សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្ថិតក្នុងវិបត្តិសាកលលោកដែលបណ្តាលមកពីសង្គ្រាមរវាងរុស្ស៊ី និងអ៊ុយក្រែន ក៏ដូចជាវិបត្តិកូវីដ១៩ បានធ្វើឱ្យប៉ះពាល់ដល់សេដ្ឋកិច្ចប្រទេសជាច្រើនដោយក្នុងនោះក៏មានកម្ពុជាផងដែរ ខណៈដែលវិស័យអចលនទ្រព្យដែលជាវិស័យស្នូលក្នុងការជំរុញកំណើនសេដ្ឋកិច្ចក៏បានប៉ះពាល់ដែរ។ ប៉ុន្តែយ៉ាងណាក្ដី តាមការកត់សម្គាល់ ក្នុងអំឡុងពេលមានវិបត្តិ តម្លៃដីធ្លីនៅក្នុងក្រុងភ្នំពេញ ហាក់មានការថមថយបន្តិច ដែលផ្ទុយពីតម្លៃដីនៅតាមតំបន់ជាយក្រុងបែរជាឡើងថ្លៃគួរឱ្យកត់សម្គាល់។
លោកឧកញ៉ា សំ សុខនឿន អគ្គនាយកក្រុមហ៊ុនអចលនទ្រព្យ KW Sam SN បានមានប្រសាសន៍ឱ្យដឹងថា ជាការពិតណាស់ សកម្មភាពនៃការទិញលក់អចលនទ្រព្យក្នុងប្រទេសកម្ពុជាបានធ្លាក់ចុះពិតមែន ប៉ុន្តែជាទូទៅតម្លៃអចលនទ្រព្យមិនមានការធ្លាក់ចុះទេ។ មានលក្ខខ័ណ្ឌមួយដែលធ្វើឱ្យតម្លៃអចលនទ្រព្យនៅទីតាំងមួយចំនួនមើលទៅដូចជាធ្លាក់ចុះ គឺអ្នកដែលកុនលុយត្រូវការទុនបង្វិលបន្ទាន់បានលក់អចលនទ្រព្យរបស់ខ្លួនក្នុងតម្លៃទាបជាងទីផ្សារ ២០ភាគរយ ទៅ ២៥ភាគរយ ឬ ៣០ភាគរយ ហើយអាចឈានដល់៥០ភាគរយក្នុងករណីអចលនទ្រព្យរបស់ពួកគាត់មិនមានតម្រូវការប្រើប្រាស់។
លោកឧកញ៉ាបន្តថា ៖
“បើក្រលេកទៅមើលទីផ្សារអចលនទ្រព្យ ជាពិសេសដីធ្លីនៅកណ្ដាលក្រុងភ្នំពេញ សម្រាប់អ្នកដែលចង់លក់ដីធ្លីគឺពួកគាត់ត្រូវលក់ក្រោមទីផ្សារដើម្បីឱ្យលក់ដាច់ ប៉ុន្តែបើក្រលេកទៅមើលតំបន់នៅជាយក្រុងភ្នំពេញ ដូចជាតំបន់អរិយក្សត្រជាដើម អត់មានអ្នកលក់ក្រោមទីផ្សារទេ ផ្ទុយទៅវិញតម្លៃដីមានបន្តកើនឡើងជាងមុន។ ឧទាហរណ៍ថាពីមុនតម្លៃ៣០ដុល្លារអាមេរិកក្នុងមួយម៉ែត្រការ៉េ ឥឡូវនេះអាចហក់ឡើងដល់ទៅ៥០ដុល្លារអាមេរិកក្នុងមួយម៉ែត្រការ៉េ។”
លោកឧកញ៉ាបន្ថែមថា ៖
“តំបន់ជាយក្រុងមួយចំនួនជាក់ស្ដែងអរិយក្សត្រដូចដែលបានលើកឡើង គឺជាតំបន់ដែលមានការអភិវឌ្ឍថ្មី មានគម្រោងសាងសង់ស្ពាន ជាតំបន់ដែលបង្កើតក្រុងថ្មី និងមានការចាប់អារម្មណ៍ខ្លាំងពីសំណាក់វិនិយោគិនក្នុងនិងក្រៅប្រទេស ដូច្នេះហើយតម្រូវការនៃប្រើប្រាស់ដីនៅតំបន់នោះ មានការកើនឡើងខ្ពស់ ដែលធ្វើឱ្យតម្លៃអចលនទ្រព្យកើនឡើងខ្ពស់ជាងពីមុន។”
គួរកត់សម្គាល់ថា តំបន់ជាយក្រុងមួយរយៈចុងក្រោយនេះ មានការអភិវឌ្ឍលើហេដ្ឋារចនាសម្ព័ន្ធច្រើន ដែលធ្វើឱ្យតំបន់កណ្ដាលក្រុងកាន់តែខិតជិតតំបន់ជាយក្រុង ធ្វើឱ្យប្រជាពលរដ្ឋរស់នៅកណ្ដាលក្រុងងាកទៅរស់នៅតំបន់ជាយក្រុងកាន់តែច្រើនមុន និងធ្វើការអភិវឌ្ឍនៅតំបន់ជាយក្រុងកាន់តែមមាញឹកជាងមុនបើទោះបីជាកម្ពុជាបានជួបប្រទះនឹងវិបត្តិនានាក្ដី ៕
Account
Security
Favourite Content