សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ឌូបៃ ៖ រដ្ឋមន្ត្រីក្រសួងពាណិជ្ជកម្មកម្ពុជា លោកជំទាវ ចម និម្មល បានឱ្យដឹងថា កម្ពុជានឹងទទួលបានទីផ្សារប្រមាណ ៩៧.៨% នៃបន្ទាត់ពន្ធសរុប ហើយកម្ពុជាក៏នឹងផ្តល់ទីផ្សារប្រមាណ ៩១.៦២% នៃបន្ទាត់ពន្ធសរុបដល់ប្រទេសអេមីរ៉ាតអារ៉ាប់រួមវិញដែរ ដែលនេះជាឱកាសពាណិជ្ជកម្ម និងអត្ថប្រយោជន៍ដែលរំពឹងនឹងទទួលបានពីការអនុវត្តកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា និងអេមីរ៉ាតអារ៉ាប់រួម។
ការលើកឡើងនេះធ្វើឡើងដោយលោកជំទាវ ចម និម្មល រដ្ឋមន្ត្រីពាណិជ្ជកម្មកម្ពុជា ដើម្បីជម្រាបជូនអ្នកតំណាងមជ្ឈមណ្ឌលពាណិជ្ជកម្មឯកជនកម្ពុជានៅទីក្រុងឌូបៃ អំពីកាលានុវត្តភាពពាណិជ្ជកម្មនៅកម្ពុជា និងអំពីអត្ថប្រយោជន៍ ដែលរំពឹងនឹងទទួលបានពីការអនុវត្តកិច្ចព្រមព្រៀង ភាពជាដៃគូសេដ្ឋកិច្ចគ្រប់ជ្រុងជ្រោយ រវាងកម្ពុជា និងអេមីរ៉ាតអារ៉ាប់រួម ( Cambodia-UAE CEPA) ដែលរំពឹងនឹងទទួលបានពីការអនុវត្តកិច្ចព្រមព្រៀង ភាពជាដៃគូសេដ្ឋកិច្ចនាពេលដ៏ខ្លីខាងមុខ។
សូមបញ្ជាក់ថា លោកជំទាវរដ្ឋមន្ត្រី បានដឹកនាំគណៈប្រតិភូក្រសួងពាណិជ្ជកម្ម ធ្វើទស្សនកិច្ចនៅមជ្ឈមណ្ឌលពាណិជ្ជកម្មឯកជនកម្ពុជានៅទីក្រុងឌូបៃ (Cambodia Private Commercial Center in Dubai) ដែលមានទីតាំងនៅអគារ Burj Khalifa ដើម្បីស្វែងយល់អំពីវឌ្ឍនភាព និងទិសដៅការងាររបស់មជ្ឈមណ្ឌលនាថ្ងៃទី២៨ ខែវិច្ឆិកា ឆ្នាំ២០២៣ នៅទីក្រុងឌូប៉ៃ ប្រទេសអេមីរ៉ាតអារ៉ាប់រួម ដែលដំណើរទស្សនកិច្ច ស្របពេលដែលកម្ពុជា និងប្រទេសអេមីរ៉ាតអារ៉ាប់រួម ត្រៀមអនុវត្តកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ រវាងកម្ពុជា និងអេមីរ៉ាតអារ៉ាប់រួមនាពេលខាងមុខ បន្ទាប់ពីកិច្ចព្រមព្រៀង បានចុះហត្ថលេខាជាផ្លូវការកាលពីថ្ងៃទី៨ ខែមិថុនា ឆ្នាំ២០២៣ ។
