សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅដើមឆ្នាំ២០២៥នេះ តម្រូវការសម្ភារៈសំណង់នៅក្នុងប្រទេសកម្ពុជា ត្រូវបានកត់សម្គាល់ឃើញថាមាននិន្នាការកើនឡើងវិញបន្តិចបើធៀបទៅនឹងឆ្នាំ២០២៤កន្លងទៅ ជាពិសេសនៅក្នុងតំបន់សេដ្ឋកិច្ចពិសេស និងនៅតាមតំបន់ជាប់ព្រំដែនកម្ពុជា ។ នេះបើតាមការលើកឡើងរបស់អ្នកពាក់ព័ន្ធក្នុងវិស័យសាងសង់អ្នកលក់សម្ភារៈសំណង់ក្នុងប្រទេសកម្ពុជា ។
លោក ចាន់ ថាណា អ្នកម៉ៅការសំណង់មួយរូបនៅក្នុងរាជធានីភ្នំពេញ បានថ្លែងដោយសុំមិនបញ្ចេញមុខឱ្យដឹងថា នៅដើមឆ្នាំ២០២៥នេះ តាមដេប៉ូលក់សម្ភារៈសំណង់មួយចំនួនបានដំឡើងតម្លៃ លើសម្ភារៈមួយចំនួន ដូចជា ឥដ្ឋ ដែក និងការូ និងសម្ភារៈផ្សេងទៀត ព្រោះនៅដើមឆ្នាំ២០២៥នេះ តម្រូវការសម្ភារៈសំណង់មានការកើនឡើង ហើយបើនៅតាមតំបន់ជាប់ព្រំដែនកាន់តែកើនឡើង ដូចជានៅប៉ោយប៉ែត, បាវិត និងក្នុងតំបន់សេដ្ឋកិច្ចពិសេសតាមបណ្ដាខេត្តមួយចំនួន ។
លោក ពុត ចិន្ដារឹទ្ធ អគ្គលេខាធិការសមាគមឧស្សាហកម្មស៊ីម៉ង់ត៍កម្ពុជា បានថ្លែងប្រាប់ AMS តាមទូរសព្ទឱ្យដឹងថា នៅក្នុងឆ្នាំ២០២៥នេះ លោកមើលឃើញថា និន្នាការនៃការប្រើប្រាស់ស៊ីម៉ង់ត៍នៅក្នុងប្រទេសកម្ពុជាមានការកើនឡើង និងរំពឹងថាអាចនឹងកើនឡើងបន្ថែមទម្រាំដល់ដំណាច់ឆ្នាំ២០២៥ ។
លោកបន្តថា ៖
«ថ្វីត្បិតតែតម្រូវការស៊ីម៉ង់ត៍នៅក្នុងប្រទេស មានការកើនឡើងខ្ពស់ជាងឆ្នាំ២០២៤ក៏ដោយ ក៏អ្នកផលិតស៊ីម៉ង់ត៍មិនបានដំឡើងថ្លៃស៊ីម៉ង់ត៍នោះទេ ផ្ទុយទៅវិញពួកគាត់បានឯកភាព ក្នុងការបញ្ចុះតម្លៃបន្ថែមទៀត ប៉ុន្តែសម្រាប់ម្ចាស់ដេប៉ូ យកពីរោងចក្រទៅលក់បន្តក្នុងតម្លៃប៉ុន្មាននោះ គឺជារឿងរបស់គេ ដោយយើងមិនអាចកំណត់ថ្លៃលក់ដល់ម្ចាស់ដេប៉ូទាំងនោះទេ ។ បច្ចុប្បន្ននេះ កម្ពុជាអាចមានសមត្ថភាពក្នុងការផ្គត់ផ្គង់ស៊ីម៉ង់ត៍សម្រាប់បំពេញតម្រូវការដោយខ្លួនឯងប្រមាណជា៨៥ភាគរយហើយ និងបាននាំចូលពីខាងក្រៅប្រទេសតែប្រមាណ១៥ភាគរយទៀតប៉ុណ្ណោះមកបំពេញតម្រូវការ ហើយរំពឹងថានៅក្នុងអំឡុងឆ្នាំ២០២៦ ឬឆ្នាំ២០២៧ កម្ពុជាមានរោងចក្រផលិតស៊ីម៉ង់ត៍សម្រាប់ផ្គត់ផ្គង់ក្នុងស្រុកបានគ្រប់១០០ភាគរយ»។
លោកឧកញ៉ា ហួត ជា ម្ចាស់ក្រុមហ៊ុននាំចូល និងចែកចាយសម្ភារៈសំណង់ធំមួយនៅក្នុងប្រទេសកម្ពុជាក៏បានលើកឡើងផងដែរថា ក្នុងឆ្នាំ២០២៥នេះ លោកឧកញ៉ាមើលឃើញថា សម្ភារៈសំណង់អាចនឹងមានកំណើនកើនឡើងធៀបនឹងឆ្នាំ២០២៤ ជាពិសេសនៅតាមបណ្ដាខេត្តនានាជាប់ព្រំដែន ។
លោកឧកញ៉ាបន្តថា ៖
«ឆ្នាំ២០២៥នេះ ការផ្គត់ផ្គង់សម្ភារៈសំណង់សម្រាប់សាងសង់ផ្ទះដូចជាក្នុងបុរី ឬសំណង់មួយចំនួននៅភ្នំពេញមានការថមថយ ប៉ុន្តែមានកំណើនទៅលើការសាងសង់រោងចក្រ ឃ្លាំង និងសំណង់នៅតាមតំបន់ព្រំដែន» ។
អ្នកអភិវឌ្ឍន៍សំណង់ និងវិនិយោគក្នុងវិស័យអចលនទ្រព្យដ៏ធំមួយនៅក្នុងប្រទេសកម្ពុជា អ្នកឧកញ៉ា សៀ ឬទ្ធី បានលើកឡើងថា ឆ្នាំ២០២៥ ការវិនិយោគលើអគារខុនដូ និងផ្ទះក្នុងបុរី អាចនឹងមិនមានច្រើនដូចមុន ប៉ុន្តែការវិនិយោគលើរោងចក្រឧស្សាហកម្ម នឹងមានកំណើន ដូច្នេះហើយតម្រូវការឃ្លាំង សម្រាប់ស្តុកទំនិញ និងរោងចក្រនឹងមានកំណើន ជាពិសេសនៅតាមបណ្តាខេត្តដែលមានសក្ដានុពលសំខាន់ៗដូចជា ខេត្តស្វាយរៀង កំពង់ស្ពឺ ព្រះសីហនុ ជាពិសេសនៅក្នុងតំបន់សេដ្ឋកិច្ចពិសេស៕
Account
Security
Favourite Content