បរទេស៖ ប្រធានាធិបតីកូរ៉េខាងត្បូង លោក Lee Jae Myung បានមកដល់ប្រទេសចិនកាលពីថ្ងៃអាទិត្យ ដោយមានបំណងចង់ជួបពិភាក្សាជាមួយថ្នាក់នាំចិន ដើម្បីជំរុញកិច្ចទំនាក់ទំនងសេដ្ឋកិច្ចជាមួយដៃគូពាណិជ្ជកម្មដ៏ធំបំផុតរបស់ខ្លួន នេះបើយោងតាមសេចក្ដីរាយការណ៍ពី TRT World ។

កាលពីថ្ងៃអាទិត្យកន្លងទៅនេះ លោក Lee Jae Myung អមដំណើរដោយគណៈប្រតិភូដែលជាថ្នាក់ដឹកនាំខាងធុរកិច្ច និងបច្ចេកវិទ្យា កូរ៉េខាងត្បូង បានចូលដល់ទឹកដីនៃសាធារណរដ្ឋប្រជាមានិតចិនហើយ ជាមួយនឹងក្ដីសង្ឃឹមថាអាចពង្រីកកិច្ចសហប្រតិបត្តិការខាងផ្នែកសេដ្ឋកិច្ចតាមរយៈកិច្ចប្រជុំជាមួយប្រធានាធិបតី លោក Xi Jinping និងមន្ត្រីកំពូលផ្សេងទៀត។ ទន្ទឹមនឹងនេះ ​ប្រធានាធិបតីកូរ៉េខាងត្បូង លោក Lee ក៏មាន​សង្ឃឹមដែរថា ​នឹង​អាច​ប្រើ​ឥទ្ធិពល​របស់​ចិន​ទៅលើកូរ៉េខាងជើង ដើម្បី​គាំទ្រ​គោលបំណងរបស់​លោក​ក្នុងការ​ពង្រឹង​ទំនាក់ទំនង​ឡើងវិញជាមួយ​ទីក្រុង​ព្យុងយ៉ាង។ គួរបញ្ជាក់ថា នៅត្រឹមតែប៉ុន្មានម៉ោងមុនពេលដែលលោក Lee ចាកចេញពីប្រទេស ឆ្ពោះដំណើរទៅកាន់ទីក្រុងប៉េកាំង យោធាកូរ៉េខាងជើងបានបាញ់មីស៊ីលផ្លោងចូលទៅក្នុងសមុទ្រជប៉ុន ដែលជាការសាកល្បងលើកដំបូងនៅក្នុងឆ្នាំ២០២៦នេះ។

សូមជម្រាបថា លោក Lee Jae Myung គឺជាមេដឹកនាំកូរ៉េខាងត្បូងដំបូងគេដែលធ្វើទស្សនកិច្ចនៅទីក្រុងប៉េកាំងក្នុងរយៈពេល ៦ឆ្នាំចុងក្រោយដោយមានរយៈពេល ៤ ថ្ងៃ។ ដំណើរទស្សនកិច្ចរបស់មេដឹកនាំកូរ៉េខាងត្បូងរូបនេះកើតឡើងប៉ុន្មានថ្ងៃបន្ទាប់ពីប្រទេសចិនបានធ្វើសមយុទ្ធយោធាដ៏ធំនៅជុំវិញកោះតៃវ៉ាន់ ដែលធ្វើឲ្យមានការថ្កោលទោសជាអន្តរជាតិ ប៉ុន្តែទីក្រុងសេអ៊ូលបានបដិសេធមិនចូលរួម។

កិច្ចប្រជុំកំពូលជាមួយមេដឹកនាំចិន Xi Jinping បានធ្វើឡើងនៅថ្ងៃចន្ទសប្ដាហ៍នេះ និងបន្តដោយកិច្ចពិភាក្សាពាណិជ្ជកម្មជាមួយមន្ត្រីកំពូលៗ រួមទាំងនាយករដ្ឋមន្ត្រី Li Qiang នៅថ្ងៃអង្គារផងដែរ។ មិនត្រឹមតែប៉ុណ្ណោះ មេដឹកនាំកូរ៉េខាងត្បូងកំពុងនាំយកគណៈប្រតិភូ និងនាយកប្រតិបត្តិជាច្រើនមកពីក្រុមហ៊ុនធំៗរួមមាន ក្រុមហ៊ុន Samsung និង ក្រុមហ៊ុន Hyundai Motor Group ជាដើមអមដំណើរផងដែរ។ បន្ទាប់មក លោក Lee នឹងធ្វើដំណើរទៅកាន់មជ្ឈមណ្ឌលហិរញ្ញវត្ថុនៃទីក្រុងសៀងហៃ ដែលជាសហគមន៍ដ៏ធំមួយសម្រាប់ធុរកិច្ចកូរ៉េខាងត្បូង។ លោក Lee បានអំពាវនាវឱ្យកូរ៉េខាងត្បូង និងចិនធ្វើការងាររួមគ្នាឆ្ពោះទៅរកពាណិជ្ជកម្ម និងផលប្រយោជន៍ទៅវិញទៅមកបន្ថែមទៀត

គួរកត់សម្គាល់ថា បច្ចុប្បន្ននេះ ទីក្រុងសេអ៊ូល កំពុងដើរលើខ្សែបន្ទាត់ដ៏ល្អជាមួយចិនក្នុងនាមជាដៃគូពាណិជ្ជកម្មកំពូលរបស់ខ្លួន បន្ទាប់ពីសហរដ្ឋអាម៉េរិក ដែលជាអ្នកធានាផ្នែកការពារជាតិរបស់ខ្លួន។ យ៉ាងណាមិញ លោក Kang Jun-young សាស្ត្រាចារ្យនៅសាកលវិទ្យាល័យ Hankuk University of Foreign Studies បានលើកឡើងថា ទីក្រុងប៉េកាំងឥឡូវនេះ ក៏កំពុងចង់បានកូរ៉េខាងត្បូង និងទាញចេញឱ្យឆ្ងាយពីឥទ្ធិពលរបស់ទីក្រុងវ៉ាស៊ីនតោន ខណៈដែលចិនបានមើលឃើញយ៉ាងច្បាស់ថា កូរ៉េខាងត្បូង នៅមានភាពទន់ខ្សោយក្នុងចំណោមទំនាក់ទំនងត្រីភាគីរវាងអាម៉េរិក ជប៉ុន និងកូរ៉េខាងត្បូង៕