សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ផ្លូវចំនួន៣ខ្សែ ដែលបានតភ្ជាប់ទៅកាន់ខេត្តចំនួន២ក្នុងតំបន់សមុទ្រ នឹងជំរុញសក្ដានុពលដល់ការវិនិយោគ និងធ្វើឱ្យហាងឆេងដីធ្លីក៏ដូចជាសកម្មភាពទិញលក់ដីធ្លីនៅខេត្តតំបន់សមុទ្រទាំងពីរនេះ រួមទាំងដីនៅតាមបណ្ដោយផ្លូវទាំងនោះ មានសម្ទុះទិញលក់មួយកម្រិតទៀតផងដែរ ។
ផ្លូវទៅតំបន់សមុទ្ររួមមានខេត្តកែប និងកំពត ត្រូវបានរាជរដ្ឋាភិបាលកម្ពុជា ជំរុញយកចិត្តទុកដាក់ និងអភិវឌ្ឍន៍កាន់តែប្រសើរ ក្នុងនោះមានផ្លូវខ្លះបានសាងសង់ និងកំពុងដំណើរការ និងផ្លូវខ្លះទៀតស្ថិតនៅក្នុងដំណាក់កាលកំពុងជួសជុល និងលើកកម្ពស់គុណភាព ។
ផ្លូវជាតិលេខ៣ ជាផ្លូវដ៏សំខាន់ក្នុងការតភ្ជាប់ពីភ្នំពេញ ទៅកាន់ខេត្តកំពត ដែលផ្លូវនេះបានដាក់ឱ្យប្រើប្រាស់កាលពីដើមឆ្នាំ ២០២២ ហើយផ្លូវនេះមិនត្រឹមតែភ្ជាប់ពីភ្នំពេញ កាន់ខេត្តកំពតប៉ុណ្ណោះទេ តែវាបានតភ្ជាប់ពីបណ្ដាខេត្តផ្សេងទៀតរួមមានខេត្តកណ្ដាល ខេត្តតាកែវ កំពង់ស្ពឺ និងបណ្ដាខេត្តជាច្រើននទៀត ។ ចាប់តាំងពីផ្លូវជាតិលេខ៣ បានដាក់ឱ្យប្រើប្រាស់ឃើញថាសកម្មភាពចរាចរណ៍លើដងផ្លូវមួយនេះមានភាពមមាញឹកខ្លាំងដោយភ្ញៀវទេសចរជាតិអន្តរជាតិបានធ្វើដំណើរទៅកាន់តំបន់សមុទ្រខេត្តកំពត និងខេត្តកែប ដែលស្ថិតនៅមិនឆ្ងាយពីគ្មាន ។ ក្រៅពីនេះ សកម្មភាពដឹកជញ្ជូនទំនិញតាមបណ្ដោយផ្លូវនេះក៏កាន់តែមានភាពមមាញឹក ដែលធ្វើឱ្យដីតាមបណ្ដោយផ្លូវមួយនេះ មានការអភិវឌ្ឍកាន់តែច្រើនជាងមុន ជាមួយនឹងគម្រោងសាងសង់សំណង់រោងចក្រ ឃ្លាំងស្តុកទំនិញ និងបុរីលំនៅឋានផងដែរ ។
ផ្លូវលេខ៣១ និង៣៣ ដែលភ្ជាប់ពីបែកគុសទៅស្រុកកំពង់ត្រាច និងបន្តទៅកាន់ខេត្តកែប ទីរួមខេត្តកំពត ក៏មានសារសំខាន់ក្នុងការទាក់ទាញទេសចរ វិនិយោគិន និងសម្រាប់ដឹកទំនិញ ចែកចាយកក្នុងតំបន់ផងដែរ ។ ផ្លូវនេះ បាន និងកំពុងសាងសង់ជិតរួចរាល់ហើយ ដោយមន្ត្រីក្រសួងសាធារណការ និងដឹកជញ្ជូន បានបញ្ជាក់ថានឹងបញ្ចប់ការចាក់កៅស៊ូ ACនៅអំឡុងខែកក្កដា ឆ្នាំ ២០២៤នេះ និងបញ្ចប់ទាំងស្រុងនៅចុងឆ្នាំ២០២៤ ។ ផ្លូវនេះដែរ មានសារសំខាន់សម្រាប់ភ្ញៀវទេសចរទៅលេងខេត្តកែប និងខេត្តកំពត និងតភ្ជាប់ទៅកាន់ព្រំដែនកម្ពុជា វៀតណាម ព្រែកចាកក្នុងស្រុកកំពង់ត្រាច ហើយបើតាមគម្រោងផែនការមេនៃព្រែកជីកហ្វូណនតេជោ ក្នុងស្រុកកំពង់ត្រាចក៏គ្រោងនឹងបង្កើតមជ្ឈមណ្ឌលពាណិជ្ជកម្មធំមួយ ដែលគម្រោងនេះនឹងត្រូវការរៀបចំហេដ្ឋារចនាសម្ព័ន្ធបន្ថែមទៀតផងដែរ។
ផ្លូវលេខ៤១ ឬផ្លូវព្រះអង្គឌួង ដែលភ្ជាប់ពីផ្លូវជាតិលេខ៤ ទៅផ្លូវជាតិ៣ ត្រង់ចំណុចលោកយាយម៉ៅ ក៏មានសារសំខាន់ក្នុងតភ្ជាប់ពីតំបន់ផ្សេងៗទៅកាន់ខេត្តកំពត និងកែបផងដែរ ជាក់ផ្លូវនេះ បានភ្ជាប់ផ្លូវជាតិលេខ៤ផង ផ្លូវជាតិលេខ៥១ ហើយផ្លូវជាតិលេខ៥១ ក៏បានតភ្ជាប់មកពីផ្លូវជាតិលេខ៥ ដែលសុទ្ធតែផ្លូវសំខាន់ៗ ប្រទាក់ក្រឡាគ្នា ។
ទន្ទឹមនឹងការកសាងហេដ្ឋារចនាសម្ព័ន្ធទាំងនេះ រដ្ឋបាលខេត្តនីមួយៗក៏បានអភិវឌ្ឍន៍តំបន់ទេសចរណ៍ ដើម្បីទាក់ទាញភ្ញៀវទេសចរនិងបង្កើតសក្ដានុពលនៃការវិនិយោគដើម្បីទាក់ទាញវិនិយោគិនទៅកាន់ទឹកដីរបស់ខ្លួនផងដែរ ។
អ្នកជំនាញអចលនទ្រព្យជាច្រើនបានលើកឡើងថា ការអភិវឌ្ឍហេដ្ឋារចនាសម្ព័ន្ធបានជះឥទ្ធិពលវិជ្ជមានដល់ទីផ្សារដីធ្លីនៅតាមបណ្ដោយផ្លូវទាំងនោះ ដោយនឹងធ្វើឱ្យតម្រូវការដីធ្លីនៅតាមបណ្ដោយផ្លូវនោះមានកំណើន ហើយបើកាលណាវាមានតម្រូវការច្រើន វាក៏អាចធ្វើឱ្យតម្លៃប្រែប្រួលជាងមុនដែរ ។
លោក ប៉ូ អ៊ាវគង់ អគ្គនាយកក្រុមហ៊ុន Advance បានលើកឡើងថា ទីផ្សារដីធ្លីនៅតាមបណ្ដោយផ្លូវ៤១ ផ្លូវជាតិលេខ៣ លេខ៣១ និង៣៣ អាចនឹងមានការប្រែប្រួល និងមានទីផ្សារជាងមុន នៅពេលអនាគតឆាប់ៗនេះ ក្រោយពីផ្លូវទាំងនេះសាងសង់រួចរាល់ ជាពិសេសនៅពេលស្ថានភាពសេដ្ឋកិច្ចល្អប្រសើរឡើងវិញ ។ លោកថា ការអភិវឌ្ឍផ្លូវទៅដល់ណា នឹងធ្វើឱ្យទីផ្សារដីធ្លី និងការអភិវឌ្ឍទៅដល់ទីនោះដែរ ជាក់ស្ដែងតំបន់ដែលមិនសូវមានការចាប់អារម្មណ៍ក៏ឃើញថាមានការចាប់អារម្មណ៍ និងកាន់តែមានការវិនិយោគខ្លាំងនៅពេលមានការអភិវឌ្ឍផ្លូវពីសំណាក់រាជរដ្ឋាភិបាល ៕
Account
Security
Favourite Content