សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ថ្វីត្បិតតែវិស័យអចលនទ្រព្យនៅមិនទាន់មានភាពល្អប្រសើរដូចកាលមុនកូវីដ១៩ក៏ពិតមែន ប៉ុន្តែវិនិយោគិនទាំងក្នុង និងក្រៅប្រទេសនៅតែស្វែងរកឱកាសក្នុងការបណ្ដាក់ទុនលើវិស័យនេះដើម្បីរកប្រាក់ចំណេញរបស់ខ្លួនដដែល ។ ទន្ទឹមនឹងនេះអ្នកជំនាញអចលនទ្រព្យអន្តរជាតិបានបង្ហាញពីទិសដៅវិនិយោគរបស់វិនិយោគិនបរទេសដែលអ្នកវិនិយោគក្នុងស្រុកគួរយល់ដឹង ។
លោក វ៉ា វីរៈ អ្នកជំនាញអចលនទ្រព្យអន្តរជាតិបានមានប្រសាសន៍ឱ្យដឹងថា ភ្នំពេញនៅតែជាទិសដៅវិនិយោគដ៏មានសក្ដានុពលសម្រាប់វិនិយោគិន ហើយក្រៅពីនេះ តំបន់ជុំវិញរាជធានីភ្នំពេញដូចជាខេត្តកណ្ដាល ខេត្តកំពង់ស្ពឺ ជាដើម ខណៈដែលនៅរាជធានីភ្នំពេញ ត្រូវបានចាត់ទុកជាតំបន់ពាណិជ្ជកម្ម ដែលភាគច្រើនសម្រាប់អគារខ្ពស់ ផ្សារទំនើបតូចធំ និងអគារការិយាល័យជាដើម។
លោកបន្តថា ៖
«សម្រាប់តំបន់នៅក្បែរៗភ្នំពេញ ឬតំបន់ជាយក្រុងភ្នំពេញ ត្រូវបានចាត់ទុកជាតំបន់ឧស្សាហកម្ម ដែលក្នុងនោះយើងឃើញមានដូចជារោងចក្រ ឃ្លាំងស្តុកទំនិញ ។ តំបន់ទាំងនេះ អ្នកវិនិយោគអាចជ្រើសរើសទៅតាមគោលដៅនៃការវិនិយោគរបស់ខ្លួន ។ ក្រៅពីនេះ កម្ពុជាក៏មានតំបន់សមុទ្រដែលរួមមានខេត្តព្រះសីហនុ ខេត្តកោះកុង កំពត និងកែប ។ តំបន់សមុទ្រក៏ត្រូវបានបែកចែកជាតំបន់ឧស្សាហកកម្ម និងតំបន់ពាណិជ្ជកម្មផងដែរ ។ តំបន់សមុទ្រក៏មានការវិនិយោគច្រើនផងដែរទៅលើផ្នែកបដិសណ្ឋារកិច្ច ដូចជាសណ្ឋាគារ ភោជនីយដ្ឋាន អាហារដ្ឋានដែរ »។
លោក វ៉ា វីរៈ បានបញ្ជាក់ថា អ្នកវិនិយោគបរទេសក៏អាចជ្រើសរើសផងដែរនៅតំបន់តាមព្រំដែន ដែលកំពុងមានសក្ដានុពល ហើយតម្លៃដីនៅតាមតំបន់ព្រំដែនក៏នៅមានតម្លៃទាបជាងតំបន់សក្ដានុពលមួយចំនួនដែរ ។ ដូច្នេះអ្នកវិនិយោគអាចជ្រើសរើសយកការវិនិយោគនៅទីតាំងណាដែលខ្លួនគិតថាសមនឹងគោលដៅរបស់ខ្លួន ។
លោកបញ្ជាក់ថា ក្រៅពីតំបន់ទាំងអស់នេះ កម្ពុជាក៏មានតំបន់មួយទៀតដែលមានសក្ដានុពលក្នុងការវិនិយោគលើកសិកម្ម ដូចជាបណ្ដាខេត្តក្នុងតំបន់ទំនាបកណ្ដាល ដូចជាសៀមរាប កំពង់ធំ កំពង់ឆ្នាំង ពោធិ៍សាត់ បាត់ដំបង និងខេត្តជាច្រើន ដែលអ្នកវិនិយោគបរទេសអាចដាក់ទុនវិនិយោគ លើកសិកម្ម ហើយនាំចេញទៅកាន់ទីផ្សារអន្តរជាតិក៏ដូចជាទីផ្សារនៃប្រទសរបស់ខ្លួនវិញ ។
កាលពីប៉ុន្មានថ្ងៃមុននេះ មានក្រុមហ៊ុនចិនដ៏ធំមួយបានសិក្សាពីសក្ដានុពល និងជម្រាបជូនមន្ត្រីជាន់ខ្ពស់កម្ពុជា អំពីតម្រូវការដីរាប់ម៉ឺនហិកតា ដើម្បីវិនិយោគលើវិស័យកសិកម្ម ប៉ុន្តែកម្ពុជាទំនងជាមិនមានដីធំសម្រាប់ផ្ដល់ជូនតែមួយកន្លែងនោះទេ ដូច្នេះអ្នកវិនិយោគអាចស្វែងរកទីតាំងដីផ្សេងៗគ្នាដើម្បីធ្វើការវិនិយោគលើគម្រោងរបស់ខ្លួន ។
ដោយឡែកតាមចក្ខុវិស័យរបស់ក្រុមហ៊ុនអចលនទ្រព្យខ្នាតយក្សមួយនៅកម្ពុជា ព្រីសន៍រៀលអ៊ីស្ទេតបានបង្ហាញពីចក្ខុវិស័យវិនិយោគរបស់ខ្លួនថា បច្ចុប្បន្នក្រុមហ៊ុននេះ បានយករាជធានីភ្នំពេញជាគោលដៅវិនិយោគធំ ហើយខេត្តចំនួនពីរទៀតរួមមានខេត្ត ព្រះសីហនុ និងខេត្តសៀមរាប គឺជាស្លាបនៃគម្រោងធំៗរបស់ខ្លួន ដោយចប្ចុប្បន្ននេះ ក្រុមហ៊ុនក៏ចាប់ផ្ដើមអនុវត្តន៍គម្រោងជាបន្តបន្ទាប់នៅតាមបណ្ដាខេត្តទាំងនោះផងដែរ ៕
Account
Security
Favourite Content