ភ្នំពេញ​ ៖ ព្រឹត្តិការណ៍ប្រកួតកីឡាស៊ីហ្គេមលើកទី ៣២ និងអាស៊ានប៉ារ៉ាហ្គេម លើកទី១២ ឆ្នាំ ២០២៣ នេះ បានបង្ហាញពិភពលោកឱ្យឃើញថា កម្ពុជាគឺជាប្រទេសមួយមានភាពរីកចម្រើនយ៉ាងឆាប់រហ័ស ពិសេសគឺការរក្សាបានសន្តិភាព ដែលជាកត្តាដ៏សំខាន់បំផុតក្នុងការអនុញ្ញាតឱ្យប្រទេសកម្ពុជាអាចធ្វើជាម្ចាស់ផ្ទះរៀបចំព្រឹត្តិការណ៍ប្រកួតកីឡាស៊ីហ្គេមនេះ។

ការរៀបចំព្រឹត្តិការណ៍ប្រកួតកីឡាស៊ីហ្គេមនេះទៀតសោត កម្ពុជាត្រូវបានចំណាយថវិការាប់រយលានដុល្លារ ដើម្បីទទួលស្វាគមន៍ប្រតិភូកីឡាទាំងអស់ក្នុងអាស៊ីអាគ្នេយ៍។ ប៉ុន្តែមានសំនួរសួរថា តើប្រទេសកម្ពុជាបានថវិកាពីយ៉ាងច្រើនក្នុងការរៀបចំព្រឹត្តិការណ៍ប្រកួតកីឡាស៊ីហ្គេមលើកទី៣២ នេះ? ចម្លើយយ៉ាងខ្លីគឺថា ​រាជរដ្ឋាភិបាលកម្ពុជាបានថវិកាសន្សំតាំងពីយូរមកហើយ ដើម្បីរៀបចំព្រឹត្តិការណ៍ប្រកួតកីឡាស៊ីហ្គេមលើកទី ៣២ និងអាស៊ានប៉ារ៉ាហ្គេមលើកទី១២ នេះ។

សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ និងជាប្រធានគណៈកម្មាធិការជាតិ CAMSOC-CAMAPGOC ត្រូវបានដកស្តង់សម្តីពីគេហទំព័រ Cambodia 2023 ដោយសម្តេចពិជ័យសេនា បានបញ្ជាក់ដូច្នេះ ថា ព្រឹត្តិការណ៍ប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣នេះ គឺបានចំណាយថវិកា​ចំនួន ១១៨ លានដុល្លារអាមេរិក ដែលជាថវិកាសន្សំរបស់​រាជរដ្ឋាភិបាលកម្ពុជា តាំងពីយូរមកហើយ។

សម្តេចពិជ័យសេនា ទៀ បាញ់ បានសង្កត់ធ្ងន់ថា ការចំណាយក្នុងរង្វង់ ១១៨ លានដុល្លារនេះ គឺគិតទាំងពីការរៀបចំផ្នែកហេដ្ឋារចនាសម្ព័ន្ធគ្រប់បែបយ៉ាង តាំង​ពី៣ឆ្នាំមុនមកជាបន្តបន្ទាប់ ដោយសារការរៀបចំព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣នេះ ឱ្យ​មាន​លក្ខណៈសុក្រឹត ស្របតាមស្តង់ដាអន្តរជាតិទៅតាមប្រភេទកីឡានីមួយៗ។​

សម្តេចសេនាពិជ័យបានបញ្ជាក់ ៖

“ថវិកានេះបូកបញ្ជូលទាំងការចំណាយផ្សេងៗ ដូចជាការជួលមជ្ឈមណ្ឌលពិព័រណ៍ជ្រោយចង្វារ OCIC ទាំងមូល សម្រាប់ការរៀបចំការប្រកួតកីឡាក្នុងសាលមួយចំនួន ព្រមទាំងការចំណាយលើផ្នែកកីឡាពីគណៈកម្មាធិការជាតិអូឡាំពិកកម្ពុជា និងផ្នែកកីឡាជនពិការ។ បូករួមទាំងការចំណាយផ្សេងៗទៀតជាច្រើន ដូចជាបានចូលរួមប្រកួតព្រឹត្តិការណ៍កីឡាអន្តរជាតិនានា នៅក្រៅប្រទេស ដូចជាថ្លៃសំបុត្រយន្តហោះ ថ្លៃហូបចុកស្នាក់នៅជាដើម។ យើងបានចំណាយថវិកាជាបន្តបន្ទាប់ចាប់ពីពេលនោះមកដល់ពេលនេះ។”

ប្រមុខដឹកនាំរាជរដ្ឋាភិបាលកម្ពុជា សម្តេចតេជោ ហ៊ុន សែន បានសម្រេចចិត្តផ្តល់ការហូបចុកស្នាក់ និងការដឹកជញ្ជូនសម្រាប់ប្រតិភូកីឡាទាំងអស់ក្នុងអាស៊ីអាគ្នេយ៍ ដែលមកប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ​២០២៣ ដោយឥតគិតថ្លៃ (៧លានដុល្លារបន្ថែម) ដែលសរុបទាំងអស់ពេលនេះ ១១៨ លានដុល្លារអាមេរិក។

