សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេលជាង១ឆ្នាំកន្លះកន្លងមកនេះ ក្រសួងរៀបចំដែនដី នគរូបនីយកម្ម និងសំណង់ សម្រេចបានការវាស់វែង និងចុះបញ្ជីដីធ្លីចំនួនប្រមាណ ៣លាន ៧សែនក្បាលដី ហើយរំពឹងថា ការវាស់វែង និងចុះបញ្ជីដីធ្លីនៅក្នុងប្រទេសកម្ពុជានឹងបញ្ចប់នៅអំឡុងខែមេសា ឬអំឡុងបុណ្យចូលឆ្នាំខ្មែរខាងមុខនេះ ។ នេះបើតាមប្រសាសន៍ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ។
ថ្លែងនៅក្នុងពិធីបើកសិក្ខាសាលាផ្សព្វផ្សាយពីសេវាសាធារណអនឡាញរបស់ក្រសួងរៀបចំដែនដី នគរូបនីយកម្ម និងសំណង់ ឯកឧត្តម សាយ សំអាល់ បានមានប្រសាសន៍ថា បន្ទាប់ពីបញ្ចប់ការវាស់វែង និងចុះបញ្ជីដីធ្លីទាំងស្រុងនៅកម្ពុជា ក្រុមការងាររបស់ក្រសួងនឹងរៀបចំសម្អាតទិន្នន័យចាស់ៗកន្លងមក និងទិន្នន័យថ្មីដែលទើបបានចុះបញ្ជី ក៏ដូចជាត្រូវជម្រះវិវាទរវាងម្ចាស់ដី និងម្ចាស់ដី ដែលមានព្រំប្រទល់ជាប់គ្នាឱ្យដាច់ស្រលះ ។
ឯកឧត្តមបានបញ្ជាក់ថា ៖
«ការវាស់វែងដីដែលម្ចាស់ដីបានធ្វើរបងរួចរាល់ហើយ មិនពិបាកសម្រាប់ក្រុមការងារចុះវាស់វែងនោះទេ ប៉ុន្តែសម្រាប់ដីដែលមិនទាន់មានរបង ពេលក្រុមការងារចុះវាស់វែង ម្ចាស់ដីតម្រូវឱ្យចុចចំចំណុចកណ្ដាល ដែលជាការពិបាកមួយ ។ ពេលខ្លះសូម្បីតែដីមានរបងហើយ ក៏ពួកគាត់តម្រូវឱ្យចុចចំចំណុចកណ្ដាលរបងដែរ»។
ឯកឧត្តមបានបន្ថែមថា ការវាស់វែង និងចុះបញ្ជីដីធ្លី និងចេញបណ្ណជូនប្រជាពលរដ្ឋ នឹងបញ្ចប់វិវាទនៅទូទាំងប្រទេស ឬក៏អាចបញ្ចប់បានកាន់តែច្រើន ជាក់ស្ដែងកន្លងមកនេះ សំណុំរឿងវិវាទដែលមានរាប់ម៉ឺនករណី បានដោះស្រាយជាបន្តបន្ទាប់ ធ្លាក់មកនៅត្រឹមប្រមាណខ្ទង់ពាន់ករណី ហើយនឹងបន្តដោះស្រាយបញ្ចប់ជាបន្តបន្ទាប់ទៀតឱ្យបានចប់សព្វគ្រប់ ។ ពាក់ព័ន្ធនឹងវិស័យដីធ្លីនេះដែរ រាជរដ្ឋាភិបាលបានត្រៀមថវិកាប្រមាណ១០០លានដុល្លារសម្រាប់ផ្ដល់ជូនក្រសួងរៀបចំដែនដី នគរូបនីយកម្ម និងសំណង់ ដើម្បីវាស់វែង ចុះបញ្ជីចេញបណ្ណ និងបញ្ចប់វិវាទ ។
គួរបញ្ជាក់ថា តាមទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា គិតត្រឹមថ្ងៃទី៨ ខែមករា ឆ្នាំ២០២៥ ក្រសួងវាស់វែងដីធ្លីបានចំនួន ១២ ២១១ ២៥៩ក្បាលដី ក្នុងនោះចេញបណ្ណបានចំនួន ៨ ០៣១ ២១៧បណ្ណ ។ ដោយឡែកក្នុងអាណត្តិទី៧នៃរដ្ឋសភា ដែលមានរយៈពេលជាង១ឆ្នាំកន្លះកន្លងទៅនេះ ក្រសួងរៀបចំដែនដី នគរូបនីយកម្ម និងសំណង់ វាស់វែងបានចំនួន ៣ ៦៧៥ ៦៥៦ ក្បាលដី ចេញបណ្ណបានចំនួន ១ ១២៩ ២៨៤បណ្ណ និងចែកបណ្ណបានចំនួន ៨៤០ ៨៣៣បណ្ណ ។
របាយការណ៍បញ្ជាក់ថា ក្នុងអាណត្តិទី៧នេះ រាជរដ្ឋាភិបាលដែលមានក្រសួងរៀបចំដែនដីនគរូបនីយកម្ម និងសំណង់ជាសេនាធិការ នឹងវាស់វែងដីឱ្យបាន ៤ ៧៥០ ៣៦៧ក្បាលដី នឹងចេញបណ្ណឱ្យបានចនួន ៤ ៧៥០ ៣៦៧បណ្ណ ដោយប្រើប្រាស់កម្លាំងពីមន្ទីរ ខេត្តសរុបចំនួន ជាង៤០០០នាក់ ៕
Account
Security
Favourite Content