តាមរយៈកិច្ចព្រមព្រៀងនេះ កម្ពុជានឹងទទួលបានទីផ្សារប្រមាណ ៩៧.៨% នៃបន្ទាត់ពន្ធសរុប ឬស្មើនឹងចំនួន ៧ ៦៧៨ បន្ទាត់ពន្ធ។ មុខទំនិញសំខាន់ដែលកម្ពុជា ទទួលបានទីផ្សារ គឺស្ទើរតែគ្រប់មុខទំនិញទាំងអស់ ក្នុងនោះរួមមានមុខទំនិញកសិកម្ម មានដូចជា អង្ករ ស្វាយចន្ទី បន្លែ ផ្លែឈើ ចេក ស្វាយ ពោត ម្រេច ធុរេន ដំណាប់ផ្លែឈើ នំធ្វើពីអង្ករ ជាដើម។ ចំពោះទំនិញសំខាន់ៗរបស់កម្ពុជាមួយចំនួន ជាពិសេសសម្លៀកបំពាក់ ស្បែកជើង នឹងត្រូវកាត់បន្ថយពន្ធ ឬត្រូវលើកលែងពន្ធទាំងស្រុង។
ចំណែកមុខទំនិញឧស្សាហកម្ម រួមមាន កង់ គ្រឿងបង្គុំអេឡិចត្រូនិក រថយន្តអគ្គិសនី និងមុខទំនិញ វាយនភ័ណ្ឌរួមមាន កាបូបធ្វើដំណើរ ស្បែកជើង សម្លៀកបំពាក់ ប៉ុន្តែលើកលែងទំនិញហាមឃាត់ និងទំនិញពិសេសកំណត់ដែលភាគច្រើនជាគ្រឿងស្រវឹង និងសាច់ជ្រូក។
ចំណែកកម្ពុជា នឹងផ្តល់ទីផ្សារប្រមាណ ៩១.៦២% នៃបន្ទាត់ពន្ធសរុប ឬស្មើ១០ ៤៥៧ បន្ទាត់ពន្ធ ដល់អេមីរ៉ាតអារ៉ាប់រួម ។ មុខទំនិញសំខាន់ៗ ដែលកម្ពុជាផ្តល់ទីផ្សាររួមមាន៖ ប្លាស្ទិក កៅស៊ូ ផលិតផលប្រេងឆៅមួយចំនួន ក្រដាស ដែក និងដែកថែប ឧបករណ៍អគ្គិសនី យានយន្តសម្រាប់ដឹកទំនិញ និងត្រាក់ទ័រ។
ក្នុងឱកាសនោះ លោកជំទាវ ចម និម្មល ក៏បានអនុញ្ញាតជូនកញ្ញា Chenling Zhang អគ្គនាយិកាក្រុមហ៊ុន OneRoad គ្រុប ជួបសម្តែងការគួរសម និងពិភាក្សាការងារអំពីការពង្រឹង និងពង្រីកសកម្មភាពវិនិយោគ ព្រមទាំងការធ្វើពាណិជ្ជកម្មរបស់ក្រុមហ៊ុន ដែលកំពុងមានសកម្មភាព នៅក្នុងប្រទេសទាំងពីរផងដែរ។
សូមជម្រាបថា តាមរយៈកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ រវាងកម្ពុជា និងអេមីរ៉ាតអារ៉ាប់រួម កម្ពុជានឹងមានលទ្ធភាពក្នុងការធ្វើពិពិធកម្មទីផ្សារសម្រាប់ការនាំចេញទៅកាន់ប្រទេសអារ៉ាប់រួម និងអាចឈានទៅចាប់យកឱកាសទីផ្សារអារ៉ាប់ដទៃទៀត ក្នុងតំបន់បជ្ឈឹមបូព៌ា និងអាហ្រ្វិកខាងជើង ដែលជាតំបន់ស្ថិតនៅក្បែរនោះ ។ លើសពីនេះទៅទៀតកម្ពុជា ក៏អាចទាក់ទាញក្រុមហ៊ុនវិនិយោគរបស់អេមីរ៉ាតអារ៉ាប់រួម និងទាក់ទាញឱ្យមានយកកំណើនភ្ងៀវទេសចរពីប្រទេសនេះបានផងដែរ៕
Account
Security
Favourite Content