ដោយមានការលើកឡើងចំពោះការចំណាយក្នុងការរៀបចំស៊ីហ្គេមមុនៗពីបណ្តាប្រទេសជាម្ចាស់ផ្ទះកន្លងមក គឺកម្ពុជាបានចំណាយតិចជាងគេ។ ត្រង់ចំណុចនេះ សម្តេចពិជ័យសេនា ទៀ បាញ់ បានសង្កត់ធ្ងន់ថា ៖

“យើងបានគិតគូយ៉ាងហ្មត់ចត់ណាស់ ដោយកម្ពុជាធ្លាប់ក្រលំបាក ដូច្នេះការចំណាយថវិកាជាតិក្នុងចំនួននេះ គឺជាការសន្សំសំចៃ ប៉ុន្តែយើងរួបរួមគ្នាគ្រប់ផ្នែកទាំងអស់ធ្វើកិច្ចការដោយស្មារតីទទួលខុសត្រូវខ្ពស់ ដើម្បីជំរុញឱ្យ​ព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ជាប្រវត្តិសាស្ត្រដំបូងរបស់កម្ពុជាមានភាពអស្ចារ្យ។”

ថ្លែងជំនួបពិភាក្សាការងារជាមួយសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ឯកឧត្តម កៃរ៉ាឡា សាណាណា ហ្គូសម៉ៅ (Kay Rala Xanana Gusmao) អតីតប្រធានាធិបតី និងនាយករដ្ឋមន្ត្រីនៃប្រទេសទីម័រខាងកើត បានគោរពសម្ដែងនៅការភ្ញាក់ផ្អើលនៅចំពោះភាពរីកចម្រើនយ៉ាងឆាប់រហ័សរបស់ប្រទេសកម្ពុជាក្នុងរយៈពេល៣ ឆ្នាំកន្លងមក។

ឯកឧត្តមក៏បានអបអរសាទរជូនចំពោះប្រជាជនកម្ពុជាទាំងមូល ចំពោះការរៀបចំព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលកម្ពុជាធ្វើជាម្ចាស់ផ្ទះនាពេលនេះ។ ឯកឧត្តមបានមានប្រសាសន៍ទៀតថា ៖

“នេះជាលើកទី ១ ហើយ ដែលឯកឧត្តមបានធ្វើជាសាក្សី នៃព្រឹត្តិការណ៍ដ៏អស្ចារ្យ ដែលជាប្រវត្តិសាស្ត្រនេះ។”

ឯកឧត្តម ធាវ ឈីហាន ( Teo Chee Hean ) ទេសរដ្ឋមន្ដ្រី រដ្ឋមន្ដ្រីសម្របសម្រួលសន្ដិសុខជាតិសិង្ហបុរី បានគោរពសម្ដែងនូវការ អបអរសាទរជូនដល់​កម្ពុជា ដែលបានរៀបចំនូវព្រឹត្តិការណ៍ស៊ីហ្គេមបានយ៉ាងរលូន ​បានយ៉ាង​អស្ចារ្យ និងជោគជ័យ។ ឯកឧត្តម បានប្រសាសន៍ថា ៖

“កីឡាករ កីឡាការិនី និងអ្នកដែលមកចូលរួមបានទទួលនូវការរីករាយ និងបដិសណ្ឋារកិច្ចយ៉ាងកក់ក្តៅ។”

មិនត្រឹមប្រទេសទីម័រខាងកើត និងសិង្ហបុរីនោះទេ ប៉ុន្តែប្រទេសផ្សេងៗ បានក៏លើកឡើងផងដែរថា កម្ពុជាបានរៀបចំព្រឹត្តិការណ៍ស៊ីហ្គេមលើកទី ៣២ នេះ បានយ៉ាងល្អប្រសើរ និងទទួលស្វាគមន៍គណៈប្រតិភូកីឡា និងកីឡាករ-កីឡាការនីយ៉ាងកក់ក្តៅ បើទោះបីជាកម្ពុជាបានខកខានក្នុងការៀបចំព្រឹត្តិការណ៍ដ៏ធំក្នុងរយៈជាង ៦០ឆ្នាំ មកក៏ដោយ។

ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា បានលើកឡើងយ៉ាងខ្លី និងមានអត្ថន័យថា ៖

“យើងរៀបចំបែបនេះ (free ម្ហូបអាហារ និងការស្នាក់នៅ) មិនមែនមានន័យថា យើងជាអ្នកមានទេ តែយើងអាចនិយាយបានថា កម្ពុជាជាប្រទេសតូច តែមានបេះដូងធំ។”

សូមបញ្ជាក់ផងដែរថា កាលពីរាត្រីថ្ងៃទី៥ ខែឧសភា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអញ្ជើញប្រកាសបើកព្រឹត្តិការណ៍នៃការប្រកួតកីឡាស៊ីហ្គេម លើកទី៣២ ជាផ្លូវការ ប្រកបដោយភាពរីករាយ និងមោទកភាពបំផុតសម្រាប់កម្ពុជាដែលធ្វើជាម្ចាស់ផ្ទះ។ នៅក្នុងឱកាសនោះ សម្តេចតេជោនាយករដ្ឋមន្ត្រី ក៏បានមានប្រសាសន៍លើកឡើងនូវពាក្យស្លោកថា «កីឡារស់នៅក្នុងសន្តិភាព សន្តិភាពដើម្បីទាំងអស់គ្នា ទាំងអស់គ្នាដើម្បីសន្តិភាព»៕