ភ្នំពេញ៖ ការលើកកម្ពស់ចំណេះដឹងហិរញ្ញវត្ថុ គឺជាកិច្ចការអាទិភាពមួយដ៏សំខាន់សម្រាប់សមាគមមីក្រូហិរញ្ញវត្ថុកម្ពុជា ។ ចំណេះដឹងហិរញ្ញវត្ថុនឹងជួយឱ្យប្រជាពលរដ្ឋធ្វើការសម្រេចចិត្តបានត្រឹមត្រូវលើផ្នែកហិរញ្ញវត្ថុ និងសេដ្ឋកិច្ចគ្រួសារ ដែលចូលរួមចំណែកយ៉ាងសំខាន់ដល់ការអភិវឌ្ឍសង្គមជាតិ។

លោកជំទាវ ឌិត នីតា ប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជា បានថ្លែងដូច្នេះក្នុងកម្មវិធី «វិថីហិរញ្ញវត្ថុរដូវកាលទី២» នៅរាជធានីភ្នំពេញ កាលពីដើមសប្តាហ៍នេះ។

លោកជំទាវ បានលើកឡើងថា៖

«នាពេលកន្លងមក សមាគមមីក្រូហិរញ្ញវត្ថុកម្ពុជា បានដាក់ចេញគំនិតផ្តួចផ្តើមជាច្រើនដើម្បីលើកកម្ពស់ចំណេះដឹងហិរញ្ញវត្ថុក្នុងចំណោមសមាជិក អតិថិជន និងសាធារណជនឱ្យកាន់តែទូលាយ។ កិច្ចខិតខំប្រឹងប្រែងទាំងនោះរួមមានការអនុវត្តនូវយុទ្ធនាការផ្សព្វផ្សាយចំណេះដឹងហិរញ្ញវត្ថុប្រចាំសប្តាហ៍តាមរយៈបណ្តាញសង្គមរបស់សមាគម ដែលមានការចូលរួមពីសមាជិករបស់សមាគម និងដៃគូផ្សព្វផ្សាយនានា។ សមាគមបានជំរុញ និងលើកទឹកចិត្តសមាជិករបស់សមាគមឱ្យរៀបចំមាតិការចំណេះដឹងហិរញ្ញវត្ថុ និងផ្សព្វផ្សាយឱ្យបានទំលំទូលាយជូនសាធារណជន និងអតិថិជន។ ជាមួយគ្នានេះ សមាគមមីក្រូហិរញ្ញវត្ថុ ក៏បានចូលរួមជាមួយធនាគាជាតិនៃកម្ពុជា ក្នុងការបញ្រ្ជាបចំណេះដឹងផ្នែកហិរញ្ញវត្ថុទៅក្នុងកម្មវិធីសិក្សាចំណេះទូទៅដំណាក់កាលទី៣ជាមួយក្រសួងអប់រំ យុវជន និងកីឡា»។

លោកជំទាវប្រធានក្រុមប្រឹក្សាភិបាលបានបន្តថា៖ សមាគមមីក្រូហិរញ្ញវត្ថុកម្ពុជា បានចូលរួមជាមួយធនាគាជាតិនៃកម្ពុជារៀបចំសិក្ខាសាលាស្តីពី «វិស័យមីក្រូហិរញ្ញវត្ថុនៅកម្ពុជា» ដែលធ្វើទ្បើងជាប្រចាំនៅតាមបណ្តាខេត្ត ស្រុក ក្រុង ទូទាំងប្រទេស ក្នុងគោលបំណងលើកកម្ពស់ការយល់ដឹងអំពីវិស័យមីក្រូហិរញ្ញវត្ថុ ចំណេះហិរញ្ញវត្ថុ និងកិច្ចការពារអតិថិជនដល់ប្រជាពលរដ្ឋ និងអាជ្ញាធរនៅតំបន់មូលដ្ឋាន។ មិនត្រឹមតែប៉ុណ្ណោះ បានសហការរៀបចំ និងអនុវត្តគម្រោងសុវត្ថិភាពហិរញ្ញវត្ថុក្នុងសហគមន៍ (Safe Finance in Community) ចាប់តាំងពីឆ្នាំ២០២៣ ។ ក្រៅពីនេះ សមាគមបាន និងកំពុងដាក់ឱ្យអនុវត្តជាផ្លូវការនូវគម្រោងសុវត្ថិភាពហិរញ្ញវត្ថុក្នុងសហគមន៍នៅខេត្តចំនួន៤ រួមមាន ខេត្តកំពង់ធំ ខេត្តបាត់ដំបង ខេត្តកំពង់ស្ពឺ និងខេត្តស្វាយរៀង។ គម្រោងនេះមានគោលបំណងលើកកម្ពស់ចំណេះដឹងផ្នែកហិរញ្ញវត្ថុ សិទ្ធិ និងកិច្ចការពារអតិថិជនក្នុងចំណោមប្រជាពលរដ្ឋ ជាពិសេសនៅតាមសហគមន៍មូលដ្ឋានដោយជំរុញឱ្យសុវត្ថិភាពផ្នែកហិរញ្ញវត្ថុក្លាយជាសូចនាករមួយនៃភូមិ-ឃុំ មានសុវត្ថិភាពត្រឹមឆ្នាំ២០៣០។

