ភ្នំពេញ ៖ ក្នុងគោលបំណងចូលរួមលើកកម្ពស់ និងជំរុញទីផ្សារវិស័យអចលនទ្រព្យឱ្យកាន់តែមានភាពរីកចម្រើន និងមមាញឹកជាងពេលបច្ចុប្បន្ន រាជរដ្ឋាភិបាលបានសម្រេចបន្តពន្យារពេលក្នុងការអនុវត្ត​ពន្ធ​លើ​ចំណេញមូលធន​រហូតដល់ថ្ងៃទី០១ ខែមករា ឆ្នាំ២០២៧ ខាងមុខនេះ ។

យោងតាមសេចក្ដីជូនដំណឹង​របស់​អគ្គនាយកដ្ឋានពន្ធដារ​នៃក្រសួង​សេដ្ឋកិច្ច​​ និងហិរញ្ញវត្ថុ នៅដើមខែមករា ឆ្នាំ២០២៦​នេះបានឱ្យដឹងថា​ អនុលោម​តាមចំណារ​ឯកភាពដ៏ខ្ពង់​ខ្ពស់​របស់សម្ដេច​មហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ចុះថ្ងៃទី ២៤ ខែធ្នូ ឆ្នាំ២០២៥ លើលិខិត​លេខ ​១២៧៩២ ស ហ វ ​ចុះថ្ងៃទី២៤ ខែធ្នូ ឆ្នាំ២០២៥ របស់ក្រសួងសេដ្ឋកិច្ច​ និងហិរញ្ញវត្ថុ រាជរដ្ឋាភិបាលបានសម្រេចពន្យារពេល​អនុវត្ត​ពន្ធលើ​ចំណេញមូលធន​ផ្នែកអចលនទ្រព្យ​រយៈពេល១ឆ្នាំទៀត ។ ដូច្នេះ ពន្ធលើ​ចំណេញ​មូល​ធនដែល​សម្រេច​បានពីការលក់​ ឬផ្ទេរ​អចលនទ្រព្យ​ ត្រូវ​អនុវត្ត​ចាប់ពីថ្ងៃទី០១ ខែមករា ឆ្នាំ២០២៧ តទៅ ។​

តាមសេចក្ដីជូន​ដំណឹងដដែលបាន​បញ្ជាក់ថា ពន្ធលើ​ចំណេញមូលធន​ដែលសម្រេច​បានពីការ​លក់ ឬផ្ទេរ​ ភតិសន្យា ទ្រព្យវិនិយោគ​ កេរ្តិ៍ឈ្មោះ​អាជីវកម្ម កម្មសិទ្ធិ​បញ្ញា និងរូបិយបណ្ណបរទេស​ ត្រូ​វចាប់​អនុវត្ត​លើ​ចំណេញមូលធន​ដែល​កើតមាន​ឡើង​ចាប់ពីថ្ងៃទី​០១ ខែមករា ឆ្នាំ២០២៦ នេះ​ទៅ ។​

អ្នកជំនាញអចលនទ្រព្យ​បានលើកឡើងថា​ ស្ថានភាពវិស័យអចលនទ្រព្យ​នៅកម្ពុជា​នាពេល​បច្ចុប្បន្ន​នេះ នៅតែមិនទាន់មានភាពល្អប្រសើរ​នៅឡើយ ដោយ​បន្តជួបបញ្ហាប្រឈម​​ទាំងកត្តាខាងក្នុង ​និងខាងក្រៅ​ ដូច្នេះ សេចក្ដីសម្រេចពន្យារការអនុវត្តពន្ធលើ​ចំណេញមូលធន​គឺជា​រឿង​សមស្រ​បមួយ ។

អ្នក​ឧកញ៉ា​បណ្ឌិត​ សំ សុខនឿន ​ប្រធាន​សម្ព័ន្ធ​ក្រុមហ៊ុន SAM SN Group និង​ជា​អ្នក​ជំនាញ​ផ្នែក​អចលនទ្រព្យ​នៅកម្ពុជាមួយរូបបាន​លើកឡើងថា ក្នុងរយៈពេលប៉ុន្មានឆ្នាំចុងក្រោយនេះ វិស័យ​អចលនទ្រព្យកម្ពុជា​ស្ថិតនៅក្នុងស្ថានភាពមិនល្អ​ប្រសើរ​នៅឡើយទេ ដោយសេដ្ឋកិច្ច​នៅមានភាពមិនប្រាកដ​ប្រជា​ និងធ្វើ​ឱ្យវិស័យអចលនទ្រព្យ​បន្តនៅទ្រឹង​ ខណៈចលនា​នៃការទិញ-លក់ អចលនទ្រព្យនៅកម្ពុជា​ក៏មានចំនួនតិចតួច​ ។​

អ្នកឧកញ៉ា​បន្តថា​ បើសិនជា​រាជរដ្ឋាភិបាល​ចាប់ផ្ដើមប្រមូលពន្ធនៅពេលនេះ វាគឺជា​សម្ពាធមួយរបស់អ្នកប្រកបរបរ​ក្នុងវិស័យអចលនទ្រព្យ ពីព្រោះថា​ពេលនេះ​ពួកគាត់​ពិបាក​លក់​ចេញទៅហើយ ហើយបើសិនជា​គាត់លក់​ចេញហើយ គាត់ត្រូវបង់ពន្ធ២០ភាគរយ​ទៀត​លើ​ប្រាក់​ចំណេញ នោះនឹង​តម្រូវឱ្យគាត់ត្រូវលក់​ថ្លៃជា​ងមុន​ ដែលរឹតតែពិបាកលក់​ថែមទៀត ។​

អ្នកឧកញ៉ា​បន្ថែមថា ការ​ពន្យា​រពេល​អនុវត្ត​ពន្ធលើ​ចំណេញមូលធន​ពីសំណាក់រាជរដ្ឋាភិបាល គឺជា​រឿង​ល្អ ហើយ​រាជរដ្ឋាភិបាលក៏បានមើលឃើញជាក់ស្ដែង​ថា​ វិស័យអចលនទ្រព្យកម្ពុជា​នៅមិនទាន់មានភាពល្អ​ប្រសើរ​ទេ ដូច្នេះការពន្យារពេលនេះ គឺជាការទុកឱកាស​ឱ្យអ្នក​ប្រកបរប​រ​ក្នុងវិស័យអចលនទ្រព្យអាច​មានពេលវេលា​សមរម្យ​ក្នុងត្រៀមខ្លួន​នៅឆ្នាំ​ក្រោយ ។

ក្នុងឱកាសនេះផងដែរ អ្នកឧកញ៉ាក៏បានស្នើសុំរាជរដ្ឋាភិបាល​គួរតែចាប់ផ្ដើមប្រមូលពន្ធលើ​ចំណេញមូល​ធន​ក្នុងវិស័យអចលនទ្រព្យនៅពេល​ណាដែល​វិស័យ​នេះ​ចាប់ផ្ដើម​មានសន្ទុះឡើង​វិញ មានការទិញ-លក់​ច្រើន​ និងមានកា​រវិនិយោគ​ច្រើនទាំងមានប្រភពពីក្នុង និងប្រភពទុនវិនិយោគមកពីខាងក្រៅប្រទេស​៕