ប៉ៃលិន ៖ឯកឧត្តម ប្រាក់ សុផេង អនុរដ្ឋលេខាធិការក្រសួងទេសចរណ៍ ជាថ្នាក់ដឹកនាំទទួលបន្ទុកមន្ទីរទេសចរណ៍ខេត្តប៉ៃលិន និងជាតំណាងដ៏ខ្ពង់ខ្ពស់របស់ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ កាលពីថ្ងៃចុងសប្ដាហ៍កន្លងទៅបានចុះសំណេះសំណាល និងសួរសុខទុក្ខមន្ត្រីរាជការនៃមន្ទីរទេសចរណ៍ខេត្តប៉ៃលិន ត្រួតពិនិត្យការអនុវត្តផែនការអភិវឌ្ឍន៍ទេសចរណ៍ខេត្ត និងការអភិវឌ្ឍន៍នៅតាមរមណីយដ្ឋានទេសចរណ៍នានាក្នុងខេត្ត។

ឯកឧត្តមអនុរដ្ឋលេខាធិការ បានគូសបញ្ជាក់ថា ឯកឧត្តមរដ្ឋមន្ត្រី បានយកចិត្តទុកដាក់ដល់ការអភិវឌ្ឍន៍ទេសចរណ៍ថ្នាក់ក្រោមជាតិ តាមរយៈការចាត់ថ្នាក់ដឹកនាំទទួលបន្ទុកមន្ទីរទេសចរណ៍ខេត្តនីមួយៗ ដោយជំរុញធ្វើការឱ្យបានជិតស្និតជាមួយមន្ទីរទេសចរណ៍ និងរដ្ឋបាលខេត្ត សំដៅជំរុញអភិវឌ្ឍន៍វិស័យទេសចរណ៍ឱ្យបានកាន់តែល្អប្រសើរ ទទួលយកនិងដោះស្រាយសំណូមពរនានានៅថ្នាក់ក្រោមជាតិ ជាពិសេសភ្ជាប់ទំនាក់ទំនងរវាងរដ្ឋបាលក្រោមជាតិ និងថ្នាក់ជាតិឱ្យកាន់តែជិតស្និត និងមានផលិតភាពការងារខ្ពស់។

ឯកឧត្តម បានផ្តល់ជាអនុសាសន៍មួយចំនួនជូនដល់មន្ទីរទេសចរណ៍ខេត្តប៉ៃលិន ដើម្បីជាយន្តការសម្រាប់ការអនុវត្តកិច្ចការងារប្រកបដោយបរិយាបន្ន និងនវានុវត្តន៍រួមមានដូចខាងក្រោម៖

១)បន្ត និងពង្រឹងការបណ្តុះបណ្តាលផ្នែកធនធានមនុស្សក្នុងវិស័យទេសចរណ៍ ជាពិសេសបន្តអនុវត្តគម្រោងបណ្តុះបណ្តាលបដិសណ្ឋារកិច្ចកម្ពុជា (HoKa)
២)បណ្តុះបណ្តាលជំនាញមគ្គុទ្ទេសន៍ទេសចរណ៍សហគមន៍ ដល់ប្រជាសហគមន៍មូលដ្ឋាន
៣)ជំរុញការសាងហេដ្ឋារចនាសម្ព័ន្ធតភ្ជាប់ និងសម្បទាទេសចរណ៍នៅតាមគោលដៅទេសចរណ៍សំខាន់ៗ
៤)បន្តការសម្របសម្រួលការធ្វើដំណើរទេសចរណ៍ ជាពិសេសតាមច្រកទ្វារព្រំដែនអន្តរជាតិ ជាពិសេសការចងក្រងកញ្ចប់ទស្សនកិច្ចភ្ជាប់ខេត្តប៉ៃលិនជាមួយខេត្តជុំវិញ និងប្រទេសថៃ
៥)ពង្រឹងសុវត្ថិភាព សន្តិសុខជូនភ្ញៀវទេសចរឱ្យកាន់តែល្អប្រសើរ
៦)ត្រូវមានយន្តការសង្រ្គោះបន្ទាន់ឱ្យទាន់ពេលវេលាជូនភ្ញៀវទេសចរជាតិ និងអន្តរជាតិ
៧)បន្តនិងពង្រឹងអភិវឌ្ឍផលិតផលទេសចរណ៍ប្រកបដោយនវានុវត្តន៍ ត្រូវគិតគូរពីបរិស្ថាន
៨)ពង្រឹងអនាម័យនៅក្នុងបរិវេណរមណីយដ្ឋានទេសចរណ៍ឱ្យបានល្អប្រសើរ

៩)ត្រូវធ្វើបច្ចុប្បន្នភាពរមណីយដ្ឋានទេសចរណ៍ដោយផ្អែកលើស្ថានភាពជាក់ស្តែង និងការគាំទ្រដល់វិស័យឯកជនក្នុងការអភិវឌ្ឍន៍គោលដៅទេសចរណ៍
១០)រៀបចំស្ថិតិទេសចរណ៍ប្រចាំសប្តាហ៍ ដើម្បីរាយការណ៍ជូនថ្នាក់ដឹកនាំទទួលបន្ទុកផ្ទាល់
១១)រៀបចំប្រតិទិននៃព្រឹត្តិការណ៍ទាក់ទាញទេសចរណ៍នានាដែលមាននៅខេត្តប៉ៃលិន ជាពិសេសជំរុញសកម្មភាពទេសចរណ៍អំឡុងរដូវកាលទេសចរណ៍ប៉ៃតង (Green Season)
១២)ត្រូវពង្រឹងការអនុវត្តបទដ្ឋានទេសចរណ៍នានាដែលបានដាក់ចុះ និងជំុរញអាជ្ញាប័ណ្ណទេសចរណ៍នៅតាមមូលដ្ឋានអាជីវកម្មទេសចរណ៍នានា
១៣)ត្រូវរៀបចំចងក្រងម្ហូបអាហារប្រចាំខេត្ត ដើម្បីជាផ្នែកមួយនៃការទាក់ទាញទេសចរម្ហូបអាហារ (Gastronomy)
១៤)ត្រូវរំលេចប្រភេទផ្លែឈើដែលជាអត្តសញ្ញាណសម្រាប់សំគាល់ខេត្តប៉ៃលិន
១៥)បង្កើនការផ្សព្វផ្សាយពាក្យស្លោក “ម្នាក់ៗ ជាអ្នកផ្សព្វផ្សាយទេសចរណ៍កម្ពុជាម្នាក់” និង “ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍” ឱ្យបានទូលំទូលាយ
១៦)តាមប្រសាសន៍ដ៏ខ្ពង់ខ្ពស់បំផុតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា បានដាក់ចេញនូវពាក្យស្លោកបន្ថែមថា «ទេសចរណ៍រីកលូតលាស់នៅក្នុងសន្ដិភាព» ដោយឈរលើគោលការណ៍គ្រឹះ “ទេសចរណ៍ផ្សារភ្ជាប់នឹងទឹកដី” ដូច្នេះត្រូវបន្តផ្សព្វផ្សាយពាក្យស្លោកនេះឱ្យបានកាន់ទូលំទូលាយក្នុងក្រមខណ្ឌវិស័យទេសចរណ៍។
១៧) បន្តការអនុវត្តការងារប្រកបដោយបុរេសកម្ម សកម្ម និងអន្តរសកម្មនូវរាល់ការអនុវត្តនូវយុទ្ធសាស្ត្រ ផែនការអភិវឌ្ឍន៍ និងសកម្មភាពនានាក្នុងវិស័យទេសចរណ៍ខេត្តប៉ៃលិន។