ភ្នំពេញ ៖ ​ក្នុង​រយៈពេល១១ខែ ឆ្នាំ ២០២៥​នេះ ក្រុមប្រឹក្សាអភិវឌ្ឍន៍កម្ពុជា​បាន​អនុម័តគម្រោង​វិនិយោគ​មានលក្ខណៈសម្បត្តិ​គ្រប់​គ្រាន់​ចំនួន៦០៩​គម្រោង ដែលមានទឹកប្រាក់​វិនិយោគសរុប​ប្រមាណ៩,៥ពាន់​លានដុល្លារអាមេរិក ។ នេះបើតាមរបាយការណ៍របស់ក្រុមប្រឹក្សាអភិវឌ្ឍន៍​នៅថ្ងៃទី​០៤ ធ្នូ ២០២៥ ។​

បើតាម​របាយការណ៍បញ្ជាក់ថា ទាំង​ការអនុម័ត​គម្រោង និងទុនវិនិយោគ ក្នុងរយៈពេល១១ខែ​សុទ្ធតែកើនឡើង​បើធៀបនឹង​ឆ្នាំ ២០២៤ ជាក់ស្ដែង សម្រាប់គម្រោង​វិនិយោគ​បានកើនឡើង​រហូតដល់​២២០​គម្រោង ស្មើនឹង​ប្រមាណ៥៧ភាគរយ ខណៈទុនវិនិយោគ​មានការកើនឡើង​រហូតដល់៣ពាន់​លានដុល្លារ​ឬស្មើ​នឹង​ប្រមាណ៤៧ភាគរយ ។ ក្នុងឆ្នាំ ២០២៤ រយៈពេល​១១ខែដូចគ្នា​ គណៈកម្មាធិការ​វិនិយោគកម្ពុជា​នៃក្រុមប្រឹក្សាអភិវឌ្ឍន៍កម្ពុជា បានចុះបញ្ជី​គម្រោង​វិនិយោគចំនួន៣៨៩គម្រោង ក្នុងទំហំទឹកប្រាក់វិនិយោគ​ប្រមាណ ៦,៥ពាន់​លានដុល្លារអាមេរិក ។

របាយការណ៍របស់​ក្រុមប្រឹក្សាអភិវឌ្ឍន៍កម្ពុជា​ក៏បានបង្ហាញផងដែរពីប្រភពទុនវិនិយោគ ក្នុងរយៈពេល​១១ខែ ដោយឃើញថា​ប្រភពទុនវិនិយោគមកពីប្រទេសចិន​ ​មានច្រើន​ជាងគេដែលមាន​រហូតដល់ជាង​ពាក់​កណ្ដាល ​នៃទុនវិនិយោគសរុប ៩,៥ពាន់​លានដុល្លារអាមេរិក គឺប្រមាណ ៥២​,៦២ភាគរយ ខណៈកម្ពុជា​បាន​ស្ថិតនៅ​លំដាប់ទី២ មានចំណែក​ប្រមាណ ៣២,៤៩ភាគរយ ។

វិស័យដែលទាក់ទាញ​បានការ​វិនិយោគច្រើនជាង​គេ​ក្នុងរយៈពេល១១ខែ ឆ្នាំ ២០២៥នេះ គឺវិស័យឧស្សាហកម្ម ដែលមានទឹក​ប្រាក់​រហូតដល់ ៥,៧​ពាន់​លានដុល្លារអាមេរិក បន្ទាប់មកគឺវិស័យ​ កសិកម្ម​និ​ងកសិ-ឧស្សាហកម្ម ដោយស្រូបទាញបានទឹកប្រាក់វិនិយោគ ប្រមាណ ៤៣៦​លានដុល្លារអាមេរិក ខណៈវិស័យទេសចរណ៍​ស្រូបទាញ​បានទឹកប្រាក់​១៧៥​លានដុល្លារអាមេរិក ក្រៅពីនោះមានវិស័យហេដ្ឋារចនាសម្ព័ន្ធ និងផ្សេងៗទៀត ។​

លេខាធិការដ្ឋាន​នៃក្រុមការងារជំរុញការវិនិយោគខេត្តព្រះសីហនុ កាលពីពេលថ្មីៗនេះ បានបង្ហាញពីចំនួន​រោងចក្រ​ដែលរើចេញពី​ប្រទេស​ចិន​មានរហូតដល់៥០ម៉ឺនរោងចក្រ​ទាំងពីមុន បច្ចុប្បន្ននិងអនាគត ហើយរំពឹងថា​កម្ពុជា​នៅតែបន្តទទួលបានការ​វិនិយោគ​ពីប្រទេស​ចិន​ជា​បន្ត​បន្ទាប់ទៀត ។ ការរុះរើ​រោងចក្រ​ចេញពីប្រទេស​ចិន​ គឺក្នុងគោលបំណង​ដើម្បីគេចពីពន្ធបដិការ​របស់អាមេរិកដែល​បានដាក់លើ​ប្រទេស​ចិន ។​

ឯកឧត្តម​ជា វុទ្ធី អគ្គលេខាធិការ​គណៈកម្មាធិការ​វិនិយោគ នៃក្រុមប្រឹក្សាអភិវឌ្ឍន៍​កម្ពុជា បាន​មានប្រសាសន៍លើកឡើងថា ឆ្នាំ ២០២៥នេះ ជា​ឆ្នាំ ប្រវត្តិ​សាស្ត្រ ដែលកម្ពុជាបាន​អនុម័តគម្រោង​វិនិយោគ​ច្រើន ជាមួយ​នឹងទុនវិនិយោគ​ក៏ច្រើន​ ដែលមិនធ្លាប់​មាន​ ៕