ភាពមានចំណង់ចំណូលចិត្តដើរកម្សាន្តតាមព្រៃភ្នំ ឬសហគមន៍អេកូទេសចរណ៍ គឺជាអ្វីដែលកំពុងពេញនិយមសម្រាប់យុវជនកម្ពុជាក្នុងរយៈពេល២​ ទៅ៣ឆ្នាំចុងក្រោយនេះ។ ពោលគឺរាប់ចាប់តាំងពីផ្ទុះជំងឺកូវីដមក ទេសចរណ៍ក្នុងស្រុកហាក់កម្រើកឡើងវិញគួរឱ្យកត់សម្គាល់ ដែលទាំងអស់នេះបានរួមចំណែកដល់សេដ្ឋកិច្ចប្រជាជនដែលរស់នៅជុំវិញតំបន់ទេសចរណ៍ទាំងនោះ។ ម្យ៉ាងទៀត វាក៏បានជួយការពារធនធានធម្មជាតិឱ្យគង់វង្សផងដែរ តាមរយៈការបង្កើតការងារជូនពលរដ្ឋ ជាពិសេសអ្នកទេសចរទាំងនោះបានក្លាយជាអ្នកផ្សព្វផ្សាយដ៏មានសក្កានុពលនូវបទល្មើស ផ្សេងៗដែលកើតមានតាមតំបន់ទេសចរនានា។

ជាយុទ្ធសាស្ត្រថ្មីរបស់ក្រសួងបរិស្ថាន គឺដាក់ចេញនូវគម្រោង «ទេសចរណ៍ផ្សារភ្ជាប់ទឹកដី» ដោយជំរុញ និងលើកទឹកចិត្តដល់អ្នកទេសចរឱ្យងាកទៅកម្សាន្តតាមគោលដៅទេសចរក្នុងស្រុកជាជាងការចេញទៅក្រៅប្រទេស។ ការធ្វើបែបនេះ ជាការធានាពីសុវត្ថភាពនៃធនធានធម្មជាតិ ក៏ដូចជារួមចំណែកជួយការងាររបស់ឧទ្យានុរក្សប្រឆាំងទៅនឹងបទល្មើសព្រៃឈើផងដែរ។

លោក តារារិទ្ធិ គឺជាអ្នកមានចំណូលចិត្តក្នុងការធ្វើដំណើរផ្សងព្រេង និងជាអ្នកថតរូប រួមទាំងផលិតវីដេអូផ្សព្វផ្សាយឯករាជ្យមួយរូប។ លោកបានចាប់ផ្ដើមនូវការផ្សងព្រេងតាំងតែពីឆ្នាំ២០១៨ ដោយការជិះកង់ផ្សងព្រេងផ្លូវឆ្ងាយៗ ដែលលោកមិនធ្លាប់បានធ្វើពីមុនមក។

បន្ទាប់ពីដំណើរផ្សងព្រេងបានមួយលើកកាលពីគ្រានោះមក លោកកាន់តែមានការចាប់អារម្មណ៍ខ្លាំងទៅលើការធ្វើដំណើរទៅតំបន់ដាច់ស្រយាលដើម្បីដកស្រង់យកបទពិសោធន៍ថ្មីៗពីការរស់នៅរបស់ប្រជាជន។ តំបន់ដែលយុវជនរូបនេះនិយមទៅគឺតំបន់ដែលមានធនធានធម្មជាតិកម្រៗ ដូចជាតំបន់ព្រៃឡង់ តំបន់ព្រៃទឹក​ភ្លៀងអារ៉ែង និងលើភ្នំខ្នងផ្សាជាដើម។

រាល់ដំណើរកម្សាន្ដរបស់លោកគឺច្រើនតែធ្វើឡើងរបៀបពុះពារជំនះឧបសគ្គ ដូចជាជិះកង់ និងម៉ូតូធំ។ ក្នុងរយៈពេលជាងប្រមាណ៤ឆ្នាំមកនេះ លោកបានកត់សម្គាល់ឃើញពីភាពប្រែប្រួលនៃតំបន់នានា បន្ទាប់ពីលោកបានទៅលេងកម្សាន្ដហើយ។ ភាពប្រែប្រួលដែលលោកលើកឡើងនេះគឺសំដៅលើការប្រែប្រួលបែបវិជ្ជមាន ដោយលោកបានរៀបរាប់ថា ៖

“អ្នកគាំទ្ររបស់ខ្ញុំនៅយូធូប ចាប់ផ្តើមស្រលាញ់តំបន់អេកូទេសចរណ៍ធម្មជាតិ ពួកគេចាប់ផ្តើម​ទៅទីនោះ ជាបន្តបន្ទាប់ដោយកង់ដែរ ឬដោយម៉ូតូ។ ម្យ៉ាងទៀត ក្នុងដំណើរកម្សាន្ដទាំងនោះ ខ្ញុំក៏ធ្លាប់បានប្រទះនូវការប្រព្រឹត្តបទល្មើសព្រៃឈើដែរ ប៉ុន្តែយ៉ាងណា វាអាចនឹងត្រូវបាត់បង់ទៅវិញ នៅពេលដែលតំបន់មួយនោះមានមនុស្សទៅលេងកម្សាន្ដច្រើន”

យុវជនរូបនេះក៏បានបញ្ជាក់អំពីគោលបំណងនៃការធ្វើដំណើរផ្សងព្រេងរបស់ខ្លួនដែរថា៖

“គោលបំណងរបស់ខ្ញុំគឹស្វែងរកការពិតនៃជីវិត! ខ្ញុំតែងតែធ្វើដំណើរទៅកន្លែងជាច្រើន ជួបមនុស្សច្រើន ហើយផលិតវីឌីអូឯកសារពីការធ្វើដំណើរផ្សងព្រងទាំងអស់នេះ ដើម្បីលើកទឹកចិត្តយុវជន និងសង្គម​ឲ្យយកចិត្តទុកដាក់លើតំបន់អេកូទេសចរណ៍ធម្មជាតិ និងអំពីសារៈសំខាន់នៃធម្មជាតិ​មកលើការ​រស់នៅ​របស់យើងទាំងអស់គ្នា”

មិនត្រឹមតែជាការជួយផ្សព្វផ្សាយពីសារៈសំខាន់នៃធនធានធម្មជាតិ យុវជនរូបនេះក៏សុំអំពាវនាវឱ្យមានការចូលរួមការពារនូវអ្វីដែលកម្ពុជាកំពុងមាន និងមិនគួរបំភ្លេចបំផ្លាញធនធានធម្មជាតិឡើយ ផ្ទុយទៅវិញ គួរតែទុកនូវសម្បត្តិធម្មជាតិទាំងអស់នោះដើម្បីរកចំណូលចូលក្នុងសហគមន៍ សង្គមជាតិ និងប្រទេសជាតិ ។

គួររំលឹកថា កាលពីថ្ងៃទី២០ ខែធ្នូ ឆ្នាំ២០២៣កន្លងទៅនេះ ក្រសួងបរិស្ថានបានរៀបចំវេទិកាស្តីពីការការពារ និងអភិរក្ស​ធនធានធម្មជាតិ ក្រោមប្រធាន​បទ «ការធ្វើពិពិធកម្មមុខរបរ ដើម្បីបង្កើនសេដ្ឋកិច្ចមូលដ្ឋាន»។ ក្នុងនោះ រដ្ឋមន្ត្រីក្រសួងបរិស្ថានក៏បានលើកទឹកចិត្តឱ្យបងប្អូនប្រជាសហគមន៍បន្តដាំដំណាំ ចិញ្ចឹមសត្វ ដាំឈើ​ដើម្បីធានាបាននូវសេដ្ឋកិច្ច សន្តិសុខស្បៀងសម្រាប់គ្រួសារ និងសហគមន៍។ ឯកឧត្តមក៏បានបញ្ជាក់ផងដែរថា ​«តំបន់អភិរក្ស ជាសសរកន្លោងសម្រាប់ទ្រទ្រង់សេដ្ឋកិច្ច សង្គម វប្បធម៌ ជាពិសេស ជីវភាពសហគមន៍»៕