សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ធនាគារកណ្តាលអាម៉េរិក (Fed) សម្រេចចិត្តរក្សាអត្រាការប្រាក់ដដែលក្នុងកម្រិតចន្លោះពី ៣,៥ ភាគរយ ដល់ ៣,៧៥ ភាគរយ ដែលជាការរក្សាក្នុងកម្រិតដដែលនេះជាលើកទី ៥ ជាប់ៗគ្នាមកហើយ។ នេះបើយោងតាមការរាយការណ៍ពី BBC។
ការសម្រេចចិត្តនេះធ្វើឡើងនៅក្នុងកិច្ចប្រជុំកាលពីថ្ងៃពុធកន្លងទៅនេះ ទោះបីជាមានក្ដីបារម្ភថា អតិផរណាអាចនឹងបន្តកើនឡើងខ្ពស់ក្នុងប៉ុន្មានខែខាងមុខដោយសារតែជម្លោះនៅក្នុងតំបន់មជ្ឈិមបូព៌ាក៏ដោយ។
លោក Kevin Warsh ប្រធានធនាគារកណ្តាលដែលទើបតែចូលកាន់តំណែងបានជាងប្រាំបីសប្តាហ៍មកនេះ ថ្លែងក្នុងសន្និសីទសារព័ត៌មានថា ស្ថាប័នកំពុងបំពេញការងារ និងផ្តោតអារម្មណ៍យ៉ាងខ្លាំង ដើម្បីធានាបានថា អាចសម្រេចបានលទ្ធផលល្អ ប៉ុន្តែវាមិនអាចជាដំណោះស្រាយកាត់បន្ថយបន្ទុកថ្លៃដើមនៃការរស់នៅរបស់ពលរដ្ឋអាម៉េរិកបានភ្លាមៗនោះទេ។
យ៉ាងណាមិញ លោក Warsh ប្តេជ្ញាចិត្តថា នឹងទម្លាក់អតិផរណាឱ្យធ្លាក់ចុះ ប៉ុន្តែក៏បញ្ជាក់ដែរថាវាត្រូវទាមទាររយៈពេលយូរ ដោយសារតែតម្លៃទំនិញនៅអាម៉េរិកបន្តឡើងថ្លៃខ្ពស់ជាងគោលដៅ ២ ភាគរយរបស់ធនាគារកណ្តាលក្នុងរយៈពេលជាងប្រាំឆ្នាំមកហើយ។
ទោះបីជាអតិផរណាប្រចាំឆ្នាំគិតត្រឹមខែមិថុនាធ្លាក់ចុះមកត្រឹម ៣,៥ ភាគរយក៏ដោយ ក៏អត្រានៃការឡើងថ្លៃទំនិញនៅតែស្ថិតក្នុងកម្រិតខ្ពស់ជាងគោលដៅរបស់ស្ថាប័នដដែល។
នៅក្នុងកិច្ចប្រជុំកំណត់គោលនយោបាយនេះ មន្ត្រីរបស់ធនាគារកណ្តាលបានបោះឆ្នោតក្នុងសំឡេង ៩ ទល់នឹង ៣ គាំទ្រដល់ការរក្សាអត្រាការប្រាក់ដដែល ខណៈដែលសមាជិកទាំងបីរូបបោះឆ្នោតចង់ឱ្យមានការដំឡើងអត្រាការប្រាក់បន្តិចបន្តួច។
លោក Warsh បង្ហើបថា លោកផ្ទាល់គឺជាអ្នកស្នើសុំឱ្យមានការជជែកដេញដោលគ្នាយ៉ាងស្វិតស្វាញជាមួយសមាជិកដទៃទៀត ដើម្បីស្វែងរកដំណោះស្រាយដ៏ល្អបំផុត។ ការសម្រេចចិត្តនេះកើតឡើងចំពេលដែលតម្លៃប្រេងសកលមានភាពមិនប្រាកដប្រជាខ្ពស់។
កាលពីថ្ងៃពុធកន្លងទៅនេះ តម្លៃប្រេងឆៅ Brent ឡើងថ្លៃជាង ៦ ភាគរយជិត ៩០ ដុល្លារក្នុងមួយបារ៉ែល។ អ្នកជំនាញផ្នែកសេដ្ឋកិច្ចមើលឃើញថា ទីផ្សារថាមពលគឺជាកត្តាចម្បងដែលបន្តជះឥទ្ធិពលដល់ការសម្រេចចិត្តរបស់ធនាគារកណ្តាលអាម៉េរិកលើអត្រាការប្រាក់នាពេលអនាគត។
ក្រោយពេលប្រកាសលទ្ធផលរក្សាអត្រាការប្រាក់នៅដដែលនេះ ទីផ្សារភាគហ៊ុនអាមេរិកបានបិទបញ្ចប់ក្នុងកម្រិតទាប ដោយសន្ទស្សន៍ភាគហ៊ុន S&P 500 បានធ្លាក់ចុះដល់កម្រិតទាបបំផុតក្នុងរយៈពេលមួយខែ។
សន្ទស្សន៍ភាគហ៊ុន Nasdaq ដែលពឹងផ្អែកខ្លាំងលើវិស័យបច្ចេកវិទ្យា ធ្លាក់ចុះប្រហែល ៩ ភាគរយ ខណៈដែលសន្ទស្សន៍ភាគហ៊ុន Dow Jones ធ្លាក់ចុះ ២,១៩ ភាគរយ។ ការធ្លាក់ចុះនេះក៏ត្រូវរងឥទ្ធិពលពីការធ្លាក់ចុះនៃភាគហ៊ុនបន្ទះឈីប AI និងការព្រួយបារម្ភរបស់ក្រុមហ៊ុនបច្ចេកវិទ្យាយក្សធំៗលើអំពីការចំណាយទុនលើហេដ្ឋារចនាសម្ព័ន្ធ AI ផងដែរ។
កន្លងមក ប្រធានាធិបតីអាម៉េរិក លោក Donald Trump ធ្លាប់ដាក់សម្ពាធលើអតីតប្រធានធនាគារកណ្តាលលោក Jerome Powell ឱ្យកាត់បន្ថយអត្រាការប្រាក់ ហើយក៏រំពឹងថា លោក Warsh ដែលជាប្រធានថ្មីនឹងបំពេញតាមការទាមទារនេះដើម្បីជួយសម្រួលដល់សេដ្ឋកិច្ចអាម៉េរិក និងស្ថានភាពរស់នៅរបស់ពលរដ្ឋមុនការបោះឆ្នោតកណ្តាលអាណត្តិ។
ទោះជាយ៉ាងណាក្ដី លោក Warsh អះអាងពីគោលដៅរបស់ខ្លួនថា គឺធ្វើយ៉ាងណាមិនឱ្យមាននយោបាយពាក់ព័ន្ធនោះឡើយ ព្រមទាំងបានគូសបញ្ជាក់យ៉ាងដាច់អហង្ការអំពីឯករាជ្យភាពរបស់ធនាគារកណ្តាលនៅក្នុងរាល់ការសម្រេចចិត្តនានាផងដែរ៕
Account
Security
Favourite Content