ភ្នំពេញ ៖ សន្ទុះនៃការអភិវឌ្ឍបច្ចេកវិទ្យាឌីជីថលកាន់តែរីកចម្រើននាពេលបច្ចុប្បន្ន ជាពិសេសគឺវិស័យបច្ចេកវិទ្យាហិរញ្ញវត្ថុ ក៏ដូចជាគោលនយោបាយរបស់រដ្ឋាភិបាលក្នុងអាណ្ណត្តិទី៧នេះ ក្នុងការជំរុញវិស័យឯកជនធ្វើការចាប់យកបច្ចកវិទ្យាឌីជីថល ដើម្បីអភិវឌ្ឍន៍ខ្លួនឲ្យកាន់តែរីកចំរើនដើម្បីអាចប្រកួតប្រជែងនឹងក្រុមហ៊ុនក្នុងតំបន់បាន ។

ក្នុងគោលដៅជំរុញបច្ចេកវិទ្យាឌីជីថល និងធនធានមនុស្សលើវិស័យនេះ វិទ្យាស្ថានហិរញ្ញវត្ថុ និងគណនេយ្យ (IFA) រួមជាមួយនឹងក្រុមហ៊ុនបច្ចេកវិទ្យាឌីជីថលហិរញ្ញវត្ថុ (Localize) បានចុះហត្ថលេខាលើកិច្ចព្រមព្រៀងភាពជាដៃគូសហការកាលពីថ្ងៃ២៨ ខែមេសា ឆ្នាំ២០២៤។

គួរជម្រាបថា Localize គឺជាធុរកិច្ចថ្មីឌីជីថលក្នុងស្រុក ដែលផ្គត់ផ្គង់ប្រព័ន្ធគ្រប់គ្រងគណនេយ្យអនឡាញ សម្រាប់សហគ្រាសធនតូច និងមធ្យមឈ្មោះ (Localizebook)។ បេសកម្មរបស់ Localize គឺ ប្រើប្រាស់បច្ចេកវិទ្យាឌីជីថល ជួយសហគ្រាសធនតូច និងធនមធ្យម (SME) ឱ្យគ្រប់គ្រងការងារគណនេយ្យបានត្រឹមត្រូវ និងមានរបាយការណ៍ហិរញ្ញាវត្ថុច្បាស់លាស់ ដើម្បីរីកចំរើនប្រកបដោយនិរន្តភាព។ 

ចំណែកវិទ្យាសា្ថនហិរញ្ញវត្ថុនិងគណនេយ្យ (IFA) ជាវិទ្យាសា្ថនជំនាញក្នុងការបណ្តុះបណ្តាលធនធានមនុស្សផ្នែកគណនេយ្យ និងហិរញ្ញវត្ថុ ចាប់ពីថ្នាក់មូលដ្ឋានរហូតដល់បរិញ្ញាបត្រជាន់ខ្ពស់ ដែលមានបទពិសោធន៍ជិតស២០ឆ្នាំមកហើយ ។

តាមរយៈកិច្ចសហការរវាងLOCALIZE ដែលជាអ្នកបង្កើតបច្ចេកវិទ្យា ហិរញ្ញវត្ថុ ឌីជីថល និង វិទ្យាស្ថាន IFA ដែលជាអ្នកផលិតធនធានមនុស្សផ្នែកគណនេយ្យ និងហិរញ្ញវត្ថុ  នឹងផ្តល់ឱ្យសិស្សនិសិត្សកម្ពុជាយើងអាចមានលទ្ធភាពស្វែងយល់ និងចាប់យកបច្ចេកវិទ្យាឌីជីថល បានលឿនក្នុងកំឡុងពេលសិក្សាតែម្តង ដើម្បីពួកគាត់អាចយកចំណេះដឹងឌីជីថលនេះ ទៅបង្កើនប្រសិទ្ធភាព ក្នុងពេលបំពេញការងារនៅពេលអនាគតឲ្យបានលឿនដែលអាចធ្វើទៅបាន។