គម្រោងនេះដឹកនាំដោយធនាគារជាតិនៃកម្ពុជា និងទទួលបានការគាំទ្រ និងកិច្ចសហការពីសមាគមធនាគារនៅកម្ពុជា និងក្រុមហ៊ុន ក្រេឌីត ប្យួរ៉ូ (ខេមបូឌា) ខូ អិលធីឌី ដោយជាលទ្ធផល មកទល់នឹងពេលនេះ គម្រោងបាន និងកំពុងអនុវត្តការផ្សព្វផ្សាយដល់ប្រជាពលរដ្ឋនៅតាមបណ្តាឃុំនីមួយៗ ក៏ដូចជាការរៀបចំសិក្ខាសាលាបណ្តុះបណ្តាលដល់គ្រូលបង្គាល ព្រមទាំងសម្រេចបាននូវការបោះពុម្ពសៀវភៅមេរៀនអំពីការពង្រឹងសុវត្ថិភាព ហិរញ្ញវត្ថុក្នុងសហគមន៍ដោយជោគជ័យផងដែរ។ សមាគមក៏កំពុងរៀបចំបំពាក់ចំណេះដឹងហិរញ្ញវត្ថុជូនអតិថិជនផងដែរ តាមរយៈភ្នាក់ងារឥណទានដែលជាបុគ្គលិករបស់គ្រឹះស្ថានសមាជិករបស់សមាគម។

លោកជំទាវ ឌិត នីតា បានបង្ហាញនូវជំនឿជឿជាក់យ៉ាងមុតមាំថា សកម្មភាពទាំងឡាយពាក់ព័ន្ធនឹងការពង្រឹងចំណេះដឹងហិរញ្ញវត្ថុ ដែលសមាគមបានអនុវត្ត និងគ្រោងអនុវត្តជាបន្តបន្ទាប់ មិនត្រឹមតែចូលរួមសម្រេចបានផែនការយុទ្ធសាស្ត្ររបស់សមាគមប៉ុណ្ណោះទេ តែក៏ជាការរួមចំណែកដ៏សំខាន់ដើម្បីសម្រេចបានផែនការយុទ្ធសាស្ត្រជាតិស្តីពីបរិយាបន្នហិរញ្ញវត្ថុឆ្នាំ២០១៩-២០២៥ របស់ធនាគារជាតិនៃកម្ពុជា និងគោលនយោបាយផ្សេងៗទៀតរបស់រដ្ឋាភិបាលផងដែរ។

គួរំលឹកផងដែរថា កាលពីកិច្ចពិភាក្សាលើកទី១ កម្មវិធីវិថីហិរញ្ញវត្ថុបានលើកយកប្រធានបទស្តីពី «រៀបចំគោលដៅអនាគតដោយចាប់ផ្តើមរៀបចំផែនការហិរញ្ញវត្ថុ» ដែលបានផ្តល់ចំណេះដឹងទៅកាន់អ្នកចូលរួមថា ការរៀបចំគោលដៅអនាគតត្រូវចាប់ផ្តើមពីការរៀបចំផែនការហិរញ្ញវត្ថុជាមុន ដែលអាចជួយឱ្យយើងមានផែនទីបង្ហាញផ្លូវមួយនៅក្នុងការប្រើប្រាស់ថវិកា ដូចជា សម្រាប់យកទៅវិនិយោគ យកទៅសិក្សា សម្រាប់សន្សំ សម្រាប់ប្រើប្រាស់នៅពេលមានអាសន្ន សម្រាប់គោលដៅអនាគត ការសិក្សាបន្ថែម ការធ្វើដំណើរកម្សាន្ត ឬការចាប់ផ្តើមអាជីវកម្មជាដើម។ ផែនការហិរញ្ញវត្ថុ ក៏អាចជួយយើងទាំងអស់គ្នា ក៏ដូចជាប្អូនៗសិស្ស-និស្សិតឱ្យមានលទ្ធភាពកំណត់ និងសម្រេចបាននូវគោលដៅហិរញ្ញវត្ថុរយៈពេលខ្លី និងរយៈពេលវែង។ នៅពេលដែលយើងចេះរៀបចំផែនការ យើងអាចជៀសវាងនូវបញ្ហាផ្សេងៗ ដូចជា ការចាយវាយមិនចាំបាច់ បង្កើតទំលាប់សន្សំ បណ្តុះគំនិតវិនិយោគដោយថ្លឹងថ្លែងផលចំណេញជាមួយហានិភ័យ និងមានគោលដៅហិរញ្ញវត្ថុច្បាស់លាស់។

គួរកត់សម្គាល់ថា ក្រុមហ៊ុន Apsara Media Services (AMS) សមាគមធនាគារនៅកម្ពុជា (ABC) សមាគមមីក្រូហិរញ្ញវត្ថុកម្ពុជា (CMA) ក្រុមហ៊ុន ក្រេឌីត ប្យួរ៉ូ (ខេមបូឌា) គ្រឹះស្ថានជាសមាជិករបស់សមាគមទាំងពីរ ដៃគូទាំងជាតិ និងអន្តរជាតិ ក៏ដូចជាភាគីពាក់ព័ន្ធទាំងអស់ បានសហការគ្នាយ៉ាងជិតស្និទ្ធក្នុងការងារផ្សព្វផ្សាយ និងពង្រឹងចំណេះដឹងហិរញ្ញវត្ថុដល់ប្រជាជនកម្ពុជាក្នុងគ្រប់កម្រិត៕