សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ យោងតាមទិន្នន័យពីសមាគមស្វាយចន្ទីកម្ពុជា (សសក) បានឱ្យដឹងថា នៅក្នុងឆ្នាំ២០២៥ កន្លងទៅថ្មីៗនេះ កម្ពុជាមានលទ្ធភាពផលិតបានគ្រាប់ស្វាយចន្ទីឆៅជាង១លានតោន (១ ០២០ ៧៥៧ តោន) ដែលបរិមាណទាំងនេះបានបង្ហាញពីភាពធន់ និងកាន់តែប្រសើរនៃផលិតកម្ម ខណៈភាពប្រឈមនឹងបម្រែបម្រួលអាកាសធាតុបន្តមាន។ ដោយឡែក សម្រាប់ការនាំចេញទៅកាន់ទីផ្សារអន្តរជាតិ (គ្រាប់ស្វាយចន្ទីឆៅ) សម្រេចបាន ១ ០០០ ៧៥៧តោន ទទួលចំណូល ១.៥ពាន់លានដុល្លារ កើនឡើង ២៧ភាគរយ បើធៀបទៅនឹងរយៈពេលដូចគ្នាកាលពីឆ្នាំ២០២៤។
លោក អួន ស៊ីឡុត ប្រធានសមាគមស្វាយចន្ទីកម្ពុជា បានឱ្យដឹងថា ពាក់ព័ន្ធទៅនឹងដំណើរការផលិតគ្រាប់ស្វាយចន្ទីកម្ពុជា(ការដាំដុះ)ឆ្នាំ២០២៥ មានភាពប្រឈមខ្លះ ប៉ុន្តែជាលទ្ធផលក្រុមអ្នកផលិតនៅតែអាចទទួលបានភាពវិជ្ជមាន។
លោកបានបញ្ជាក់ថា ៖
«នៅដើមឆ្នាំ២០២៥ ពោលគឺក្នុងខែមីនា មានបញ្ហាមួយចំនួនកើតឡើង ដោយសារកត្តាប្រែប្រួលអាកាសធាតុដែលអាចជះឥទ្ធិពលអាក្រក់ដល់វិស័យនេះ ប៉ុន្តែរហូតមកដល់ចុងខែមេសា ភាពអំណោយផលពីអាកាសធាតុបានប្រែមកជាល្អប្រសើរបន្តិចម្ដងៗ គួបផ្សំជាមួយវិធីសាស្ត្រដែលបានដាក់ចេញដោយក្រុមអ្នកជំនាញរបស់សមាគម ជាពិសេស ក្រោមការណែនាំពីក្រសួងកសិកម្ម រុក្ខាប្រមាញ់ និងនេសាទ ការផលិត និងទិន្នផលដែលទទួលបានគឺមានភាពល្អប្រសើរជាងការរំពឹងទុក»។
ជាមួយនឹងលទ្ធផលវិជ្ជមានដែលទទួលបាននៅក្នុងឆ្នាំ២០២៥កន្លងទៅនេះ លោក អួន ស៊ីឡុត បានបញ្ជាក់ឱ្យដឹងផងដែរពីគោលបំណងចម្បងរបស់សមាគមស្វាយចន្ទីកម្ពុជា គឺផ្តល់អំណាចដល់កសិករនូវបច្ចេកទេសច្បាស់លាស់ និងពិតប្រាកដ មានទីផ្សារទូលំទូលាយ ជាពិសេស អាចជួយឱ្យកសិករទទួលបានចំណូលកាន់តែច្រើន។ ជាក់ស្ដែង កាលពីកន្លងទៅ តាមរយៈសមាគមស្វាយចន្ទីកម្ពុជា សហការជាមួយអង្គការដៃគូ និងក្រសួងកសិកម្ម រុក្ខាប្រមាញ់ និងនេសាទ បានបង្កើតឱ្យមានវគ្គបណ្តុះបណ្តាល ក៏ដូចជាសិក្ខាសាលា ផ្តល់នូវបច្ចេកទេសនៃការសម្របខ្លួនទៅនឹងកត្តាអាកាសធាតុ ការចេះថែទាំ ការប្រើជីបំប៉នឱ្យបានត្រឹមត្រូវ ដែលគិតជារួមមិនក្រោម ៤០ វគ្គនោះទេ ខណៈដែលកសិករដែលជាសិក្ខាកាមចូលរួមមានសរុបប្រមាណជាង ៨ ៤០០ នាក់ មកពីបណ្តាខេត្តចំនួន ១០ ៕
Account
Security
Favourite Content