លោក ទុយ ហុង ស្ថាបនិក និងជាប្រធានក្រុមហ៊ុនឡូខលឡាយ ថេក សូលូសិន ឯក (LOCALIZE) បានថ្លែងក្នុងពិធីចុះ MOU ថា ៖ ដោយមើលឃើញស្ថាប័នទាំងពីរមានគោលដៅដូចគ្នា។LOCALIZE ជួយម្ចាស់អាជីវកម្មឲ្យមានការធ្វើបដិវត្តន៍កម្មឌីជីថលដោយប្រើប្រាស់សូហ្វវែរប្រើបច្ចេកវិទ្យា ចំណែកIFA មានជំនាញបណ្តុះបណ្តាលធនធានមនុស្ស ដូច្នេះកិច្ចសហការនេះនឹងបញ្ចូល  ផ្លេតហ្វម(Platform)បច្ចេកវិជ្ជាទៅក្នុងកម្មវិធីសិក្សានិងណែនាំទៅកាន់សិស្ស និស្សិតនិងដៃគូរបស់IFA។

លោក ទុយ ហុង បានបន្តថា៖

«វិទ្យាស្ថាន IFA មានជំនាញខាងបណ្តុះបណ្តាលធនធានមនុស្សផ្នែកគណនេយ្យចំណែក LOCA​LI​Z​E ជំនាញខាងផលិតបច្ចេកវិទ្យា ដូច្នេះយើងនឹងច្របាច់បញ្ចូលគ្នារវាងធនធានមនុស្ស និងបច្ចេកវិទ្យាឲ្យចាប់យកវិស័យឌីជីថលឱ្យបានលឿន។ ជាទូទៅ នៅស្រុកខ្មែរនិស្សិតរៀនតែទ្រឹស្ដីពេលចេញទៅធ្វើការទើបចាប់ផ្ដើមបញ្ចូលបច្ចេកវិទ្យាឌីជីថល ដូច្នេះការចាប់យកឌីជីថលយឺត។ការបញ្ជូលបច្ចេកវិទ្យាឌីជីថលតាំងពីឆ្នាំទី១ ព្រមជាមួយទ្រឹស្តី និងការអនុវត្តជាក់ស្តែង នឹងធ្វើឱ្យការចាប់យកឌីជីថលបានលឿន។ពេលចាប់យកបច្ចេកវិទ្យាឌីជីថលបានលឿន ប្រសិទ្ធភាពការងារក៏បានខ្ពស់ហើយពេលចេញបម្រើការឱ្យសហគ្រាសធនតូចនិងមធ្យម កាន់តែចំណេញ ដោយSME មិនចាំបាច់វិនិយោគលើការបញ្ជូនបុគ្គ លិកទៅរៀនបន្ថែម»។

លោក ប៊ុន សុន្ទរង្គ នាយកវិទ្យាស្ថានហិរញ្ញវត្ថុនិងគណនេយ្យ (IFA) បានមានប្រសាសន៍ឱ្យដឹងថា៖ LOCALIZE និង IFA នឹងសហការគ្នាដើម្បីសិក្សាលទ្ធភាពប្រើប្រាស់បច្ចេកវិទ្យាគណនេយ្យ Digital Accounting  ឬ Online Accounting ដើម្បីអាចឱ្យនិស្សិតនៅ IFA ស្វែងយល់បន្ថែម។

លោកបានបញ្ជាក់ថា ៖ បរិបទថ្មីនេះ ស្របតាមយុទ្ធសាស្ត្របញ្ចកោណដំណាក់កាលទីមួយដើម្បីជំរុញឲ្យប្រជាជនប្រើប្រាស់ប្រព័ន្ធឌីជីថល ដើម្បីជំរុញសេដ្ឋកិច្ចជាតិ។តាមរយៈMOUនេះ និស្សិតអាចចុះកម្មសិក្សាឱកាសការងារនៅLOCALIZE និង ផ្លាស់ប្តូរបទពិសោធគ្រូទៅវិញទៅមក ៕