិស័យនេះចូលមកនៅក្រោមច្បាប់ទាំងអស់គ្នា។
លោកបន្តថា ៖
«សមាគមបានធ្វើកិច្ចការជាច្រើនរួចមកហើយ ហើយប្រសិនបើជាពួកយើងរកឃើញថា មានអ្នកប្រកបរបរអាជីវកម្ម ឬសេវាកម្មក្នុងវិស័យអចលនទ្រព្យដោយគ្មានច្បាប់ទម្លាប់ ខាងសមាគមនឹងរៀបចំឈ្មោះក្រុមហ៊ុនទាំងនោះប្រគល់ជូនខាងអាជ្ញាធរជាអ្នកអញ្ជើញពួកគាត់ម្ដង ពីព្រោះ បើសិនជាយើងនៅតែបណ្ដែតបណ្ដោយឱ្យពួកគាត់ប្រព្រឹត្តបន្តទៀត វិស័យនេះនឹងនៅតែមានអ្នកធ្វើអាជីវកម្មគ្មានច្បាប់ គ្មានទម្លាប់ដដែល ហើយនៅពេលមានបញ្ហា គឺពិបាកក្នុងការរកអ្នកទទួលខុសត្រូវណាស់» ។
លោក សន សៀប បានបន្ថែមថា ផែនការរបស់រាជរដ្ឋាភិបាលកម្ពុជា គឺកំណត់យកឆ្នាំ២០៣០ ជាពេលវេលាដែលកម្ពុជាក្លាយជាប្រទេសមានប្រាក់ចំណូលមធ្យមកម្រិតខ្ពស់ និងឆ្នាំ២០៥០ ជាពេលវេលាដែលកម្ពុជាត្រូវក្លាយជាប្រទេសមានប្រាក់ចំណូលខ្ពស់ ហើយដើម្បីសម្រេចបានទៅតាមផែនការនោះ វិស័យផ្សេងៗដែលរួមចំណែកដល់សេដ្ឋកិច្ចត្រូវតែមានច្បាប់ មានភាពរឹងមាំ មានគុណភាព ។
លោកបានបញ្ជាក់ថា ៖
«នៅពេលយើងប្រមូលផ្ដុំអ្នកប្រកបរបរដែលមានច្បាប់ទម្លាប់ត្រឹមត្រូវ នោះយើងនឹងពង្រឹងគុណភាពលើវិស័យអចលនទ្រព្យរបស់យើង ហើយនឹងអាចទាក់ទាញវិនិយោគិនមកពីខាងក្រៅប្រទេសចូលមកបណ្ដាក់ទុនវិនិយោគនៅកម្ពុជា ដោយវិនិយោគិនបរទេសនឹងមានទំនុកចិត្តមកលើវិស័យអចលនទ្រព្យកម្ពុជាកាន់តែខ្លាំងឡើង»។
លោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ ស៊ីភីអិល បានមានប្រសាសន៍ថា ការរកស៊ីដែលអាចរក្សាកេរ្តិ៍ឈ្មោះស្ថិតស្ថិរយូរអង្វែង គឺជាការរកស៊ីដែលមានក្រមសីលធម៌ វិជ្ជាជីវៈ ហើយអាចផ្ដល់ទំនុកចិត្តច្បាស់លាស់ទៅកាន់ទីផ្សារទាំងនៅក្នុងស្រុក និងក្រៅប្រទេស ។ បើសិនជាអ្នករកស៊ីក្នុងវិស័យអចលនទ្រព្យមិនមានក្រមសីលធម៌វិជ្ជាជីវៈ មិនមានច្បាប់ទម្លាប់ នឹងឱ្យអ្នកវិនិយោគក្រៅប្រទេសអស់ទំនុកចិត្ត ។
លោកឧកញ៉ាបន្តថា ៖
«អ្នកវិនិយោគដែលចូលមកកម្ពុជា គេចង់បានព័ត៌មានពិត មិនបំប៉ោង មិនភូតកុហកគេ ហើយក្រុមហ៊ុនដែលផ្ដល់សេវាអចលនទ្រព្យគឺជាក្រុមហ៊ុនដែលមានចុះបញ្ជីត្រឹមត្រូវ មានច្បាប់ មានទម្លាប់នោះទើបក្រុមហ៊ុនបរទេសគេមករកស៊ីនៅកម្ពុជាកាន់តែច្រើន» ។
គួរបញ្ជាក់ថា វិស័យអចលនទ្រព្យក្នុងប្រទេសកម្ពុជានាពេលបច្ចុប្បន្ននេះ នៅតែមិនទាន់ងើបឡើងដូចស្ថានភាព មុនវិបត្តិកូវីដ១៩នោះទេ ហើយមានអ្នកជំនាញមួយចំនួនមើលឃើញថា វិស័យនេះ ទំនងជាមិនអាចនឹងវិលទៅរកស្ថានភាពដូចមុនវិបត្តិកូវីដ១៩នោះទេ ប៉ុន្តែប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជាលើកឡើងថាវាអាចនឹងវិលទៅរកស្ថានភាពមុនវិបត្តិកូវីដ១៩ នៅក្នុងអំឡុងឆ្នាំ ២០២៨ ឬ២០២៩ ៕
Account
Security
Favourite Content