សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ ៖ នាវាដឹកកុងតឺន័រដ៏ធំរបស់ចិន បានចេញដំណើរពីកំពង់ផែ(ស៊ូចូវ) Suzhou ប្រទេសចិន មកកាន់កំពង់ផែក្រុងព្រះសីហនុជាលើកដំបូង ដែលការនេះបានបង្ហាញពីដំណើរការដោយរលូននៃជើងនាវាដឹកកុងតឺន័រធុនធ្ងន់របស់ចិន និងកម្ពុជា។ នេះបើយោងតាម ឯកឧត្តម Wang Wenbin ឯកអគ្គរដ្ឋទូតចិនប្រចាំកម្ពុជា លើកឡើងតាមរយៈគណនីបណ្តាញសង្គមផ្លូវការកាលពីពេលកន្លងទៅថ្មីៗនេះ។
ឯកឧត្តម Wang Wenbin បានបញ្ជាក់ថា កំពង់ផែចិន Taicang គឺជាកន្លែងចាប់ផ្ដើមសម្រាប់ការចេញដំណើររបស់លោកមន្រ្តីចិន Zheng He ទៅកាន់ភាគខាងលិចនៃមហាសមុទ្រ ក្នុងអំឡុងរាជវង្ស Ming។ ការបើកជើងនាវាឆ្ពោះទៅត្រង់ បានកាត់បន្ថយពេលវេលាដឹកជញ្ជូនបែបប្រពៃណីចន្លោះ ១៥ទៅ ២០ថ្ងៃ មកនៅត្រឹមតែ៩ថ្ងៃ។
ឯកឧត្តម ឡុង ឌីម៉ង់ អភិបាលរង និងជាអ្នកនាំពាក្យខេត្តព្រះសីហនុ បានមានប្រសាសន៍ថា កន្លងមក នាវាដឹកទំនិញធុនធ្ងន់មកពីប្រទេសចិន ឬមកពីបណ្តាប្រទេសផ្សេងៗទៀត ដូចជា អឺរ៉ុប កូរ៉េ ឬជប៉ុន មិនអាចចូលចតបាននោះទេ ដែលនាវាភាគច្រើនត្រូវតែដូរជើងមកនាវាធុនតូចសិន។
ឯកឧត្តមបន្តថា ៖
«ការដឹកជញ្ជូនមកពីបណ្តាប្រទេសដូចបានលើកឡើងខាងលើមកកាន់កម្ពុជា គឺត្រូវលើកដាក់នៅតាមកំពង់ផែមួយចំនួនសិន ដូចជា កំពង់ផែហុងកុង កំពង់ផែសាំងហ្កាពួរ កំពង់ផែវៀតណាម និងកំពង់ផែថៃជាដើម ទើបអាចចូលចតកំពង់ផែខេត្តព្រះសីហនុបាន»។
ដូចទៅនឹងការលើកឡើងរបស់អ្នកនាំពាក្យខាងលើនេះ រាជរដ្ឋាភិបាលបានខិតខំអភិវឌ្ឍបន្ថែមនូវកំពង់ផែមួយនេះទៅជាប្រភេទកំពង់ផែទឹកជ្រៅរហូតដល់១៧.៥ម៉ែត្រ ដើម្បីអាចអនុញ្ញាតឱ្យនាវាធុនធំគ្រប់ប្រភេទ នៅលើពីភពលោកចូលចតបាននៅត្រឹមឆ្នាំ២០២៩ខាងមុខ ដែលអាចចំណេញបានទាំងពេលវេលា ចំណេញទាំងថវិកាក្នុងការដឹកជញ្ជូន។
អ្នកឧកញ៉ា លឹម ហេង អនុប្រធានសភាពាណិជ្ជកម្ពុជា បានមើលឃើញថា ការធ្វើដំណើររបស់នាវាដឹកទំនិញធុនធ្ងន់រវាងកម្ពុជា-ចិនក្រោយពេលអភិវឌ្ឍកំពង់ផែខេត្តព្រះសីហនុបានដូចផែនការ នោះនឹងអាចកាត់បន្ថយពេលវេលាជាងពាក់កណ្តាល នេះហើយដែលអ្នកជំនួញគ្រប់រូបប្រាថ្នាចង់បាន។
អ្នកឧកញ៉ាបន្តថា ៖
«កម្ពុជាមានតម្រូវកាដឹកចេញនូវផលិតផលកសិកម្មភាគច្រើន ដូចជា ចេក ស្វាយ ទុរេន ជាដើម ដែលជាហេតុធ្វើឱ្យខូចរលួយប្រសិនបើចំណយពេលយូរដូចមុន។ ដោយឡែកពេលនេះ វាជារឿងដែលគួរឱ្យលើកទឹកចិត្ត ហើយយើងក៏អបអរសាទរក្នុងការចូលរួមដឹកជញ្ជូនតាមកំពង់ផែទឹកជ្រៅនេះ ជាពិសេសដឹកបានទំនិញចេញច្រើន កប៉ាល់ក៏ចេញ-ចូលញឹកញ៉ាប់ដែរ មិនបាច់រង់ចាំ ២អាទិត្យ ដូចពេលកន្លងទៅទៀតនោះទេ»។
អ្នកឧកញ៉ា លឹម ហេង បានបញ្ជាក់បន្ថែមថា ទំនិញដែលកម្ពុជានាំចេញទៅចិន ភាគច្រើនជាផលិតផលកសិកម្ម ចំណែកចិននាំមកកម្ពុជាវិញមានដូចជា សម្ភារៈសំណង់ រថយន្ត គ្រឿងបន្លាស់រថយន្ត វត្ថុធាតុដើមវាយនភណ្ឌ និងបន្លែផ្លែឈើជាដើម ដែលមានតម្រូវការខ្ពស់ ខណៈកម្ពុជាបិទការនាំចូលពីប្រទេសថៃ។
យោងតាមទិន្នន័យពាណិជ្ជកម្មចុងក្រោយបង្អស់របស់អគ្គនាយកដ្ឋានគយ និងរដ្ឋាករ បានបង្ហាញថា ទំហំពាណិជ្ជកម្មសរុបរវាងកម្ពុជា-ចិន ឈានដល់ ៥.៦៩ពាន់លានដុល្លារ គិតចាប់ពីខែមករា ដល់ ខែមេសា ឆ្នាំ២០២៥ កើនឡើងពី ៤.៤៨ ពាន់លានដុល្លារ ស្មើនឹង ២៧ភាគរយក្នុងរយៈពេលដូចគ្នាក្នុងឆ្នាំ២០២៤ ៕
Account
Security
Favourite Content