បរទេស ៖ យោងតាមប្រភពព័ត៌មានពី Visasnews បានរាយការណ៍ថា រដ្ឋាភិបាលថៃបានអនុញ្ញាតភ្ញៀវទេសចរមកពី ៩៣ ប្រទេសអាចស្នាក់នៅក្នុងប្រទេសថៃបានរយៈពេល ៦០ថ្ងៃដោយមិនចាំបាច់មានទិដ្ឋាការ ឬ Visa ក្នុងគោលបំណងជំរុញកំណើនសេដ្ឋកិច្ច និងទេសចរក្នុងស្រុក។

កាលពីខែឧសភាកន្លងទៅនេះ ថៃបានប្រកាសអំពីការផ្លាស់ប្តូរជាច្រើននាពេលខាងមុខចំពោះគោលនយោបាយទិដ្ឋាការរបស់ខ្លួន។ ក្នុងចំណោមការផ្លាស់ប្តូរទាំងនេះគឺការបន្ថែមរយៈពេលលើកលែងទិដ្ឋាការពី ៣០ ថ្ងៃទៅ ៦០ ថ្ងៃសម្រាប់ភ្ញៀវទេសចរមកពី ៩៣ ប្រទេស។ កាលពីដើមខែមិថុនានេះ អ្នកនាំពាក្យក្រសួងមហាផ្ទៃថៃ លោកស្រី Traisulee Traisoranakul លើកឡើងថា ក្រសួងមហាផ្ទៃថៃបានចេញផ្សាយព័ត៌មានថ្មីៗចំនួន ៤ អំពីគោលនយោបាយទិដ្ឋាការរបស់ប្រទេសអោយសមស្របជាមួយនឹងការប្រកួតប្រជែងជាសាកល ដើម្បីទាក់ទាញភ្ញៀវបរទេសកាន់តែច្រើន បង្កើតប្រាក់ចំណូលកាន់តែច្រើន និងជំរុញកំណើនសេដ្ឋកិច្ចថៃ។ បន្ថែមពីនេះ សេចក្តីប្រកាសទាំង ៤ នេះ គឺជាផ្នែកនៃគោលនយោបាយរបស់រដ្ឋាភិបាលនាយករដ្ឋមន្ត្រីថៃ សេ្រតថា ថាវីស៊ីន ក្នុងការជំរុញសេដ្ឋកិច្ចដោយទាក់ទាញភ្ញៀវទេសចរបរទេស និងសម្រួលដល់ការធ្វើដំណើរ។

យោងតាមអ្នកនាំពាក្យម្នាក់បានឲ្យដឹងថា លោក Anutin Charnvirakul ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃថៃ បានពិនិត្យ និងចុះហត្ថលេខាលើការធ្វើបច្ចុប្បន្នភាពទាំង ៤ នេះ ដើម្បីដាក់ជូននាយករដ្ឋមន្ត្រីចុះហត្ថលេខា។ បន្ទាប់មក ការអនុម័តនេះត្រូវបានបោះពុម្ពនៅក្នុង Royal Gazette ហើយបានចូលជាធរមានកាលពីថ្ងៃទី ១៥ ខែកក្កដាកន្លងទៅនេះ។ ជាលទ្ធផល ការស្នាក់នៅក្នុងប្រទេសថៃយៈពេល ៦០ ថ្ងៃដោយគ្មានទិដ្ឋាការសម្រាប់ភ្ញៀវទេសចរមកពី ៩៣ ប្រទេសបានចាប់ផ្តើមកាលពីថ្ងៃទី ១៥ ខែកក្កដាកន្លងទៅនេះ។ ខាងក្រោមនេះជាសេចក្តីប្រកាសចំនួន ៤ ដែលក្រសួងមហាផ្ទៃថៃដែលនឹងអនុវត្ត ៖

