សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNA បានរាយការណ៍ថា បណ្តាប្រទេសផ្សេងៗសរុបជាង ៥០ ប្រទេស បានផ្ញើលិខិតទៅកាន់សេតវិមានដើម្បីស្នើសុំចរចាពាណិជ្ជកម្មជាមួយនឹងអាម៉េរិកបន្ទាប់ពីប្រធានាធិបតី Donald Trump ប្រកាសពន្ធថ្មីកាលពីថ្ងៃទី ២ ខែមេសា កន្លងទៅនេះ។
កាលពីថ្ងៃសៅរ៍ ភ្នាក់ងារគយអាមេរិកបានចាប់ផ្តើមប្រមូលពន្ធឯកតោភាគី ១០ ភាគរយលើការនាំចូលទាំងអស់ពីប្រទេសជាច្រើន ខណៈដែលអត្រាពន្ធឆ្លើយតបឲ្យមានភាពស្មើគ្នាចាប់ពី ១១ ភាគរយទៅ ៥០ ភាគរយលើប្រទេសនីមួយៗនឹងត្រូវចូលជាធរមាននៅថ្ងៃទី៩ ខែមេសា។ យ៉ាងណាមិញ ប្រទេសមួយចំនួនបានបង្ហាញពីឆន្ទៈក្នុងការចរចាជាមួយសហរដ្ឋអាមេរិកដើម្បីគេចពីការដាក់ពន្ធ។ កាលពីថ្ងៃអាទិត្យ ប្រធានាធិបតីតៃវ៉ាន់ Lai Ching-te ផ្តល់ការលើកលែងពន្ធ ឬ ពន្ធសូន្យសម្រាប់កិច្ចពិភាក្សាជាមួយសហរដ្ឋអាមេរិក ដោយបានសន្យាថានឹងលុបចោលនូវរបាំងពាណិជ្ជកម្មជាមួយនឹងការបង្កើនការវិនិយោគរបស់ក្រុមហ៊ុនតៃវ៉ាន់នៅក្នុងសហរដ្ឋអាមេរិក។ ទន្ទឹមនឹងនេះ មន្ត្រីរដ្ឋាភិបាលឥណ្ឌាម្នាក់បានអះអាងថា ឥណ្ឌាមិនមានគម្រោងសងសឹកទៅវិញនោះទេ ប៉ុន្តែកំពុងរៀបចំកិច្ចពិភាក្សាជាមួយសហរដ្ឋអាមេរិកលើកិច្ចព្រមព្រៀងដែលអាចធ្វើទៅបាន។
ដោយឡែកនៅខាងអាស៊ីអាគ្នេយ៍វិញ អគ្គលេខាបក្សរបស់វៀតណាម To Lam បានសន្ទនាតាមទូរស័ព្ទជាមួយនឹងប្រធានាធិបតីអាម៉េរិក Donald Trump ដោយបានឯកភាពបន្តការចរចាដើម្បីដោះស្រាយបញ្ហាពាណិជ្ជកម្មដែលកំពុងកើតមាន និងសម្រេចបានលទ្ធផលដែលមានប្រយោជន៍សម្រាប់ភាគីទាំងពីរ។ បន្ថែមពីនេះ នាយករដ្ឋមន្ត្រីថៃ លោកស្រី Paetongtarn Shinawatra បានប្រគល់ភារកិច្ចឲ្យលោក Pichai Chunhavajira ដែលជាឧបនាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុ ហោះហើរទៅកាន់សហរដ្ឋអាម៉េរិក ដើម្បីចរចាពន្ធគយជាមួយនឹងប្រធានាធីបតី Donald Trump ។ ទន្ទឹមនឹងនេះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានចេញលិខិតផ្ញើទៅកាន់ប្រធានាធិបតីអាម៉េរិក Donald Trump ពាក់ព័ន្ធនឹងការស្នើចរចាការអនុវត្តពន្ធលើការនាំចេញរបស់កម្ពុជាទៅកាន់សហរដ្ឋអាមេរិក ជាមួយនឹងការប្តេជ្ញាចិត្តខ្ពស់ក្នុងការជំរុញការនាំចូលទំនិញពីសហរដ្ឋអាម៉េរិក និងការកាត់បន្ថយភ្លាមៗនូវអត្រាពន្ធនាំចូលទំនិញពីអាម៉េរិក ១៩ ប្រភេទពីអត្រាអតិបរមា ៣៥ ភាគរយមកត្រឹមអត្រា ៥ ភាគរយ។ លើសពីនេះ មានប្រទេសផ្សេងៗទៀតជាង ៥០ ប្រទេសក៏បានផ្ញើលិខិតជាបន្តបន្ទាប់ទៅកាន់សេតវិមាន ដើម្បីសុំធ្វើកិច្ចចរចាជាមួយនឹងអាម៉េរិកផងដែរ។
រដ្ឋមន្ត្រីក្រសួងពាណិជ្ជកម្មអាម៉េរិក Howard Lutnick បានលើកឡើងថា ទោះបីជាប្រធានាធិបតីកំពុងពន្យារពេលយកពន្ធគយ ដើម្បីអនុញ្ញាតឱ្យប្រទេសផ្សេងៗចរចាក៏ដោយ ប៉ុន្តែរដ្ឋបាលគ្រោងនឹងអនុវត្តការយកពន្ធតាមការកំណត់ដែលនឹងចូលជាធរមាននៅថ្ងៃពុធ សប្ដាហ៍នេះ។ ទន្ទឹមនឹងនេះដែរ Trump កំពុងទទួលបានការហៅទូរស័ព្ទពីនាយកប្រតិបត្តិបច្ចេកវិទ្យាមួយចំនួន និងមេដឹកនាំពិភពលោកពាក់ព័ន្ធនឹងពន្ធគយ។ Trump លើកឡើងថា លោកបានសន្ទនាជាមួយប្រទេសជាច្រើន ហើយលោកបើកចំហចំពោះការចរចាប្រសិនបើប្រទេសនានាដោះស្រាយឱនភាពពាណិជ្ជកម្មរបស់ពួកគេជាមួយសហរដ្ឋអាម៉េរិក។
យ៉ាងណាមិញ ទីផ្សារកំពុងមានការព្រួយបារម្ភ ដោយសារពន្ធកំពុងបង្កភាពចលាចលខ្លាំងក្លាដល់ភាគហ៊ុនអាម៉េរិកជាលើកដំបូងគិតចាប់តាំងពីវិបត្តិកូវីដ-១៩ កាលពី ៥ ឆ្នាំមុន។ S&P 1500 Composite Index ដែលជាទីផ្សារហ៊ុនធំមួយនៅក្នុងទីផ្សារសហរដ្ឋអាមេរិក បានបាត់បង់តម្លៃជិត ៦ ទ្រីលានដុល្លារក្នុងរយៈពេល ២ថ្ងៃ បន្ទាប់ពីការប្រកាសពន្ធរបស់ Trump ៕
Account
Security
Favourite Content