បរទេស៖ យោងតាមប្រភពព័ត៌មានពី CBS បានរាយការណ៍ថា សេដ្ឋកិច្ចរបស់សហរដ្ឋអាម៉េរិកបានកើនឡើងលឿនជាងការរំពឹងទុកនៅក្នុងត្រីមាសទី ៣ ដោយសារមានការជំរុញពីអាជីវកម្ម និងការចំណាយរបស់ពលរដ្ឋច្រើនជាងមុន។

ទន្ទឹមនឹងនេះ ការចំណាយរបស់អ្នកប្រើប្រាស់នៅអាម៉េរិកបានជំរុញសេដ្ឋកិច្ចឱ្យកើនឡើងដល់ ៥,២ ភាគរយប្រចាំឆ្នាំសម្រាប់ខែកក្កដាដល់ខែកញ្ញា។ ការកើនឡើងនេះខ្ពស់ជាងការព្យាកណ៍របស់រដ្ឋាភិបាលដែលធ្លាប់បានប៉ាន់ប្រមាណថាសេដ្ឋកិច្ចនឹងកើនឡើងក្នុងអត្រាប្រចាំឆ្នាំ ៤,៩ ភាគរយសម្រាប់ត្រីមាសទី ៣។ មិនត្រឹមតែប៉ុណ្ណោះ កំណើនសម្រាប់ត្រីមាសទីបីបានកើនឡើងយ៉ាងខ្លាំងពីអត្រា ២,១ ភាគរយនៃត្រីមាសទីពីរ(ខែមេសាដល់ខែមិថុនា)។ វាបានបង្ហាញថា ផលិតផលក្នុងស្រុកសរុបរបស់សហរដ្ឋអាមេរិក រួមទាំងទិន្នផលសរុបនៃទំនិញ និងសេវាកម្មបានកើនឡើងក្នុងអត្រាប្រចាំត្រីមាសលឿនបំផុតក្នុងរយៈពេលជិត ២ ឆ្នាំ។

ការកើនឡើងនៅក្នុងត្រីមាសទី ៣ បានឆ្លុះបញ្ចាំងពីការកើនឡើងនៃការចំណាយរបស់អ្នកប្រើប្រាស់ និងការវិនិយោគលើស្តុកសម្រាប់ទុនបម្រុង។ លើសពីនេះ ការចំណាយរបស់អតិថិជន ដែលជាចំណុចសំខាន់នៃសេដ្ឋកិច្ចបានកើនឡើងក្នុងអត្រាប្រចាំឆ្នាំ ៣,៦ ភាគរយចាប់ពីខែកក្កដាដល់ខែកញ្ញា ខណៈដែលការវិនិយោគឯកជនបានកើនឡើងក្នុងអត្រាប្រចាំឆ្នាំ ១០,៥ ភាគរយ និង ការកើនឡើង ៦,២ ភាគរយនៃការវិនិយោគលើអចលនទ្រព្យ។

បន្ថែមពីនេះ សេដ្ឋកិច្ចក៏ទទួលបានការជំរុញពីការចំណាយ និងការវិនិយោគដោយរដ្ឋាភិបាលគ្រប់កម្រិត។ សហរដ្ឋអាម៉េរិកដែលជាប្រទេសមានសេដ្ឋកិច្ចធំជាងគេរបស់ពិភពលោកបានបង្ហាញភាពធន់របស់ខ្លួន ទោះបីជាធនាគារកណ្តាលបានដំឡើងអត្រាការប្រាក់គោល ១១ ដងចាប់តាំងពីខែមីនា ឆ្នាំ២០២២ ដើម្បីប្រយុទ្ធប្រឆាំងនឹងអតិផរណាដ៏អាក្រក់បំផុតក្នុងរយៈពេល ៤ ទសវត្សរ៍ក៏ដោយ។ អត្រាការប្រាក់ខ្ពស់ទាំងនោះបានបង្កើនថ្លៃដើមកម្ចី និងអាជីវកម្ម។ យ៉ាងណាមិញ វាក៏បានជួយបន្ធូរបន្ថយសម្ពាធអតិផរណាផងដែរ ដោយតម្លៃអ្នកប្រើប្រាស់បានកើនឡើង ៣,២ ភាគរយកាលពីខែមុនធៀបនឹង ១២ ខែមុន។

ស្របពេលនេះដែរ ទីផ្សារការងារនៅសហរដ្ឋអាម៉េរិកកំពុងធ្លាក់ចុះគួរឱ្យកត់សម្គាល់។ ជាមួយគ្នានេះ ការរួមបញ្ចូលគ្នានៃការធ្លាក់ចុះនៃអតិផរណា និងកំណើននៃការជួលបុគ្កលិកបានបង្កើនក្តីសង្ឃឹមសម្រាប់ធនាគារកណ្តាល Fed ក្នុងការគ្រប់គ្រងអតិផរណាចៀសវាងពីការធ្លាក់ចូលទៅក្នុងវិបត្តិសេដ្ឋកិច្ច។

លោក Rubeela Farooqi ប្រធានសេដ្ឋវិទូនៅ High Frequency Economics បាននិយាយថា ពួកគេបានបន្តព្យាករណ៍ពីការកើនឡើងជាបន្តបន្ទាប់នៅក្នុងសកម្មភាពសេដ្ឋកិច្ច ប៉ុន្តែល្បឿនអាចថយចុះយ៉ាងខ្លាំងនៅក្នុងត្រីមាសទីបួន។ លើសពីនេះ ត្រីមាសទីបួនត្រូវបានព្យាករណ៍ថានឹងមានការធ្លាក់ចុះនៃការចំណាយរបស់ប្រជាពលរដ្ឋ ដែលជាលទ្ធផលមកពីកំណើនដ៏រឹងមាំពីត្រីមាសទីបី និងផលប៉ះពាល់ជាបន្តបន្ទាប់នៃការរឹតបន្តឹងគោលនយោបាយរូបិយវត្ថុផងដែរ។

ស្រដៀងគ្នានេះដែរ លោក Gus Faucher ប្រធានសេដ្ឋវិទូនៅ PNC បានព្យាករណ៍ថា វាអាចនឹងមានការធ្លាក់ចុះសេដ្ឋកិច្ចក្នុងរយៈពេលខ្លីនៅឆ្នាំក្រោយ ហើយវិបត្តិសេដ្ឋកិច្ចអាចនឹងចាប់ផ្តើមនៅពាក់កណ្តាលឆ្នាំ២០២៤ ដោយសារគោលនយោបាយរូបិយវត្ថុបន្តមានភាពតឹងតែង៕