សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ កម្ពុជា បានរៀបចំវេទិកាធុរកិច្ចមួយក្នុងគោលបំណងផ្សព្វផ្សាយអំពីសក្តានុពល និងកាលានុវត្តភាពវិនិយោគនៅព្រះរាជាណាចក្រកម្ពុជា ជូនគណៈប្រតិភូក្រុមប្រឹក្សាធុរកិច្ចស្ត្រីនៃប្រទេសហ្វីលីពីន។ វេទិកាធុរកិច្ចកម្ពុជា-ហ្វីលីពីន នេះ បានត្រូវបារព្ធធ្វើនាព្រឹកថ្ងៃទី២២ ខែមករា ឆ្នាំ២០២៥ នៅសណ្ឋាគារ Hyatt Regency រាជធានីភ្នំពេញ។
ឯកឧត្តម សួន សុផល អគ្គលេខាធិការរងគណៈកម្មាធិការវិនិយោគកម្ពុជា បានថ្លែងអំណរគុណជូនចំពោះគណៈប្រតិភូហ្វីលីពីនដែលបានចំណាយពេលវេលាអញ្ជើញមកកាន់ព្រះរាជាណាចក្រកម្ពុជាដោយផ្ទាល់ដើម្បីស្វែងរកកាលានុវត្តភាពវិនិយោគ និងប្រកបធុរកិច្ច។
ជាមួយគ្នានេះ ឯកឧត្តមក៏បានគូសរំលេចអំពីបច្ចុប្បន្នភាពថ្មីនៃស្ថានភាពម៉ាក្រូសេដ្ឋកិច្ចប្រកបដោយថាមវន្តរបស់កម្ពុជា ដែលឆ្លុះបញ្ចាំងតាមរយៈកំណើននៃផលិតផលក្នុងស្រុកសរុបក្នុងអត្រា៦% កាលពីឆ្នាំ២០២៤, ស្ថិរភាពនៃអត្រាប្តូរប្រាក់ និងអតិផរណា, និងការកើនឡើងជាលំដាប់នៃគម្រោងវិនិយោគ។ ដោយឡែក ពាក់ព័ន្ធនឹងការកែលម្អហេដ្ឋារចនាសម្ព័ន្ធទន់ដែលគាំទ្រដល់បរិយាកាសវិនិយោគ រាជរដ្ឋាភិបាលបានខិតខំធ្វើឱ្យប្រសើរឡើងនូវគោលនយោបាយ, ច្បាប់ និងបទប្បញ្ញត្តិសំដៅធានាបាននូវភាពបើកចំហ, តម្លាភាព, អាចប៉ាន់ប្រមាណទុកជាមុនបាន និងអនុគ្រោះខ្ពស់សម្រាប់ទាក់ទាញវិនិយោគិនឱ្យមកបណ្តាក់ទុនវិនិយោគលើគ្រប់វិស័យដោយគ្មានការរើសអើង។ ជាក់ស្តែង វិស័យ និងសកម្មភាពវិនិយោគស្ទើរគ្រប់វិស័យបានទទួលការលើកទឹកចិត្តផ្នែកសារពើពន្ធ និងការលើកទឹកចិត្តផ្នែកមិនមែនសារពើពន្ធដូចមានចែងក្នុងច្បាប់ស្តីពីវិនិយោគ និងអនុក្រឹត្យស្តីពីការអនុវត្តច្បាប់ស្តីពីវិនិយោគ។
ឯកឧត្តមអគ្គលេខាធិការរងបានស្នើដល់វិនិយោគិន និងធុរជនហ្វីលីពីន ដែលមានវត្តមាននាឱកាសនេះ ចាប់យកសក្តានុពលដ៏សម្បូរបែប និងកាលានុវត្តភាពជាច្រើន ព្រមទាំងសម្រេចចិត្តជាយុទ្ធសាស្រ្តដើម្បីទាញយកអត្ថប្រយោជន៍ពីការវិនិយោគនៅកម្ពុជា។
សូមជម្រាបជូនផងដែរថា វេទិកាធុរកិច្ចខាងលើត្រូវបានសហការរៀបចំឡើងដោយមានការគាំទ្រពីក្រសួងពាណិជ្ជកម្មកម្ពុជា, ស្ថានទូតហ្វីលីពីនប្រចាំកម្ពុជា, សភាពាណិជ្ជកម្មកម្ពុជា និងសភាពាណិជ្ជកម្មហ្វីលីពីនប្រចាំកម្ពុជា ក្រោមការអញ្ជើញចូលរួមពីសំណាក់ភាគីពាក់ព័ន្ធសរុបប្រមាណ១៥០នាក់។
សូមជម្រាបដែរថា ៖ គណៈប្រតិភូក្រុមប្រឹក្សាធុរកិច្ចស្ត្រីហ្វីលីពីន បានមកទស្សនកិច្ចនៅកម្ពុជា ដើម្បីស្វែងយល់បន្ថែមពីឱកាសធ្វើធុរកិច្ច វិនិយោគ ក៏ដូចជាពង្រឹង និងពង្រីកកិច្ចសហប្រតិបត្តិការរវាងកម្ពុជា និងហ្វីលីពីន។ កាលពីពេលកន្លងទៅនេះ រដ្ឋាភិបាលនៃប្រទេសទាំងពីរបានឯកភាពគ្នាបង្កើន និងជំរុញកិច្ចសហប្រតិបត្តិការពាណិជ្ជកម្មរួមគ្នា ខណៈដែលកាលពីឆ្នាំ២០២៤ ហ្វីលីពីន បានទិញអង្ករកម្ពុជា ប្រមាណជិត ៣០០០តោន៕
Account
Security
Favourite Content