បរទេស ៖ ក្រុមហ៊ុនមេរបស់ Wikipedia ដែលគេស្គាល់ជា The Wikimedia Foundation និងជាស្ថាប័នមិនរកប្រាក់ចំណេញនោះ បច្ចុប្បន្នកំពុងប្រឈមមុខទៅនឹងបញ្ហាដ៏គ្រោះថ្នាក់មួយចំពោះកិច្ចដំណើរប្រតិបត្តិការរបស់ខ្លួន។

Wikimedia Foundation កាលពីថ្ងៃចុងសប្តាហ៍កន្លងទៅនេះបានប្រកាសថា Wikipedia ចាប់ផ្តើមធ្លាក់ចុះយ៉ាងខ្លាំងនៃចំនួនអ្នកចូលប្រើប្រាស់ (traffic) ក្នុងការស្វែងរកព័ត៌មាននានាពីសំណាក់អ្នកដែលធ្លាប់ប្រើលើបណ្តាញអ៊ិនធឺណេតដោយសារតែបច្ចេកវិទ្យាឆ្លាតវ៉ៃ ឬ AI ដែលកំពុងតែមានភាពរីកចម្រើនយ៉ាងខ្លាំងខ្លា និងមានការវិវឌ្ឍន៍ជារៀងរាល់ថ្ងៃ។

ប្រធានជាន់ខ្ពស់ផ្នែកផលិតផលរបស់ Wikimedia លោក Marshall Miller បានលើកឡើងថា បច្ចុប្បន្នចំនួនអ្នកប្រើប្រាស់ដែលចូលទស្សនាលើផ្ទាំងព័ត៌មានរបស់ Wikipedia មានចំនួនថយចុះប្រហែល ៨ភាគរយរួចទៅហើយក្នុងរយៈពេលប៉ុន្មានខែចុងក្រោយនេះ បើធៀបទៅនឹងតួលេខដែលមានកាលពីឆ្នាំ២០២៤។

ការធ្លាក់ចុះនេះត្រូវបានបង្ហាញជាសាធារណៈបន្ទាប់ពីស្ថាប័ននេះបានកែសម្រួលពីរបៀបដែលអាចបែងចែករវាងចរាចរលើវេបសាយរបស់ខ្លួនដែលប្រើប្រាស់ដោយមនុស្សពិតផ្ទាល់ និងការប្រើប្រាស់ដោយឧបករណ៍ស្វ័យប្រវត្តិ (bot)។ វាគឺជាការស្រាវជ្រាវ និងបានរកឃើញថា អ្នកចូលទស្សនាពិតប្រាកដ និងការអនុវត្តដែនកំណត់លើរបៀបដែល bots ដែលជាភាគីទី៣ អាចលួចចូលទិន្នន័យរបស់វាសម្រាប់ការស្វែងរកពាណិជ្ជកម្ម និងឧបករណ៍ AI។

ការ Up date នេះបានកើតឡើងបន្ទាប់ពី Wikipedia កត់សម្គាល់បាននូវអ្វីដែលមើលទៅដូចជាការកើនឡើងនៃ traffic ពីប្រទេសប្រេស៊ីល ប៉ុន្តែជាក់ស្តែងភាគច្រើនសុទ្ធតែជាសកម្មភាពដោយឧបករណ៍ស្វ័យប្រវត្តិ(bot)ប៉ុណ្ណោះ។

លោក Miller បានសរសេរថា៖

«យើងជឿថា ការធ្លាក់ចុះទាំងនេះ ឆ្លុះបញ្ចាំងពីផលប៉ះពាល់នៃ AI និងប្រព័ន្ធផ្សព្វផ្សាយសង្គមអំពីរបៀបដែលមនុស្សស្វែងរកព័ត៌មាន ជាពិសេសជាមួយនឹងម៉ាស៊ីនស្វែងរកដែលផ្តល់ចម្លើយដោយផ្ទាល់ដល់អ្នកស្វែងរក ទាំងដែលជារឿយៗវាក៏ផ្អែកទៅលើខ្លឹមសារ Wikipedia ដែរ»។

លោកបាន​សរសេរ​ដែរថា យ៉ាងណាក្តីការធ្លាក់ចុះ​នេះ​មិន​មែន​ជារឿងគួរឲ្យ​ភ្ញាក់​ផ្អើលពេកនោះ​ទេ។ ម៉ាស៊ីនស្វែងរកកំពុងប្រើប្រាស់ AI កាន់តែខ្លាំងឡើង ដើម្បីបង្ហាញចម្លើយដោយផ្ទាល់នៅលើទំព័រលទ្ធផល ជំនួសឱ្យការភ្ជាប់ទៅគេហទំព័រខាងក្រៅដូចជា Wikipedia ។ ដូច្នេះ ក្នុងពេលជាមួយគ្នានេះ អ្នកប្រើប្រាស់វ័យក្មេងកំពុងងាកទៅរកវេទិកាដូចជា YouTube និង TikTok សម្រាប់ព័ត៌មានវិញ។

ជាមួយគ្នានេះ ភាពប្រឈមមុខទៅនឹងបញ្ហានេះ អង្គការមិនរកប្រាក់ចំណេញ Wikipedia បាននិយាយថា ខ្លួនកំពុងធ្វើការដើម្បីធានាថាភាគីទី៣ អាចចូលប្រើប្រាស់ឡើងវិញបាននូវខ្លឹមសារ Wikipedia ប្រកបដោយទំនួលខុសត្រូវ និងក្នុងកម្រិតមួយ ដោយការអនុវត្តគោលនយោបាយរបស់ខ្លួន និងបង្កើតស្តង់ដារ គុណភាពកាន់តែច្បាស់។ ក្នុងនោះផងដែរ Wikipedia ក៏កំពុងធ្វើការពិសោធន៍ជាមួយនឹងវិធីថ្មីដើម្បីអាចទាក់ចិត្តទស្សនិកជនវ័យក្មេងឡើងវិញឲ្យដូចទៅនឹងវេទិកាផ្សេងទៀត រួមមាន YouTube, TikTok, Roblox និង Instagram វីដេអូ ហ្គេម និង chatbotsផងដែរ៕