សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ខេត្តស្ទឹងត្រែង បានគោរពអញ្ជើញភ្ញៀវទេសចរចូលរួមទស្សនាពិធីបុណ្យផ្សោតមេគង្គ និងព្រឹត្តិការណ៍អុំទូកកាយ៉ាកជាលើកដំបូង ដែលក្រសួងទេសចរណ៍ បានសហការជាមួយរដ្ឋបាលខេត្តស្ទឹងត្រែងរៀបចំព្រឹត្តិការណ៍នេះឡើង ក្នុងគោលបំណងមិនត្រឹមតែបង្ហាញពីសក្ដានុពលទេសចរណ៍របស់ខេត្តប៉ុណ្ណោះទេ ប៉ុន្តែថែមទាំងលើកកម្ពស់ការយល់ដឹងជាសាធារណៈ និងការចូលរួមក្នុងការអភិរក្សសត្វផ្សោតអ៊ីរ៉ាវ៉ាឌី ដែលជិតផុតពូជផងដែរ។
យោងតាមសេចក្ដីជូនដំណឹងរបស់ក្រសួងទេសចរណ៍បានបញ្ជាក់ថា ស្ទឹងត្រែង ដែលជាខេត្តដ៏ស្រស់ត្រកាលរបស់កម្ពុជា ស្ថិតនៅតាមដងទន្លេមេគង្គនៃភាគឦសាន្តប្រទេស នឹងរៀបចំពិធីបុណ្យផ្សោតមេគង្គ និងព្រឹត្តិការណ៍អុំទូកកៃយ៉ាក ចាប់ពីថ្ងៃទី៣០ ខែឧសភា ដល់ថ្ងៃទី ១ ខែមិថុនា ឆ្នាំ២០២៥ ដែលពិធីបុណ្យរយៈពេល ៣ ថ្ងៃនេះ នឹងប្រព្រឹត្តទៅនៅសហគមន៍អេកូទេសចរណ៍ព្រះរំកិល ឈើទាលផ្សោត ស្ថិតក្នុងឃុំព្រះរំកិល ស្រុកបូរីអូរស្វាយសែនជ័យ។
ព្រឹត្តិការណ៍នេះ រៀបចំឡើងក្នុងគោលបំណងលើកកម្ពស់ការអភិរក្សសត្វផ្សោតមេគង្គ ផ្សព្វផ្សាយពីតំបន់សក្តានុពលអេកូទេសចរណ៍ ក៏ដូចជាសកម្មភាពទេសចរណ៍ឱ្យកាន់តែសម្បូរបែប និងពង្រឹងគុណភាពផលិតផល សេវាកម្មទេសចរណ៍ឱ្យស្របតាមស្តង់ដាទេសចរណ៍ ព្រមទាំងលើកទឹកចិត្តដល់ប្រជាពលរដ្ឋឱ្យចូលរួមយ៉ាងសកម្មក្នុងការអភិរក្សធនធានធម្មជាតិ អនាម័យបរិស្ថាន សំដៅទាក់ទាញកំណើននៃភ្ញៀវទេសចរជាតិ និងអន្តរជាតិបន្ថែមទៀត។
ក្រៅពីការប្រារព្ធពិធីទេសចរណ៍ និងការអភិរក្ស ព្រឹត្តិការណ៍នេះត្រូវបានគេរំពឹងថា នឹងមានបង្ហាញនូវសកម្មភាពចម្រុះជាច្រើន រួមទាំងពិធីសូត្រមន្តដល់សត្វផ្សោត ជិះទូកកាយ៉ាក់ ការតាំងបង្ហាញផលិតផលទេសចរណ៍ធម្មជាតិ និងអាហារក្នុងស្រុក ព្រឹត្តិការណ៍កីឡាធំៗ (ដូចជាការរត់ម៉ារ៉ាតុងសប្បុរសធម៌ និងការប្រណាំងទូក) ដំណើរបោះជំរុំ និងដំណើរកម្សាន្តទៅកាន់សហគមន៍អេកូទេសចរណ៍បូរីអូរស្វាយ និងទឹកធ្លាក់សោភ័ណ។
ក្រសួងទេសចរណ៍ សូមអំពាវនាវដល់សាធារណជនទាំងអស់ចូលរួមឱ្យបានច្រើនកុះករ ជាពិសេសរួមគ្នាជំរុញផ្សព្វផ្សាយ និងលើកកម្ពស់វិស័យទេសចរណ៍នារដូវកាលបៃតង (Green season) ស្របតាមយុទ្ធនាការផ្សព្វផ្សាយ «ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍, ទេសចរណ៍រីកលូតលាស់ក្នុងសន្តិភាព និង បុគ្គលម្នាក់ៗជាអ្នកផ្សព្វផ្សាយទេសចរណ៍កម្ពុជា៕
Account
Security
Favourite Content