សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ កាលពីដើមខែវិច្ឆិកា ឆ្នាំ២០២៥ កន្លងមកនេះ ចិន បានប្រកាសដាក់ឲ្យប្រតិបត្តិការជាផ្លូវការនូវនាវាផ្ទុកយន្តហោះចម្បាំងមួយគ្រឿងមានឈ្មោះថា Fujian ដែលត្រូវបានអភិវឌ្ឍនៅក្នុងស្រុកលើកដំបូងគេបង្អស់របស់រដ្ឋាភិបាលក្រុងប៉េកាំង ខណៈដែលខ្លួនមាននាវាផ្ទុកយន្តហោះចម្បាំងខ្នាតធំចំនួន ២ រួចទៅហើយ ពោលគឺបូកបន្ថែមទាំង Fujian មួយទៀតមានចំនួន៣គ្រឿង
សម្រាប់នាវាផ្ទុកយន្តហោះចម្បាំងរបស់ចិន ទី១ Liaoning ជានាវាដែលទទួលបានពីអ៊ុយក្រែន និងជាសំណង់នាវាដែលផលិតឡើងដោយកងកម្លាំងនៃសហភាពសូវៀត ប៉ុន្តែមិនទទួលបានជោគជ័យ ហើយក៏ត្រូវធ្លាក់ទៅក្នុងដៃរដ្ឋាភិបាលទីក្រុងគៀវមុនពេលលក់ទៅឲ្យប្រទេសចិន។
នាវាផ្ទុកយន្តហោះចម្បាំងទី២ របស់ចិនមានឈ្មោះថា Shandong ត្រូវបានផលិតឡើងនៅក្នុងប្រទេសចិនក៏ពិតមែន ប៉ុន្តែវាត្រូវបានយកគំរូស្ទើតែទាំងស្រុងទៅលើការរចនាម៉ូត និងបច្ចេកវិទ្យារបស់ Liaoning ។
ដោយឡែក នាវាផ្ទុកយន្តហោះចម្បាំងទី៣ មានឈ្មោះ Fujian ទាំងការរចនាម៉ូត រូបរាង និងបច្ចេកវិទ្យា ភាគច្រើនត្រូវបានបង្កើតឡើងដោយចិនខ្លួនឯងផ្ទាល់ ហើយថែមទាំងមានភាពទំនើបជាងនាវាទាំង២ជំនាន់ខាងលើនោះទៀត។ វាគឺជានាវាដំបូងដែលមានបំពាក់បច្ចេកវិទ្យា catapult launch system ជាប្រព័ន្ធជំរុញការបាញ់បង្ហោះ(មីស៊ីល)កាន់តែលឿនចេញពីនាវាចម្បាំង ខណៈដែលជាទូទៅទាំងយន្តហោះចម្បាំង ឬឧបករណ៍យោធានានានឹងត្រូវប្រើប្រាស់ថាមពលរបស់ខ្លួនឯងដើម្បីហោះចេញពីនាវាបាន។ នេះមានន័យថា ទ័ពជើងទឹកចិន អាចធ្វើប្រតិបត្តិការផ្លូវទឹកជាមួយសព្វាវុធធុនធ្ងន់ៗ ព្រមទាំងយន្តហោះចម្បាំងដែលមានបំពាក់គ្រាប់គ្រប់ប្រភេទក្នុងការបំពេញភារៈកិច្ច ព្រមទាំងមុខងារទំនើបផ្សេងទៀត ដូចជា ការបញ្ជូនសញ្ញាព្រមានយ៉ាងច្បាស់ ជាពិសេស ការគ្រប់គ្រងយន្តហោះចម្បាំងពីចំងាយ។
បន្ថែមពីលើនេះ នាវាផ្ទុកយន្តហោះចម្បាំងជំនាន់ទី៣របស់ចិននេះ អាចផ្ទុកទំងន់សរុបបានទៅដល់ ៨ម៉ឺនតោន ពោល គឺក្រោមតែនាវារបស់អាម៉េរិកចំនួន ២ ប៉ុណ្ណោះ គឺ Nimitz និង Ford-class។
សូមជម្រាបដែរថា នាវាផ្ទុកយន្តហោះចម្បាំងទាំង ៣ គ្រឿងរបស់ចិន គឺយកឈ្មោះតាមខេត្តជាប់មាត់សមុទ្រទាំង៣ របស់ខ្លួន ហើយរហូតដល់បច្ចុប្បន្ននេះ ចិនបានក្លាយទៅជាប្រទេសដែលមាននាវាផ្ទុកយន្តហោះចម្បាំងច្រើនជាងគេបំផុតបន្ទាប់ពីអាមេរិកដែលមានរហូតទៅដល់១១គ្រឿង ខណៈដែលឥណ្ឌា អង់គ្លេស និងអ៊ីតាលី មានចំនួន២គ្រឿងដូចគ្នា។
យ៉ាងណាក៏ដោយ សម្រាប់ចំនួនយន្តហោះចម្បាំងដែល Fujian អាចផ្ទុកបាន គឺមិនត្រូវបង្ហាញព័ត៌មានច្បាស់លាស់នោះទេ ប៉ុន្តែអ្នកជំនាញយោធាអាចប៉ាន់ស្មានបានថា យ៉ាងហោចណាស់អាចផ្ទុកបានចន្លោះពី ៤០ ទៅ ៦០គ្រឿង ខណៈនាវារបស់អាម៉េរិកអាចផ្ទុកបានចន្លោះពី៦០ទៅ៧០គ្រឿង៕
Account
Security
Favourite Content