សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កាកាវ ដំណាំដាំយកផ្លែដែលនាំចូលពូជមកពីក្រៅប្រទេសយកមកដាំដុះនៅក្នុងប្រទេសកម្ពុជា ដែលកសិករភាគច្រើនមិនធ្លាប់ស្គាល់ពីមុនមកឡើយ។ ប៉ុន្តែដោយសារតែវាមានអត្ថប្រយោជន៍ច្រើន និងមានតម្លៃថ្លៃគួរសម ក្រុមហ៊ុនក្នុងស្រុកមួយបានសហការដាំដុះជាមួយប្រជាកសិករតាមបណ្តាខេត្តមួយចំនួន ដោយផ្តើមចេញពីការបណ្តុះបណ្តាលពីវិធីសាស្ត្រនៃការដាំដុះ និងថែទាំ ដើម្បីអាចទទួលបានទិន្នផលល្អ ស្របតាមស្ដងដារទីផ្សារ និងងាយស្រួលធ្វើការនាំចេញ។
លោក ម៉ៅ ច័ន្ទតារា តំណាងក្រុមហ៊ុន គីរីស៊ីញ ឯ.ក ដែលមានការវិនិយោគទៅលើដំណាំកាកាវនេះបានប្រាប់ឱ្យដឹងថា ក្រុមហ៊ុនបាននាំចូលកូនដំណាំកាកាវយកមកដាំនៅក្នុងប្រទេសកម្ពុជាមានរយៈពេល៣ឆ្នាំមកហើយ ដោយបានសហការជាមួយតំណាងកសិករនៅតាមបណ្តាខេត្តមួយចំនួន ដែលសរុបនៅទូទាំងប្រទេសបានប្រមាណជា ១៦៥កន្លែង ហើយមកទល់ពេលបច្ចុប្បន្ននេះ កសិករភាគច្រើនបានចាប់ផ្តើមប្រមូលផលបានជាបណ្តើរៗ លក់មកឱ្យក្រុមហ៊ុនវិញ។
លោកបានបញ្ជាក់ថា ៖
« ការដាំដុះដំណាំកាកាវនេះត្រូវទាមទារពេលវេលាយូររហូតដល់ប្រមាណជាង៣ឆ្នាំ ទើបអាចទទួលបានផល ដោយនៅឆ្នាំដំបូង ក្នុងទំហំដីដាំដុះ១ហិកតា ឱ្យផលចន្លោះពី ១០ ទៅ ១៥តោនប៉ុណ្ណោះ រហូតដល់អាយុ៥ឆ្នាំ ទើបកាកាវឱ្យផលកាន់តែច្រើនចន្លោះពី ៥០ ទៅ ៦០តោន និងមានអាយុ០៨ឆ្នាំ កាកាវ ផ្តល់ផលកចន្លោះពី ៨០ ទៅ ១២០តោន ដែលក្នុង១តោនក្រុមហ៊ុនធានាទិញពីកសិករក្នុងតម្លៃ ៣០០ដុល្លារ ហើយមានប៉ុន្មានតោនក៍ក្រុមហ៊ុនទទួលទិញទាំងអស់ ប៉ុន្តែអ្វីដែលសំខាន់នោះ ដំណាំកាកាវអាចផ្តល់ទិន្នផលរហូតដល់ ៤០ ទៅដល់ ៦០ឆ្នាំឯណោះ»។
តំណាងក្រុមហ៊ុនដែលវិនិយោគលើដំណាំកាកាវខាងលើនេះបានបន្តឱ្យដឹងថា ចំពោះការដាំដុះដើមកាកាវបាន ដំបូងឡើយកសិករត្រូវទិញកូនកាកាវពីក្រុមហ៊ុនក្នុងមួយដើមតម្លៃ ១.៤ ដុល្លារ ហើយក្នុងទំហំដីមួយហិកតាត្រូវការកូនកាកាវចំនួន ៦២៥ដើម ដាំនៅលើដីដែលមិនលិចទឹក ដីមិនជាំទឹក និងដីមានប្រភពទឹកផ្គត់ផ្គង់គ្រប់គ្រាន់។ ការកាវគេអាចដាំនៅក្រោមដើមឈើធំៗបាន ដូចជា ដើមកៅស៊ូ ដើមស្វាយចន្ទីរ ដើមបេង និងដើមធ្នង់ជាដើម។ល។ ប្រសិនបើមិនមានចំការដាំទេ កសិករអាចដាំនៅលើដីទទេរក៍បាន ក៍ប៉ុន្តែកសិករត្រូវចំណាយប្រាក់ទិញ សំណាញ់ខៀវមកគ្របពីលើដូចដំណាំស្ពៃផងដែរ ដោយកូនដើមនៅតូចវាត្រូវការម្លប់ជាចាំបាច់។
គួរកត់សម្គាល់ថា ផ្លែកាកាវ ត្រូវបានគេយកទៅច្នៃ និងផលិតចេញជាផលិតផលសម្រេចជាច្រើនប្រភេទ ដូចជា ផលិតជាស្ករសូកូឡា, ម៉្សៅអូវ៉ាលទីន, មីឡូ, ប្រភេទជានំចំណីរសជាតិផ្អែម ក៏ដូចជាផលិតជាគ្រឿងសំអាងរាប់រយប្រភេទ។ ជាមួយនឹងដំណើរការលើផលិតកម្មដំណាំកាកាវ បច្ចុប្បន្ននេះ ក្រុមហ៊ុនមួយនេះមានកិច្ចសហការជាមួយក្រុមហ៊ុនចិន និងក្រុមហ៊ុនបារាំង រង់ចាំទទួលទិញ និងធ្វើការនាំចេញទៅកាន់ទីផ្សារក្រៅស្រុក ហើយក៏កំពុងមានគម្រោងពង្រីកវិសាលភាពដាំដុះបន្ថែមទៀតនាពេលអនាគត៕
Account
Security
Favourite Content