សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមទិន្ន័យរបស់អគ្គនាយកដ្ឋានកៅស៊ូបានបញ្ជាក់ថា គិតចាប់ពីខែមករា ដល់ ខែសីហា ឆ្នាំ២០២៤ កម្ពុជាបាននាំចេញជ័រកៅស៊ូ ២០៩ ៧៣៣តោន កើនឡើង ៤ ៥៦៥តោន ឬស្មើ ២ភាគរយធៀបនឹងរយៈពេលដូចគ្នាកាលពីឆ្នាំ២០២៣ ហើយចំណូលបានពីការនាំចេញកៅស៊ូ មានតម្លៃ ៣២៨ ៣១៨ ១៤១ដុល្លារ ។
ក្រៅពីជ័រកៅស៊ូ កម្ពុជាក៏បាននាំចេញឈើកៅស៊ូ ១៣ ៨៤៣ម៉ែត្រគូប ដោយទទួលបានចំណូល ២ ៦៨៣ ៨៩៧ដុល្លារបន្ថែមផងដែរ។ ដូច្នេះ ចំណូលនៃការនាំចេញទាំងពីរនេះ កើនឡើង ២១ភាគរយ ធៀបនឹងរយៈពេលដូចគ្នាឆ្នាំ ២០២៣។
ដោយឡែក នៅខែសីហានេះវិញ កម្ពុជាបាននាំចេញជ័រកៅស៊ូ ៣៥ ៨១៨តោន កើនឡើង ២ ៥៥៥តោន ស្មើ៧ភាគរយធៀបនឹងខែកក្កដា និងកើនឡើង ១ ៦១៩តោន ស្មើ៥ភាគរយ ធៀបនឹងឆ្នាំ២០២៣។ ចំណូលនៃការនាំចេញនេះមានតម្លៃ ៥៩ ៣១០ ៩៨០ដុល្លារ។ ក្នុងរយៈពេលដដែលនេះ កម្ពុជាក៏បាននាំចេញឈើកៅស៊ូ ២ ៩៤១ម៉ែត្រគូប និងបានចំណូល ៥៩៥ ២៥១ដុល្លារ បន្ថែមផងដែរ។
គិតចាប់ពីខែមករា រហូតមក ជ័រកៅស៊ូមានតម្លៃជាមធ្យម ១ ៥៦៥ដុល្លារក្នុងមួយតោន កើនឡើង ១៨០ដុល្លារ ក្នុងមួយតោនធៀបរយៈពេលដូចគ្នាកាលពីឆ្នាំ២០២៣។
បច្ចុប្បន្ន កម្ពុជាមានផ្ទៃដីកៅស៊ូ ៤០៧ ១៧២ហិកតា ក្នុងនោះ ផ្ទៃដីចៀរជ័រ ៣២០ ១៨៤ហិកតា ស្មើ៧៨ភាគរយ និងផ្ទៃដីថែទាំ ៨៦ ៩៨៨ហិកតា ស្មើ២១ភាគរយ។ ផ្ទៃដីកៅស៊ូកសិឧស្សាហកម្ម ២២៦ ៨៤០ហិកតា ស្មើ ៥៥ភាគរយ និងផ្ទៃដីកៅស៊ូគ្រួសារ ១៨០ ៣៣២ហិកតា ស្មើ ៤៤ភាគរយ។
ស្របនឹងរបាយការណ៍អំពីការនាំចេញកៅស៊ូ ក្រសួងកសិកម្ម រុក្ខាប្រមាញ់ និងនេសាទ មានខ្សែវីដេអូចំនួន២ដែលពាក់ព័ន្ធ ដោយក្នុងនោះ ទី១ ក្រសួងបានបញ្ចេញខ្សែវីដេអូពីប្រវត្តិដំណាំកៅស៊ូនៅប្រទេសកម្ពុជា ដែលមានអាយុកាលជាង១០០ឆ្នាំមកហើយ និងវីដេអូទី២ និយាយពីដំណាំឧស្សាហកម្មនៅប្រទេសកម្ពុជាទៅថ្ងៃអនាគត ដោយក្រសួងនឹងត្រូវបញ្ចេញនៅថ្ងៃទី១៩ ខែកញ្ញា ឆ្នាំ២០២៤ខាងមុខនេះ។ នេះបើតាមការបញ្ជាក់ពី លោកជំទាវ អ៊ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ។
សួមជម្រាបដែរថា ចម្ការកៅស៊ូដែលមានលក្ខណៈឧស្សាហកម្មទ្រង់ទ្រាយធំត្រូវបានបង្កើតឡើងដោយក្រុមហ៊ុនវិនិយោគរបស់បារាំងចំនួន៥ នៅក្នុងខេត្តដែលមានដីក្រហមបាសាល់ រួមមាន ខេត្តកំពង់ចាម ត្បូងឃ្មុំ ខេត្តក្រចេះ ស្ទឹងត្រែង និងខេត្តរតនគិរី។ ក្នុងរយៈកាលជាង ១០០ឆ្នាំកន្លងមកនេះ ដំណាំកៅស៊ូ និងឧស្សាហកម្មកៅស៊ូ បាននៅជាប់ជាមួយប្រទេសកម្ពុជាជានិច្ច បើទោះបីជាកម្ពុជាបានផ្លាស់ប្ដូររបបដឹកនាំជាច្រើនលើកច្រើនសារក៏ដោយ។
ចម្ការកៅស៊ូនេះ មានចំនួនដើមកៅស៊ូចាស់នៅរស់ច្រើនជាងគេបំផុតនៅក្នុងពិភពលោក រហូតដល់ ៤៤៨ដើម លើផ្ទៃដីប្រមាណ១៤ហិកតា និងកំពុងដើរតួយ៉ាងសំខាន់ក្នុងការស្រាវជ្រាវរកពូជកៅស៊ូ ដែលមានលក្ខខណ្ឌដុះលូតលាស់ និងផ្ដល់ផលជ័រខ្ពស់ ស្របតាមក្សេតបរិស្ថានរបស់កម្ពុជា៕
Account
Security
Favourite Content