សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្លង់ដី (ប្លង់រឹង )ជាក្រដាសរឹងសម្គាល់ម្ចាស់កម្មសិទ្ធិអចលនវត្ថុដែលត្រូវរក្សាទុកយ៉ាងគត់មុត ប៉ុន្តែក្នុងករណីបាត់ប្លង់ដីដោយប្រការណាមួយ ដូចជា ករណីអគ្គីភ័យ ឬច្រលំដៃបាត់ដោយជាយថាហេតុ ម្ចាស់កម្មសិទ្ធិក៏អាចដាក់ពាក្យស្នើសុំធ្វើប្លង់ដីនោះឡើងវិញបានដែរ តែក្នុងប្លង់ដីថ្មីនោះ ត្រូវបញ្ជាក់ថា «ទុតិយតា» ។ ដើម្បីអាចធ្វើប្លង់ថ្មីបាន ម្ចាស់កម្មសិទ្ធិត្រូវអនុវត្តទៅតាមនីតិវិធីមួយចំនួន ដោយដំបូងឡើយ ម្ចាស់កម្មសិទ្ធិប្លង់នោះ ត្រូវដាក់ពាក្យបណ្ដឹងនៅប៉ុស្តិ៍នគរបាលនៃទីតាំងដែលបានបាត់ប្លង់ដី រួចហើយត្រូវចុះផ្សាយព័ត៌មាននៅទំព័រកាសែត ឬមធ្យោបាយសោទស្សន៍នានា អំពីដំណឹងបាត់ប្លង់ដីនោះ ។
បន្ទាប់ពីបានចុះផ្សាយព័ត៌មានរួចរាល់ ត្រូវយកឯកសារទាំងអស់ ទាំងពាក្យបណ្ដឹង និងកាសែត ឬឯកសារចុះផ្សាយព័ត៌មានទៅដាក់ពាក្យស្នើសុំធ្វើប្លង់ទុតិយតា នៅអង្គភាពច្រកចេញចូលតែមួយនៃសាលារាជធានី/ខេត្ត ដោយភ្ជាប់ជាមួយនឹងប្លង់ដីថតចម្លង អត្តសញ្ញាណប័ណ្ណថតចម្លង ។ បន្ទាប់មកអង្គភាពច្រកចេញចូលតែមួយនឹងបញ្ជូនសំណុំបែបបទពីម្ចាស់សំណើបង់កម្រៃសេវារដ្ឋបាលរួចរាល់ទៅមន្ទីររៀបចំដែនដី នគរូបនីយកម្ម និងសំណង់ និងសុរិយោដី ដើម្បីធ្វើចំណាត់ការបន្ត ។
បន្ទាប់ពីមន្ទីរដែនដី និងភូមិឃុំ/សង្កាត់ ក្រុង/ស្រុកបានបំពេញបែបបទរួចរាល់ រដ្ឋបាលរាជធានី/ខេត្ត នឹងប្រកាសបិទផ្សាយអំពីដំណឹងបាត់ប្លង់ដី និងការស្នើសុំធ្វើថ្មីរបស់ម្ចាស់សំណើចំនួនពីរលើក ហើយក្នុងករណីពុំមានការតវ៉ាណាមួយពីម្ចាស់កម្មសិទ្ធិដែលបានដាក់ស្នើ រដ្ឋបាលរាជធានី/ខេត្ត នឹងបញ្ជូនមកមន្ទីររៀបចំដែនដីវិញ ដើម្បីបោះពុម្ពប្លង់ដី «ទុតិយតា»។
គួរបញ្ជាក់ថា ប្លង់រឹង គឺជាក្រដាសសម្គាល់ម្ចាស់កម្មសិទ្ធិអចលនវត្ថុ ដែលមានន័យថា គឺជាបណ្ណសម្គាល់ដីធ្លី ឬអចលនវត្ថុនោះ បើដីគ្មានបណ្ណកម្មសិទ្ធិ ឬគ្មានប្លង់រឹងប្រៀបដូចជារថយន្តអត់មានបណ្ណសម្គាល់ ( កាតគ្រី ) ម៉ូតូអត់កាតគ្រី ហើយម្ចាស់ដីនោះ ក៏មិនអាចប្រើប្រាស់ដីដោយស្របច្បាប់ ឬបើត្រូវការទុនដើម្បីអភិវឌ្ឍលើដីនោះក៏ធនាគារពិបាកនឹងសិក្សា ឬផ្ដល់កម្ចីសម្រាប់អភិវឌ្ឍដែរ ។
សូមជម្រាបថា ក្នុងគោលបំណងបញ្ចប់បញ្ហាវិវាទដីធ្លីនៅក្នុងប្រទេសកម្ពុជា រាជរដ្ឋាភិបាលដែលមានក្រសួងរៀបចំដែនដី នគរូបនីយកម្ម និងសំណង់ ជាសេនាធិការ បានជំរុញឱ្យបញ្ចប់ការវាស់វែងដីលក្ខណៈជាប្រព័ន្ធនឹងចេញបណ្ណកម្មសិទ្ធិជូនពលរដ្ឋឱ្យបានគ្រប់ៗគ្នា។ ជាលទ្ធផល បច្ចុប្បន្ន នៅតាមបណ្ដាខេត្តមួយចំនួនក្នុងប្រទេសកម្ពុជាបានប្រកាសបញ្ចប់ការវាស់វែងដីជាបន្តបន្ទាប់ ហើយបើតាមរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា នៅចុងឆ្នាំនេះ ទូទាំងប្រទេសកម្ពុជានឹងបញ្ចប់ការវាស់វែងដីធ្លីជាប្រព័ន្ធ ប៉ុន្តែក្រុមការងារសុំពេលសម្អាតកិច្ចការមួយចំនួនតូចដែលនៅសេសសល់៕
Account
Security
Favourite Content