ភ្នំពេញ ៖ ក្រុមវិនិយោគិនជនជាតិមីយ៉ាន់ម៉ាមួយក្រុមនៅក្នុងសប្ដាហ៍នេះ បានធ្វើដំណើរមកបំពេញទស្សនកិច្ចសិក្សា និងពិនិត្យលទ្ធភាពវិនិយោគនៅក្នុងទីផ្សារអចលនទ្រព្យនៅកម្ពុជាតាមរយៈការរៀបចំដោយសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាហៅកាត់ថា CVEA ។
ថ្នាក់ដឹកនាំសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) ដោយមានការសម្របសម្រួលពីលោក មាស សំអុល ទីប្រឹក្សាបច្ចេកទេស Digital សមាគម បានរៀបចំទទួលអ្នកវិនិយោគមីយ៉ាន់ម៉ាចំនួន១៣នាក់ និងធ្វើបទបង្ហាញអំពីទីផ្សារអចលនវត្ថុ និងច្បាប់ពាក់ព័ន្ធពីការវិនិយោគអចលនទ្រេព្យនៅកម្ពុជាផងដែរ។
បន្ទាប់ពីបានបញ្ចប់ប្រជុំពិភាក្សាគ្នាយ៉ាងលម្អិតរួច តំណាងសមាគម CVEA ក៏បានជូនដំណើរអ្នកវិនិយោគមីយ៉ាន់ម៉ាចុះសិក្សាគម្រោងខុនដូរបស់ក្រុមហ៊ុន Prince Real Estate និងគម្រោងរបស់ Urban Village ទៅដល់ទីតាំងអភិវឌ្ឍន៍ដោយផ្ទាល់។
ជាការគួរឱ្យកត់សម្គាល់ នៅក្នុងកំឡុងពេលចុះទស្សនកិច្ចដល់គម្រោងទាំងពីរខាងលើ អ្នកវិនិយោគទាំងអស់បានបង្ហាញពីការចាប់អារម្មណ៍ក្នុងការដាប់ដៃវិនិយោគលើគម្រោងខុនដូ និងកំពុងសិក្សាបន្ថែមទៅលើលទ្ធភាព និងទំហំបណ្តាក់ទុន ពីព្រោះថាដំណើរទស្សននាពេលនេះគឺទើបតែមកកម្ពុជាជាលើកដំបូង។
គួរឲ្យដឹងដែរថា អំឡុងពេលនៃការកើតមានបញ្ហា និងវិបត្តិនៅប្រទេសមីយ៉ាន់ម៉ា និងជាពេលវេលាវិបត្តិសេដ្ឋកិច្ចសកលផងដែរនោះ ក្រុមអ្នកវិនិយោគមីយ៉ាន់បានឈរនៅលំដាប់កំពូលជាអ្នកទិញខុនដូច្រើនជាងគេនៅក្នុងប្រទេសថៃ ហើយក៏ជាការវិនិយោគទៅលើទីផ្សារខុនដូដែលមានតម្លៃថ្លៃបើប្រៀបធៀបទៅនឹងការវិនិយោគនៅក្នុងតំបន់ដទៃទៀត៕