១. ការលើកលែងទិដ្ឋាការថៃអាចបន្តរយៈពេលដល់ ៦០ ថ្ងៃ ៖ ភ្ញៀវទេសចរដែលមានលិខិតឆ្លងដែន ឬឯកសារធ្វើដំណើរអាចចូលប្រទេសថៃជាបណ្តោះអាសន្នក្នុងគោលបំណងទេសចរណ៍ អាជីវកម្ម ឬការងាររយៈពេលខ្លី ហើយត្រូវបានលើកលែងពីតម្រូវការទិដ្ឋាការ នឹងអនុញ្ញាតឱ្យពួកគេស្នាក់នៅក្នុងប្រទេសថៃរហូតដល់ ៦០ ថ្ងៃ។ ឥឡូវនេះ បញ្ជី​នេះ​បាន​រួម​បញ្ចូល​ប្រទេស និង​ដែនដី​ចំនួន ៩៣ ដែល​កើន​ឡើង​ពី ៥៧ កាល​ពី​មុន។

២. ការអនុញ្ញាតឲ្យសញ្ជាតិច្រើនទៀតមានសិទ្ធិទទួលបានទិដ្ឋាការពេលមកដល់ប្រទេសថៃ៖ ការកើនឡើងនៃបញ្ជីប្រទេសដែលមានសិទ្ធិទទួលបាន Visa on Arrival (VOA) នៅច្រកត្រួតពិនិត្យអន្តោប្រវេសន៍បានបន្ថែមពី ១៩ ប្រទេសឡើងដល់ ៣១ ប្រទេស។

៣ . សេចក្តីណែនាំអំពី “ទិដ្ឋាការទៅប្រទេសថៃ”៖ ការណែនាំអំពីប្រភេទទិដ្ឋាការថ្មី “ទិដ្ឋាការគោលដៅប្រទេសថៃ” (DTV) សម្រាប់អ្នកដែលមានបំណងស្នាក់នៅក្នុងប្រទេសថៃ ក្នុងគោលបំណងធ្វើការផង និងធ្វើដំណើរផងក្នុងពេលដំណាលគ្នា។ វារួមបញ្ចូលទាំងបុគ្គលដែលមានជំនាញខ្ពស់ អ្នកធ្វើការឯករាជ្យ បុគ្កលិកអាចធ្វើការពីចម្ងាយ ឬអ្នកដែលចង់ស្នាក់នៅដើម្បីរៀនក្បាច់គុនថៃ ចូលរួមក្នុងការបណ្តុះបណ្តាលកីឡា ការព្យាបាលវេជ្ជសាស្រ្ត ចូលរួមវគ្គបណ្តុះបណ្តាល សិក្ខាសាលា ការតាំងពិព័រណ៍សិល្បៈ និងតន្ត្រីផ្សេងៗ។ DTV នឹងអនុញ្ញាតឱ្យអ្នកទាំងនោះអាចស្នាក់នៅក្នុងប្រទេសថៃរហូតដល់ ១៨០ ថ្ងៃក្នុងពេលចេញចូលមួយដង ហើយនឹងមានសុពលភាពរយៈពេល ៥ ឆ្នាំ។
៤. ការបន្ថែមរយៈពេលស្នាក់នៅសម្រាប់សិស្ស៖ ការធ្វើបច្ចុប្បន្នភាពសម្រាប់សិស្ស-និស្សិតបរទេសដែលចូលក្នុងប្រទេសថៃ ដែលត្រូវមានទិដ្ឋាការមិនមែនអន្តោប្រវេសន៍ “ED” ដើម្បីសិក្សា ឬបន្តការសិក្សាថ្នាក់ឧត្តមសិក្សា។ ការបន្ថែមរយៈពេលនេះនឹងពន្យារការស្នាក់នៅរបស់ពួកគេក្នុងប្រទេសថៃថែមរយៈពេលមួយឆ្នាំទៀតបន្ទាប់ពីបញ្ចប់ការសិក្សា ដើម្បីពួកគេអាចស្វែងរកការងារធ្វើ ឬបន្តសកម្មភាពផ្សេងទៀតនៅក្នុងប្រទេសថៃ។ ការបន្ថែមរយៈពេលនេះត្រូវបានធ្វើបច្ចុប្បន្នភាពក្នុងគោលបំណងដើម្បីទាក់ទាញអ្នកមានជំនាញ និងសក្តានុពលសម្រាប់ទីផ្សារការងាររបស់ថៃ៕