ភ្នំពេញ ៖ បច្ចុប្បន្ន ទីផ្សារមូលបត្រនៅកម្ពុជា ក្លាយជាច្រកមួយសម្រាប់ការធ្វើពិពិធកម្មហិរញ្ញប្បទានដល់ក្រុមហ៊ុន និងជាឱកាសវិនិយោគសម្រាប់វិនិយោគិន។​ ជាក់ស្តែង គិតត្រឹមចុងត្រីមាសទី២ ឆ្នាំ២០២៤ ទីផ្សារមូលបត្រកម្មសិទ្ធិនៅកម្ពុជាមានទំហំទឹកប្រាក់ចំនួនប្រហែល ២,៧៣ ប៊ីលានដុល្លារអាមេរិក។ នេះបើយោងតាមរបាយការណ៍ “ព្រឹត្តិបត្រវិនិយោគិន និងការវិនិយោគប្រចាំត្រីមាសទី២ ឆ្នាំ២០២៤” របស់និយ័តករមូលបត្រកម្ពុជា។

របាយការណ៍បានឱ្យដឹងថា នាពេលបច្ចុប្បន្ន ផ្សារមូលបត្រកម្ពុជា (ផមក) មានផលិតផលចំនួន ២ប្រភេទ គឺមូលបត្រកម្មសិទ្ធិ (ភាគហ៊ុន) និងមូលបត្របំណុលដែលកំពុងត្រូវបានជួញដូរនៅលើទីផ្សារ។ ចំពោះទីផ្សារមូលបត្រកម្មសិទ្ធិមានក្រុមហ៊ុនចុះបញ្ជីសរុបចំនួន ១១ ក្រុមហ៊ុន ដោយនៅក្នុងនោះមានក្រុមហ៊ុនចំនួន ៩ បានចុះបញ្ជីនៅទីផ្សារគោល និងក្រុមហ៊ុនចំនួន ២ បានចុះបញ្ជីនៅទីផ្សារកំណើន។ រីឯទីផ្សារមូលបត្របំណុលមានក្រុមហ៊ុនចំនួន ១២ បានបោះផ្សាយលក់មូលបត្របំណុល (ក្នុងនោះមូលបត្របំណុលដែលកំពុងចុះបញ្ជីមានចំនួន ១០ ហើយមានមូលបត្របំណុលចំនួន ៧ បានដល់ឥណប្រតិទាន)។

របាយការណ៍បានបង្ហាញថា គិតត្រឹមចុងត្រីមាសទី២ ឆ្នាំ២០២៤ ទំហំមូលធនូបនីយកម្មទីផ្សារសរុបនៃទីផ្សារមូលបត្រកម្មសិទ្ធិមានចំនួនប្រហែល ១១,២២ ទ្រីលានរៀល (ប្រហែល ២,៧៣ ប៊ីលានដុល្លារអាមេរិក) និងទំហំជួញដូរភាគហ៊ុនសរុបមានចំនួន ១០.៥៨៧.០៣៧ ភាគហ៊ុន ដែលទំហំជួញដូរនៅក្នុងទីផ្សារគោលមានប្រហែល ៩២,៣៩% និងទីផ្សារកំណើនមានចំនួនប្រហែល ៧,៦១% នៃទំហំជួញដូរសរុប។ ដោយឡែកចំពោះ ទីផ្សារមូលបត្របំណុលពុំមានការជួញដូរលើសញ្ញាបណ្ណសាជីវកម្មណាមួយទេ។

ឯកឧត្តម ស៊ូ សុជាតិ អគ្គនាយកនៃនិយ័តករមូលបត្រកម្ពុជា បានមានប្រសាសន៍ថា ទីផ្សារមូលបត្របាន និងកំពុងតែមានការរីកចម្រើន និងបានឆ្លុះបញ្ចាំងឱ្យឃើញថា ទាំងក្រុមហ៊ុន និងវិនិយោគិនកំពុងផ្តល់ទំនុកចិត្តដល់ទីផ្សារមួយនេះ ខណៈដែលទីផ្សារមូលបត្រនេះបានក្លាយជាច្រកមួយសម្រាប់ការធ្វើពិពិធកម្មហិរញ្ញប្បទានដល់ក្រុមហ៊ុន និងជាឱកាសវិនិយោគសម្រាប់វិនិយោគិនផងដែរ។

គួរបញ្ជាក់ផងដែរថា ឆ្នាំ ២០២៣ កន្លងទៅនេះ គឺជាឆ្នាំមួយដែលផ្សារមូលបត្រកម្ពុជា ទទួលបានចំនួនក្រុមហ៊ុនចុះបញ្ជីច្រើនជាងគេ រួមមានក្រុមហ៊ុនចុះបញ្ជីលក់មូលបត្រកម្មសិទ្ធិចំនួន២ និងសញ្ញាបណ្ណសាជីវកម្មចំនួន៣។ គិតត្រឹមចុងឆ្នាំ២០២៣ ផ្សារមូលបត្រកម្ពុជាមានក្រុមហ៊ុនចុះបញ្ជីចំនួន២២ ដែលរួមមានក្រុមហ៊ុនចំនួន១១ បានចុះបញ្ជីជាមូលបត្រកម្មសិទ្ធិ និងក្រុមហ៊ុន១១ ទៀតបានចុះបញ្ជីជាសញ្ញាបណ្ណសាជីវកម្ម ហើយក្រុមហ៊ុនទាំង ២២ នេះ បានប្រមូលទុនពីផ្សារមូលបត្រសរុបប្រមាណជា ៣៥៩ លានដុល្លារអាមេរិក។

ឯកឧត្តម ហុង សុហួរ អគ្គនាយកនៃផ្សារមូលបត្រកម្ពុជា ធ្លាប់បានមានប្រសាសន៍ថា ផ្សារមូលបត្រកម្ពុជា ក៏មានមហិច្ឆតាចង់ឱ្យចំនួនគណនីជួញដូរនឹងកើនឡើងដល់ ១០ ម៉ឺនគណនីជួញដូរក្នុងឆ្នាំ២០២៤ ខាងមុខនេះ និងសម្រេចបានទំហំជួញដូរភាគហ៊ុនប្រចាំថ្ងៃជាមធ្យម ១០០ លានដុល្លារអាមេរិកត្រឹមឆ្នាំ២០៣០។ ជាមួយគ្នានេះ ក៏បានស្នើសុំឱ្យមានការចូលរួម និងគាំទ្រពីភាគីពាក់ព័ន្ធទាំងអស់ ដើម្បីអភិវឌ្ឍទីផ្សារមួយនេះបោះជំហានទៅមុខមួយកម្រិតទៀត៕