សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពត ៖ ក្រុមការងាររាជរដ្ឋាភិបាលចុះមូលដ្ឋានខេត្តកំពត តាមរយៈកិច្ចសហការជាមួយអាជ្ញាធរខេត្ត និងអាជ្ញាធរដែនដី បានបង្ហាញពីសុទិដ្ឋិនិយម និងជឿជាក់ថា ខេត្តកំពតនឹងក្លាយជាទិសដៅទេសចរណ៍ទី២ នៅក្នុងប្រទេសកម្ពុជា ដោយបច្ចុប្បន្ននេះ ក្រុមការងារក៏ដូចជាអាជ្ញាធរ បាន និងកំពុងអភិវឌ្ឍន៍ខេត្តមួយនេះ ដើម្បីទាក់ទាញទេសចរជាតិ និងអន្តរជាតិមកទស្សនា និងសម្រាកកម្សាន្តឱ្យបានកាន់តែច្រើន ។
ថ្លែងក្នុងកិច្ចប្រជុំបូកសរុបលទ្ធផលការងារប្រចាំឆមាសទី១ ឆ្នាំ២០២៥ និងទិសដៅអនុវត្តបន្តរបស់ក្រុមការងាររាជរដ្ឋាភិបាលចុះមូលដ្ឋានខេត្តកំពតនា ព្រឹកថ្ងៃទី២២ ខែសីហា ឆ្នាំ២០២៥ ឯកឧត្តម សាយ សំអាល់ ឧបនាយករដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពត បានមានប្រសាសន៍ថា បច្ចុប្បន្នខេត្តកំពត កំពុងមានផែនការកសាងបណ្ដាញផ្គត់ផ្គង់ និងចែកចាយទឹកស្អាតឱ្យបានគ្រប់គ្រាន់នៅក្នុងខេត្ត ។
ឯកឧត្តមបានបញ្ជាក់ថា ៖
«សម្រាប់ខេត្តកំពត ខ្ញុំយល់ឃើញថា យើងបានដើរលើវិថីមួយដ៏ត្រឹមត្រូវ ហើយចាប់ពីពេលនេះតទៅមុខទៀត យើងត្រូវសម្រួចគោលដៅរបស់យើងទាំងអស់គ្នាដើម្បីឆ្លើយតបទៅនឹងការងារ និងបញ្ហាប្រឈមនានាក្នុងខេត្តបន្តទៀត»។
ឯកឧត្តមឧបនាយករដ្ឋមន្ត្រីក៏បានលើកឡើងអំពីមូលនិធិឃុំ ដែលជាយុទ្ធវិធីដ៏ពិសេសមួយសម្រាប់មូលដ្ឋាន ហើយត្រូវបន្តអនុវត្តកិច្ចការនេះបន្តទៀត ដោយត្រូវយកកិច្ចការនេះជាគោលដើម្បីអភិវឌ្ឍន៍ខេត្តកំពត និងដើម្បីសម្រេចបានជោគជ័យនូវយុទ្ធសាស្ត្របញ្ចកោណដំណាក់កាលទីមួយនេះ ។
តាមរយៈកិច្ចសហការជាមួយអាជ្ញាធរខេត្ត និងអាជ្ញាធរដែនដី ឯកឧត្តម ឧបនាយករដ្ឋមន្ត្រី សាយ សំអាល់ មានសុទិដ្ឋិនិយមថា ខេត្តកំពត នឹងក្លាយជាទិសដៅទេសចរណ៍ទី២ នៅក្នុងប្រទេសកម្ពុជា ដោយសារនៅទីនេះមានសក្តានុពលទេសចរណ៍ដ៏សំបូរបែប ក្នុងនោះមានសហគមន៍ត្រពាំងសង្កែ និងសហគមន៍ទេសចរណ៍ផ្សេងទៀត ហើយនៅខែកញ្ញា ឬខែតុលាខាងមុខនេះ ក្រុមការងារនឹងចាប់ផ្ដើមអនុវត្តគម្រោងអភិវឌ្ឍន៍សហគមន៍ចំនួន ១៣ ក្នុងជំហានទីមួយ ដែលនេះគឺជាការចូលរួមជាមួយមូលនិធិឃុំ។
ក្នុងឱកាសជាមួយគ្នានេះ ឯកឧត្តមឧបនាយករដ្ឋមន្ត្រី បានស្នើសុំសមាគមផលិតបេតុងនៅខេត្តកំពត ឱ្យជួយអភិវឌ្ឍន៍ផ្លូវបេតុង បំពាក់សូឡា និងដាំដើមឈើ ក្នុងបណ្ដាឃុំនានាជុំវិញទីតាំងផលិតបេតុង ។ ទន្ទឹមនេះ ឯកឧត្តម ក៏បានបង្ហាញអំពីគម្រោងដែលកំពុងរៀបរៀងជាមួយធនាគារ AIB របស់ប្រទេសចិន ដែលហៅថា គម្រោងសេដ្ឋកិច្ចពណ៌ខៀវ មានន័យថា ជាគម្រោងសេដ្ឋកិច្ចនៅតំបន់ឆ្នេរ ដោយក្នុងនោះមានការកសាងស្ថានីយ៍ផលិតទឹកស្អាត ផ្លូវ ប្រព័ន្ធធារាសាស្ត្រ និងបានស្នើដល់អភិបាលស្រុកនានាចូលរួមក្នុងកិច្ចការនេះ ដោយបង្ហាញពីគោលដៅអភិវឌ្ឍន៍ក្នុងស្រុក ភ្ជាប់ជាមួយគម្រោងនេះ ហើយត្រូវទាក់ទាញការវិនិយោគឯកជន និងអង្គការសង្គមស៊ីវិលនានា ដើម្បីអភិវឌ្ឍន៍គម្រោងបន្ទាប់បន្សំមួយចំនួនក្នុងខេត្ត។
ឯកឧត្តមឧបនាយករដ្ឋមន្ត្រី សាយ សំអាល់ ក៏បានយល់ឃើញដែរថា ប្រសិនបើគម្រោងទាំងអស់នេះបានដំណើរការនោះ ក្នុងអាណត្តិទី៧ នេះ ខេត្តកំពតនឹងទទួលបានការអភិវឌ្ឍន៍រីកចម្រើនគ្រប់វិស័យ ទាំងវិស័យហេដ្ឋារចនាសម្ព័ន្ធ និងការទាក់ទាញទេសចរបានកាន់តែច្រើនថែមទៀត។ ម៉្យាងទៀត គ្រប់ឃុំទាំងអស់នៅក្នុងខេត្តកំពត នឹងមានប្លង់គោល មានព័ត៌មានក្បាលដីច្បាស់លាស់ ដែលនេះជាឧបករណ៍មួយសម្រាប់ចុះមូលដ្ឋាន និងជាឧបករណ៍យុទ្ធសាស្ត្រ សម្រាប់ចែកជូនប្រជាពលរដ្ឋ ហើយក្រសួងរៀបចំដែនដី នគរូបនីយកម្ម និងសំណង់ នឹងរៀបចំប្លង់គោលនេះនៅទូទាំងប្រទេសផងដែរ ៕
Account
Security
Favourite Content