ភ្នំពេញ៖ ផ្អែកលើការវិវត្តជាក់ស្តែងនៃស្ថានភាពសង្គម-សេដ្ឋកិច្ច ក្នុងបរិការណ៍នៃភាពមិនប្រាកដប្រជាកាន់តែខ្ពស់ គោលនយោបាយហិរញ្ញវត្ថុសាធារណៈរយៈពេលមធ្យម ឆ្នាំ២០២៦-២០២៨ ត្រូវបានបន្តរៀបចំឡើងវិញដោយប្រកាន់យកនូវ «ជំហរគោលនយោបាយ ពង្រឹងប្រសិទ្ធភាពថវិកាជាជំហាន» ដើម្បីធានាឲ្យបាននូវចីរភាពហិរញ្ញវត្ថុសាធា​រណៈក្នុងរយៈពេលមធ្យមតាមរយៈការបន្តរក្សានូវតុល្យភាពថវិការវាងធនធានថវិការបស់រដ្ឋ និងបន្ទុកថវិការបស់រដ្ឋ និងការចាប់ផ្តើមកសាងឡើងវិញនូវទ្រនាប់ថវិកាជាតិនៅពេលកាលៈទេសៈអនុញ្ញាត ។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី  រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងដូច្នេះនៅក្នុងសិក្ខាសាលាសភាស្តីពី ការកសាងក្របខ័ណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈ ក្នុងការរៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦ កាលពីថ្ងៃទី១០ ខែវិច្ឆិកា ឆ្នាំ២០២៥ នៅវិមានរដ្ឋសភា។

ឯកឧត្តមឧបនាយករដ្ឋមន្ត្រី បានលើកឡើងថា៖ បន្ទាប់ពីមានការបំពានមកលើអធិបតេយ្យជាតិ និងបូរណ​ភាពទឹកដីរបស់កម្ពុជា ជាមួយនឹងការបន្តបិទខ្ទប់ព្រំដែនគោក កម្ពុជា-ថៃ, គោលនយោបាយហិរញ្ញវត្ថុសាធា​រណៈ​ឆ្នាំ ២០២៦ ត្រូវបានគិតគូរឡើងវិញ ដោយប្រកាន់យកនូវជំហរថ្មី គឺ «ជំហរគោលនយោបាយពង្រឹងស័ក្តិសិទ្ធិភាពថវិកា ដើម្បីទ្រទ្រង់ស្ថិរភាព និងកំណើន» ។

ឯកឧត្តមឧបនាយករដ្ឋមន្ត្រីបានបន្តថា៖ អនុវត្តតាមគោលជំហរថ្មីនេះ រាជរដ្ឋាភិបាល ផ្តោតជាសំខាន់លើការបន្តពង្រឹងស័ក្តិសិទ្ធិភាពថវិកា ទាំងកម្រិតវិភាជន៍ និងកម្រិតប្រតិបត្តិការ តាមរយៈការបន្តធ្វើអាទិភាវូបនីយកម្មចំណាយ ដោយក្នុងនោះ ក្របខណ្ឌចំណាយសាធារណៈ ត្រូវបានរៀបចំឡើងវិញដើម្បីតម្រង់ទិសធនធានទៅកាន់មុខសញ្ញាដែលជាអាទិភាពសំខាន់បំផុតចំពោះមុខ, ជាពិសេសការពង្រឹងសមត្ថភាពការពារអធិប​តេយ្យជាតិ និងបូរណភាពទឹកដី ការរក្សាលំនឹងសង្គម-សេដ្ឋកិច្ច និង ជីវភាពប្រជាជន ការលើកកម្ពស់សមធម៌សង្គម ការបន្តទ្រទ្រង់ដំណើរការនៃកិច្ចអភិវឌ្ឍសង្គម ព្រមទាំងការធានានិរន្តរភាពនៃប្រតិបត្តិការការងាររបស់រាជរដ្ឋាភិបាល ស្របតាមទិសដៅ ជាយុទ្ធសាស្ត្រដែលត្រូវបានដាក់ចេញក្នុង «យុទ្ធសាស្ត្របញ្ចកោណ-ដំណាក់កាល ទី ១» របស់រាជរដ្ឋាភិបាល នីតិកាលទី ៧ នៃរដ្ឋសភា ។

ឯកឧត្តមឧបនាយករដ្ឋមន្រ្តី  រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានគូសបញ្ជាក់ថា៖ ឈរលើមូលដ្ឋានខាងលើ ថវិកាឆ្នាំ២០២៦ ត្រូវបានរៀបចំដោយផ្អែកលើគោលការណ៍ និងអភិក្រមចំនួន ៨ ដូចខាងក្រោម ៖

ទី១-ការគោរពឲ្យបាននូវក្របខណ្ឌម៉ាក្រូសេដ្ឋកិច្ច តាមការកំណត់

ទី២-ការរក្សាតុល្យភាព និង ចីរភាពថវិកា

ទី៣-ការធានាចីរភាព និង សមិទ្ធកម្មនៃចំណូល

ទី៤-ការតម្កល់ «មនុស្ស» ជាអាទិភាពទី ១

ទី៥-ការធ្វើវិចារណកម្មលំដាប់អាទិភាព តាមរយៈ៖ (១)- ការផ្តល់អាទិភាពដល់ ការពង្រឹងសមត្ថភាពការពារអធិបតេយ្យជាតិ និង បូរណភាពទឹកដី ទន្ទឹមនឹងការធានា ប្រក្រតីភាព និង និរន្តរភាពនៃដំណើរការក្រសួង-ស្ថាប័ន; (២)- ការគាំទ្រដល់ការបន្ត អនុវត្តគោលនយោបាយអាទិភាព និង វិធានការគន្លឹះ សម្រាប់ដោះស្រាយបញ្ហាប្រឈម ជាអាទិភាព ក្នុងនីតិកាលទី ៧ នៃរដ្ឋសភា; (៣)- ការទ្រទ្រង់ការងើបវិញ និងការជំរុញ សកម្មភាពសេដ្ឋកិច្ច; និង (៤)- ការបន្តគាំទ្រ ឬ បន្ថែមការគាំទ្រ ដល់កម្មវិធី/សកម្ម​ភាព ចាំបាច់ខ្លាំង ដែលមិនខ្វះបាន ឬ មិនអាចពន្យាពេលបាន របស់ក្រសួង-ស្ថាប័ន ។

ទី៦-ការលើកកម្ពស់ប្រសិទ្ធភាពកម្មវិធី និង/ឬ សកម្មភាព ។

ទី៧ – ការផ្ទេរថវិកាឲ្យដល់អង្គភាពអនុវត្ត ។ និង

និងទី៨-ការផ្សារភ្ជាប់រវាងការប្រមូលចំណូល និង ការវិភាជថវិកា ។

នៅក្នុងសិក្ខាសាលាសភានោះដែរ ឯកឧត្តមឧបនាយករដ្ឋមន្ត្រី ក៏បានគូសរំលេចនូវចំណុចសំខាន់ចំនួន ៣ រួមមាន៖ (១). បរិការណ៍រួមនៃ ការរៀបចំក្របខណ្ឌគោលនយោបាយម៉ាក្រូសេដ្ឋកិច្ចឆ្នាំ ២០២៦, (២). ទិសដៅ និងអភិក្រមនៃគោលនយោបាយហិរញ្ញវត្ថុសាធារណៈ, និង (៣). ខ្លឹមសារសង្ខេបនៃសេចក្តី- ព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦៕