បរទេស ៖ អាល្លឺម៉ង់ ដែលជាប្រទេសមានសេដ្ឋកិច្ចខ្ពស់ដល់ទៅ ៤,៧៥ទ្រីលានដុល្លារជារៀងរាល់ឆ្នាំ ប៉ុន្តែជួបភាពអវិជ្ជមានជាប់គ្នាដល់ទៅ២ឆ្នាំនោះក៏បានត្រឡប់ងាកទៅជឿជាក់ថា ការបង្កើនការវិនិយោគនៅក្នុងវិស័យយោធាដែលផ្អែកលើបច្ចេកវិទ្យាពិតជានឹងអាចជួយស្តារសេដ្ឋកិច្ចរបស់ខ្លួនបាននាពេលអនាគត

ដោយឡែក ងាកទៅសង្គ្រាមនៅអ៊ុយក្រែនបានផ្លាស់ប្តូរអ្វីៗជាច្រើននៅក្នុងឧស្សាហកម្មពាក់ព័ន្ធទៅនឹងសព្វាវុធ ជាក់ស្តែង សម្រាប់ឆ្នាំ២០២៥នេះ អឺរ៉ុបទាំងមូលត្រូវបានគេមើលឃើញថា បានបញ្ចេញខ្ទង់ចំណាយដ៏ធំសម្បើម ពោល គឺជាលើកដំបូងក្នុងរយៈពេលប៉ុន្មានទសវត្សរ៍ចុងក្រោយក្នុងទំហំច្រើនជាងអ្វីដែលជាផែនការការពារជាតិប្រចាំឆ្នាំរបស់សហរដ្ឋអាម៉េរិកទៅទៀត។

ក្រុមការងារ៉យទ័របានធ្វើការសំភាសជាមួយនឹងប្រធានក្រុមហ៊ុននានាបូករួមទាំងក្រុមអ្នកវិនិយោគ និងក្រុមអ្នកនយោបាយសំខាន់ៗជាច្រើនដើម្បីពិនិត្យលំអិតទៅលើផែនការការពារជាតិរបស់អឺរ៉ុបដែលក្នុងនោះផ្តោតសំខាន់ទៅលើប្រទេសអាល្លឺម៉ង់ដែលជាប្រទេសមានសេដ្ឋកិច្ចធំជាងគេបំផុតរបស់តំបន់ ថាតើពួកគេនឹងរៀបចំយុទ្ធសាស្ត្របែបណាខ្លះក្នុងការបង្កើនសមត្ថភាពយោធារបស់ទ្វីបនេះឡើងវិញ។

ប្រភពដដែលបានសរសេរថា អធិកាបតីអាល្លឺម៉ង់ លោក Fredrich Merz និងរដ្ឋាភិបាលរបស់លោកបច្ចុប្បន្នបានបង្ហាញនូវទស្សនៈ និងការមើលឃើញរបស់ខ្លួនថា បច្ចេកវិទ្យា AI និងរបកគំហើញរបស់ក្រុមហ៊ុន Startup ថ្មីៗគឺជាស្នូលនៃការរៀបចំផែនការក្នុងកសាងវិស័យការពារជាតិនៅពេលនេះ។

ក្រុមហ៊ុនចាស់ ថ្មី ព្រមទាំងប្រភេទក្រុមហ៊ុន Startup ដែលមានការពាក់ព័ន្ធទៅនឹងវិស័យអភិវឌ្ឍបច្ចេកវិទ្យាអាវុធត្រូវបានគេសង្កេតឃើញថា សុទ្ធតែមានកំណើនប្រាក់ចំណូលយ៉ាងខ្លាំងដូចគ្នាក្នុងរយៈពេលចុងក្រោយនេះ។ មួយក្នុងចំណោមនោះ ជាឧទាហរណ៍ស្រាប់ Helsing ដែលជាក្រុមហ៊ុនមានមូលដ្ឋាននៅក្នុងទីក្រុងមុយនិច និងទើបតែបានចាប់ផ្តើមអាជីវកម្មរបស់ខ្លួនបាន៤ឆ្នាំប៉ុណ្ណោះនៅក្នុងវិស័យផលិតបច្ចេកវិទ្យាអាវុធ ប៉ុន្តែបានទទួលកំណើនទីផ្សារក្នុងទំហំដល់ទៅ ១២ពាន់លានដុល្លាររួចទៅហើយគិតត្រឹមខែមិថុនាកន្លងទៅនេះ។

Helsing គឺជាចំណែកមួយនៃការប្រែប្រួលដ៏ធំនៃបច្ចេកវិទ្យាទំនើបនៅក្នុងវិស័យផលិតអាវុធរបស់ប្រទេសអាល្លឺម៉ង់ចាប់រាប់តាំងពីរថក្រោះបញ្ជាដោយបច្ចេកវិទ្យា AI នាវាមុជទឹកខ្នាតតូចគ្មានមនុស្សបើក ទៅដល់រ៉ូប៉ូតខ្នាតតូចបំផុតដែលមានទំហំប៉ុនសត្វកន្លាត ដែលអាចលួចយកការណ៍ និងអាចប្រយុទ្ធបានទៀតផង។

ដូចដែលគ្រប់គ្នាបានមើលឃើញហើយថា ពិភពលោកនៅក្នុងរយៈពេលជាច្រើនទសវត្សរ៍មកនេះ បច្ចេកវិទ្យានៅក្នុងវិស័យការពារជាតិបានក្លាយទៅជាខឿនដ៏សំខាន់មួយនៅក្នុងការបង្កើនកំណើនសេដ្ឋកិច្ច។បច្ចេកវិទ្យា ដូចជា ប្រព័ន្ធអ៊ិនធឺណេត, GPS បន្ទះឈីប និងម៉ាស៊ីនយន្តហោះជាដើម បានវិវត្តន៍ស្ទើរមិនគួរឱ្យជឿ រហូតមានបច្ចេកវិទ្យាបានប៉ះពាល់ដល់ជីវភាពរស់នៅរបស់មនុស្សទៀតផង (ប្រើរ៉ូបូតធ្វើការជំនួសមនុស្ស)។

អាល្លឺម៉ង់ ដែលជាប្រទេសមានសេដ្ឋកិច្ចខ្ពស់ដល់ទៅ ៤,៧៥ទ្រីលានដុល្លារជារៀងរាល់ឆ្នាំ ប៉ុន្តែជួបភាពអវិជ្ជមានជាប់គ្នាដល់ទៅ២ឆ្នាំនោះក៏បានត្រឡប់ងាកទៅជឿជាក់ថា ការបង្កើនការវិនិយោគនៅក្នុងវិស័យយោធាដែលផ្អែកលើបច្ចេកវិទ្យាពិតជានឹងអាចជួយស្តារសេដ្ឋកិច្ចរបស់ខ្លួនបាននាពេលអនាគត៕