សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពត ៖ចំនួនសត្វផ្សោតពណ៌ផ្កាឈូកនៅតំបន់សហគមន៍នេសាទព្រែកត្នោត ខេត្តកំពត បានកើនឡើងដល់ ៧០ក្បាល ខណៈផ្សោតក្បាលត្រឡោកពុំទាន់អាចកំណត់ចំនួនបាន ហើយសត្វជ្រូកទឹកស្នាក់នៅអចិន្ត្រៃយ៍ចំនួន១ក្បាល។ នេះបើតាមការឱ្យដឹងរបស់ក្រសួងកសិកម្ម រុក្ខាប្រមាញ់ និងនេសាទ។
ការកើនឡើងនៃចំនួនសត្វផ្សោតពណ៌ផ្កាឈូកនេះ បានទាក់ចិត្តភ្ញៀវទេសចរកាន់តែច្រើនឱ្យទៅលេងសហគមន៍នេសាទព្រែកត្នោតដ៏ស្រស់ស្អាតនេះតាមរយៈការផ្សព្វផ្សាយបានទូលំទូលាយពីសំណាក់ក្រសួង ស្ថាប័នសារព័ត៌មាន និងក្រុម Influencers ខណៈដែលចំនួនភ្ញៀវទៅកម្សាន្ត ជិះទូកមើលផ្សោតពណ៌ផ្កាឈូកមានកំណើនគួរឲ្យកត់សម្គាល់។
លោក អ៊ុក សុវណ្ណារិទ្ធ ប្រធានសហគមន៍នេសាទព្រែកត្នោត បានគូសបញ្ជាក់ថា ភ្ញៀវទេសចរមួយចំនួនដែលមានបំណងទៅទស្សនាសត្វផ្សោតពណ៌ផ្កាឈូក និងសត្វផ្សោតក្បាលត្រឡោក ត្រូវកក់ទូកមុនយ៉ាងហោចណាស់ ២ថ្ងៃ ដោយសារទូករបស់សហគមន៍នៅមានកម្រិត ខណៈភ្ញៀវទេសចរដែលចង់ទស្សនាសត្វផ្សោតមានចំនួនច្រើន។ ចំពោះការកក់ទូក ខ្ចុះ និងម្ហូបអាហារសម្រាប់ទទួលទាន ភ្ញៀវទេសចរអាចទាក់ទងតាមលេខទូរសព្ទ៖ ០៨៩ ២១៩ ៥២៤។
លោកប្រធានសហគមន៍បានថ្លែងអំណរគុណដល់ឯកឧត្តមរដ្ឋមន្ដ្រី ក្រសួង អាជ្ញាធរ និងស្ថាប័នពាក់ព័ន្ធដែលបានជួយការពារ បង្ក្រាបបទល្មើសនេសាទ ព្រមទាំងអភិរក្សធនធានធម្មជាតិ រាប់ចាប់តាំងពីព្រៃកោងកាងដែលក្លាយជាជម្រកនៃវារីសត្វដែលជាចំណីរបស់សត្វផ្សោត ការការពារ និងពង្រីកស្មៅសមុទ្រជាចំណីរបស់សត្វជ្រូកទឹក។
លោកបានបញ្ជាក់ថា៖
« សមិទ្ធផលនេះ បានជួយដល់ប្រជាសហគមន៍ ទាំងផ្នែកសេដ្ឋកិច្ច និងជាពិសេសនិរន្ដរភាពនៃធនធានធម្មជាតិ ស្របទៅតាមគោលនយោបាយរបស់ក្រសួងកសិកម្ម រុក្ខាប្រមាញ់ និងនេសាទ ដែលប្រឹងប្រែងធ្វើយ៉ាងណាឱ្យប្រជាជនកម្ពុជា «មានហូប មានបាន មានប្រើ និងមានរហូត»។
លោកបានឱ្យដឹងថាទៀតថា៖ នៅក្នុងសហគមន៍នាពេលបច្ចុប្បន្ននេះមានប្រភេទសត្វកម្រៗដូចជា ផ្សោតពណ៌ផ្កាឈូក ផ្សោតក្បាលត្រឡោក ជ្រូកទឹក ត្រីសេះ និងអណ្តើកសមុទ្រជាដើម។ សហគមន៍ក៏សម្បូរទៅដោយធនធានធម្មជាតិសមុទ្រផ្សេងទៀត ដូចជា ក្តាម ត្រី បង្កង បង្គា ជាដើម ហើយសកម្មភាពអភិរក្សធនធានសមុទ្រក្នុងសហគមន៍នេសាទព្រែកត្នោត មានដូចជាការចុះល្បាតទប់ស្កាត់បទល្មើសនេសាទ ការការពារស្មៅសមុទ្រដែលជាប្រភពចំណី ជាជម្រករបស់សត្វសមុទ្រ និងជីវចម្រុះដទៃទៀត ក៏ដូចជាការទប់ស្កាត់ការកាប់ព្រៃកោងកាង និងដាំកោងកាងឡើងវិញជាដើម។
សូមបញ្ជាក់ថា សហគមន៍នេសាទព្រែកត្នោត មានទីតាំងនៅភូមិព្រែកត្នោត ឃុំព្រែកត្នោត ក្រុងបូកគោ ខេត្តកំពត។ សហគមន៍នេះ មានទំហំ ១១៦៨ហិកតា ក្នុងនោះប្រមាណ ២០ហិកតាគ្របដណ្តប់ដោយព្រៃកោងកាង។ សហគមន៍នេសាទព្រែកត្នោត បង្កើតឡើងក្នុងឆ្នាំ២០១២ ក្នុងគោលបំណងការពារ និងអភិរក្សាធនធានធម្មជាតិដែលមានសក្តានុពល ជាពិសេសគឺអភិរក្សសត្វសមុទ្រកម្រៗដែលមាននៅក្នុងដែនគ្រប់គ្រងរបស់សហគមន៍ ដូចជា សត្វផ្សោតពណ៌ផ្កាឈូក ផ្សោតក្បាលត្រឡោក ជ្រូកទឹក ត្រីសេះ និងអណ្តើកសមុទ្រជាដើម៕
Account
Security
Favourite Content