សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ នៅក្នុងរយៈពេល ៩ខែ ឆ្នាំ២០២៥កន្លងទៅនេះ តាមរយៈអាកាសយានដ្ឋានអន្តរជាតិរបស់កម្ពុជាទាំង៣ទីតាំង ទទួលបានអ្នកធ្វើដំណើរតាមផ្លូវអាកាសសរុបចំនួន ៥,១០៩,៣២៥ នាក់ កើនឡើងប្រមាណ ១៤ភាគរយ ខណៈដែលប្រតិបត្តិការហោះហើរទ្វេទិសសរុបបានចំនួន ៤៧,៦៣៧ជើង កើនឡើង១២% បើធៀបទៅនឹងរយៈពេល៩ខែ ដូចគ្នាទៅនឹងឆ្នាំ២០២៤។ ជាមួយគ្នានេះដែរ សម្រាប់ការដឹកទំនិញតាមផ្លូវអាកាស ចេញ-ចូល (ទ្វេទិស) មានចំនួន ៦៤ ៥១៣ តោន កើនឡើង១៤% ។
ឯកឧត្តម ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិលកម្ពុជា បានលើកឡើងឱ្យដឹងថា សម្រាប់អាកាសយានដ្ឋានអន្តរជាតិតេជោ ជាមធ្យម អាចទទួលបានអ្នកដំណើរចេញ-ចូល (ទ្វេរទិស) ប្រមាណ ១៥០ ០០០នាក់/ថ្ងៃ និងជើងហោះហើរចេញ-ចូល (ទ្វេរទិស) ជាមធ្យម១៣០ជើង/ថ្ងៃ ដោយមានក្រុមហ៊ុនអាកាសចរណ៍ហោះហើរចេញ-ចូល (ទ្វេរទិស) ចំនួន២៩ក្រុមហ៊ុន (ក្រុមហ៊ុនអន្តរជាតិចំនួន២៥ និងក្រុមហ៊ុនក្នុងស្រុកចំនួន៤)។
ឯកឧត្តម ស៊ីន ចាន់សិរីវុត្ថា បានមានប្រសាសន៍ថា កំណើនដ៏រឹងមាំនេះ ដោយសារការងើបឡើងវិញយ៉ាងខ្លាំងនៃចំនួនទេសចរចិន ដែលធ្វើដំណើរចេញក្រៅប្រទេស និរន្តរភាពតម្រូវការធ្វើដំណើរតាមផ្លូវអាកាសក្នុងតំបន់មកពីប្រទេសថៃ វៀតណាម កូរ៉េ និងជប៉ុន និងការបន្ធូរបន្ថយការរឹតបន្តឹងក្នុងការធ្វើដំណើរ និងការស្តារ ពង្រឹងសមត្ថភាពក្រុមហ៊ុនអាកាសចរណ៍ឡើងវិញ ខណៈដែលអាកាសយានដ្ឋានអន្តរជាតិតេជោ និងការពង្រីកបណ្តាញផ្លូវអាកាសអន្តរជាតិរបស់កម្ពុជា ក្នុងបំណងដាក់ប្រទេសកម្ពុជាជាមជ្ឈមណ្ឌលអាកាសចរណ៍ក្នុងតំបន់ ដែលឆ្លើយតបនឹងស្តង់ដារអន្តរជាតិខាងសុវត្ថិភាព ប្រសិទ្ធភាព និងនិរន្តរភាព។។
សូមជ្រាបថា អាកាសយានដ្ឋានអន្តរជាតិតេជោ នឹងចូលរួមជាកម្លាំងចលករក្នុងការទាក់ទាញទេសចរ និងវិនិយោគិនមកកាន់កម្ពុជាកាន់តែច្រើនជាងពេលមុនជំងឺកូវីដ-១៩ទៅទៀត ព្រោះសមត្ថភាពទទួលអ្នកដំណើរត្រូវបានពង្រីក ដោយអាចទទួលជើងយន្តហោះទាំងនៅក្នុងតំបន់ និងជើងយន្តហោះមកពីឆ្ងាយៗឆ្លងទ្វីបចុះចតនៅអាកាសយានដ្ឋានអន្តរជាតិតេជោបានផងដែរ ។
ជាក់ស្ដែង ក្រោយបើកប្រតិបត្តិការចាប់តាំងពីថ្ងៃទី០៩ ខែកញ្ញា ឆ្នាំ២០២៥ អាកាសយានដ្ឋានអន្តរជាតិបានទទួលជើងយន្តហោះថ្មីៗជាបន្តបន្ទាប់ ក្នុងនោះមានជើងយន្តហោះរបស់ក្រុមហ៊ុនអាកាសចរណ៍ Etihad ហើយរំពឹងថានឹងមានក្រុមហ៊ុនអាកាសចរណ៍ថ្មីចំនួន ៤ បន្ថែមទៀតរួមមាន IndiGo, Firefly, Air Busan, T’wayនៅត្រឹមដំណាច់ឆ្នាំ២០២៥ ៕
Account
Security
Favourite Content