សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតចាប់ពីឆ្នាំ២០១៨ ដល់ដំណាច់ឆ្នាំ២០២៣ ទុនវិនិយោគដែលកម្ពុជាបានអនុម័តឱ្យវិនិយោគមានទំហំទឹកប្រាក់ប្រមាណជិត៤០ពាន់លានដុល្លារអាមេរិក ដែលបានបញ្ជាក់ពីទំនុកចិត្តខ្ពស់ពីសំណាក់វិនិយោគក្នុង និងក្រៅប្រទេសមកលើបរិយាកាសវិនិយោគនៅកម្ពុជា។ នេះបើតាមរបាយការណ៍នៅក្នុងសេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៤ ។
នៅក្នុងរបាយការណ៍ដដែលនេះឱ្យដឹងថា ទុនវិនិយោគពីឆ្នាំ២០១៨ ដល់ឆ្នាំ២០២២ មានទឹកប្រាក់សរុបប្រមាណ ៣២ ៤២៤លានដុល្លារអាមេរិក ហើយក្នុងឆ្នាំ២០២៣ កម្ពុជាបានអនុម័តគម្រោងវិនិយោគចំនួន ២៦៨គម្រោង ដែលមានទុនវិនិយោគចំនួនជិត ៥ពាន់លានដុល្លារអាមេរិក ( ៤,៩ពាន់លានដុល្លារ ) ។
គម្រោងវិនិយោគដែលមានទឹកប្រាក់ច្រើនជាងគេក្នុងរយៈពេល៦ឆ្នាំចុងក្រោយនេះ គឺក្នុងវិស័យឧស្សាហកម្ម និងហេដ្ឋារចនាសម្ព័ន្ធ ក្នុងនោះមានគម្រោងសាងសង់ផ្លូវល្បឿនលឿនភ្នំពេញ ក្រុងព្រះសីហនុ ( រួចរាល់ ) គម្រោងផ្លូវល្បឿនលឿនភ្នំពេញ បាវិត ( កំពុងសាងសង់ ) និងគម្រោងសាងសង់អគារខ្ពស់ៗ ។
នៅមុនវិបត្តិកូវីដ ១៩ ពោលគឺនៅមុនឆ្នាំ២០២០ ការវិនិយោគនៅក្នុងប្រទេសកម្ពុជាបានឡើងដល់ចំណុចកំពូលទាំងការវិនិយោគដែលមានប្រភពទុននៅក្នុងស្រុក និងប្រភពទុនពីបរទេស ។ ក្នុងអំឡុងពេលនោះដែរ ការវិនិយោគលើវិស័យសំណង់ និងអចលនទ្រព្យក៏ឃើញថាមានសន្ទុះកើនឡើងខ្ពស់នៅក្នុងអំឡុងឆ្នាំ២០១៨ និងឆ្នាំ២០១៩ ហើយចាប់ផ្ដើមមានការថមថយបន្តិចម្ដងៗចាប់ពីឆ្នាំ២០២០ គ្រាដែលពិភពលោកជួបប្រទះនឹងជំងឺរាតត្បាតកូវីដ១៩ ។
ដោយឡែក នៅក្នុងឆ្នាំ២០២៤នេះដែរ ស្ថានភាពនៃការវិនិយោគនៅក្នុងប្រទេសកម្ពុជា ត្រូវបានអ្នកជំនាញនៃវិស័យអចលនទ្រព្យមួយចំនួនព្យាករថា មិនទាន់មានភាពប្រសើរដូចមុនឆ្នាំ២០២០នោះឡើយ ដោយសារតែស្ថានភាពនៃវិបត្តិសកលនៅមិនទាន់បានបញ្ចប់ទាំងស្រុង ហើយប្រទេសដែលជាប្រភពទុនសំខាន់របស់កម្ពុជាក៏នៅតែមិនទាន់មានភាពប្រសើរនៅឡើយដែរ ។
លោក ប៉ូ អ៊ាវគង់ អគ្គនាយកក្រុមហ៊ុន Advance Real Estate បានមានប្រសាសន៍នៅថ្ងៃទី០៩ ខែមករា ឆ្នាំ២០២៤ នេះឱ្យថា សម្រាប់ឆ្នាំ២០២៤នេះ ដោយសារតែទើបចាប់ផ្ដើមបានប៉ុន្មានថ្ងៃប៉ុណ្ណោះ ដូច្នេះយើងអត់ទាន់ដឹងថាវានឹងមានការប្រែប្រួលយ៉ាងណាទេ ។ ប៉ុន្តែនៅក្នុងរយៈពេលដើមឆ្នាំនេះ វានៅមានចំហាយសល់ពីឆ្នាំ២០២៣កន្លងមកនៅឡើយដូច្នេះហើយវាមិនអាចប្រែប្រួលបានលឿននោះទេ ។ ស្ថានភាពនៃការវិនិយោគនៅកម្ពុជាអាចនឹងប្រែប្រួលខុសពីឆ្នាំ២០២៣ នៅពាក់កណ្ដាលឆ្នាំ២០២៤ ។ ពេលនោះទើបគេអាចដឹងថាស្ថានភាពនៃការវិនិយោគនៅកម្ពុជាមានការផ្លាស់ប្តូរយ៉ាងណានោះ៕
Account
Security
Favourite Content