ភ្នំពេញ ៖ ជាមោទនភាពបំផុតរបស់កម្ពុជាតាមរយៈស្ថាបត្យកម្មដ៏អស្ចារ្យ និងភាពលេចធ្លោរបស់គម្រោងអាកាសយាដ្ឋានតេជោ ក្រុងតាខ្មៅ ដែលត្រូវបានបណ្តាញទូរទស្សន៍ CNN ដ៏ល្បីនៅលើពិភពលោកធ្វើកំណត់ត្រាថាជាស្ថាត្យកម្មកំពូលជាសកលទាំង១១ នាឆ្នាំ២០២៥។

តាមរយៈការផ្សាយរបស់បណ្តាញព័ត៌មាន CNN បានបង្ហាញថា ជារៀងរាល់ឆ្នាំ សំណង់អគារតូចធំប្រកបដោយបច្ចេកវិទ្យាទំនើប និងការឌីសាញប្លែកៗពីគ្នារាប់រយរាប់ពាន់បានលេចរូបរាងឡើងនៅតាមបណ្តាប្រទេសនានាលើពិភពលោក ប៉ុន្តែក្នុងនោះមានស្ថាបត្យកម្មសំណង់ល្អបំផុតមានត្រឹមតែ១១គម្រោងប៉ុណ្ណោះដែលត្រូវបានទាក់ចិត្តក្រុមការងាររបស់ទូរទស្សន៍ CNN ដែលជាបណ្តាញទូរទស្សន៍ដ៏ល្បីល្បាញមួយនៅលើពិភពលោក។

នៅថ្ងៃដំបូងនៃការបើទំព័រថ្មីគ្រឹះសករាជ ២០២៥ បណ្តាញទូរទស្សន៍ CNN បានធ្វើការចេញផ្សាយនូវអត្ថបទមួយដែលមានចំណងជើងធំៗថា “11 architecture projects set to shape the world in 2025″ឬមានន័យថា”គម្រោងស្ថាបត្យកម្មល្អបំផុតទាំង១១ប្រចាំឆ្នាំ២០២៥ ដែលនឹងអាចប្រែក្លាយមុខមាត់របស់ពិភពលោក” ហើយក្នុងនោះ គម្រោងអាកាសយានដ្ឋានអន្តរជាតិតេជោរបស់ប្រទេសកម្ពុជាគឺស្ថិតនៅលេខរៀងទី៥បន្ទាប់ពីអូស្ត្រាលី ជប៉ុន អង់គ្លេស និងកាណាដា។

CNN បានកោតសរសើរអំពីគម្រោងសាងសង់ដ៏អស្ចារ្យរបស់អាកាសយានដ្ឋានអន្តរជាតិតេជោ ក្រុងតាខ្មៅបែបនេះថា ៖

«សំណង់អាកាសយានដ្ឋានដែលសាងសង់ឡើងក្នុងទម្រង់បំផុសគំនិតដោយការរចនាបែបប្រពៃណីរបស់ខ្មែរ រួមមានដូចជាដំបូលរបស់អាកាសយានដ្ឋានត្រូវបានឌីសាញឡើងពីសាច់ឈើ ខណៈដែលដើមឈើជាច្រើនប្រភេទក៏នឹងមានវត្តមាននៅតាមចំកណ្តាលនៃសំណង់អគារផងដែរ»។

ទូរទស្សន៍ដដែលនេះក៏បានលើកឡើងអំពីចំណុចវិជ្ជមាន និងសំខាន់ៗរបស់សំណង់អាកាសយានដ្ឋានអន្តរជាតិដែលនឹងក្លាយទៅជាគម្រោងអាកាសយានដ្ឋានអន្តរជាតិធំបំផុតនៅអាស៊ីអាគេ្នយ៍មួយនេះថាបានបំពាក់ជាមួយនឹងប្រតិបត្តិការប្រើប្រាស់ថាមពលដែលមាននិរន្តភាពបំផុតផងដែរ ពីព្រោះថាមពលអគ្គិសនីមួយចំណែកធំនឹងទាញយកមកពីកសិដ្ឋានសូឡាដែលបានរៀបចំនៅក្នុងគម្រោងស្រាប់ហើយបច្ចុប្បន្នវាក៏ត្រូវបានចាត់ទុកថាជាគម្រោងដែមាននិរន្តភាពបំផុតចំពោះបរិស្ថាន (world’s greenestដោយ Architects Foster+Partners) ផងដែរ។

តាមរយៈអត្ថបទផ្សព្វផ្សាយដ៏គួរជាទីមោទនភាពមួយនេះគេជឿជាក់ថា ឈ្មោះរបស់កម្ពុជានឹងអាចបង្ហាញកាន់តែទូលំទូលាយនៅលើឆាកអន្តរជាតិ ក៏ដូចជាពិភពលោកស្គាល់កាន់តែច្បាស់បន្ថែមទៀតហើយកត្តានេះហើយនឹងក្លាយទៅជាចលករដ៏សំខាន់មួយក្នុងការទាក់ទាញភ្ញៀវទេសចរអន្តរជាតិ និងក៏ដូចជាក្រុមហ៊ុនអ្នកជំនួញ និងអ្នកវិនិយោគគ្រប់ជាតិសាសន៍ឲ្យចូលមករកស៊ីនៅក្នុងប្រទេសកម្ពុជាបានកាន់តែច្រើនឡើងថែមទៀតនាពេលខាងមុខ។

សូមបញ្ជាក់ថា អាកាសយានដ្ឋានអន្តរជាតិតេជោ គឺជាអាកាសយានដ្ឋាន Greenfield ដែលមានផ្ទៃដីសរុប ២ ៦០០ហិកតា ស្ថិតនៅចម្ងាយ ១៩គីឡូម៉ែត្រ ពីរាជធានីភ្នំពេញ។ វាត្រូវបានចាត់ថ្នាក់ជាអាកាសយានដ្ឋាន 4F ហើយនឹងត្រូវបានអភិវឌ្ឍជា ៣ដំណាក់កាល។ ថវិកាវិនិយោគសម្រាប់ដំណាក់កាលទី១ គឺ ១ ៥០០លានដុល្លារ ដោយមិនរាប់បញ្ចូលដីព្រលានយន្តហោះ។

អាកាសយានដ្ឋានអន្តរជាតិតេជោ ជាប្រភេទ 4F គឺប្រភេទព្រលានយន្តហោះធំ ដែលអាចនឹងស្រូបយក និងទទួលបានការហោះហើរពីឆ្ងាយឆ្លងទ្វីបដែលអាចឲ្យប្រភេទយន្តហោះធុនយក្ស រហូតដល់ Airbus A380-800 និង យន្តហោះ Boeing 747-800 ចុះចតបាន។

បើតាមការបញ្ជាក់ពី ឯកឧត្តម ស៊ីន ចានសិរីវុត្ថា រដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល បើគ្មានអ្វីប្រែប្រួលទេនោះ អាកាសយានដ្ឋានអន្តរជាតិតេជោ គ្រោងនឹងដាក់សម្ពោធជាផ្លូវការនៅក្នុងពាក់កណ្តាលឆ្នាំ២០២៥ (បំណាច់ឆមាសទី១) ក្រោមអធិបតីភាព របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា៕