សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ បច្ចេកវិទ្យាឌីជីថលនៅកម្ពុជាមានភាពរីកចម្រើនគួរឱ្យកត់សម្គាល់ ជាពិសេស បច្ចេកវិទ្យាហិរញ្ញវត្ថុ។ បច្ចេកវិទ្យាហិរញ្ញវត្ថុបានក្លាយជាកម្លាំងចលករមួយដ៏ចម្បងក្នុងការជំរុញសម្ទុះកំណើនសេដ្ឋកិច្ចកម្ពុជាតាមរយៈការប្រើប្រាស់បច្ចេកវិទ្យាថ្មីៗ និងនវានុវត្តន៍ក្នុងវិស័យហិរញ្ញវត្ថុ ទាំងវិស័យធនាគារ និងវិស័យហិរញ្ញវត្ថុមិនមែនធនាគារ។
ឯកឧត្តមបណ្ឌិត គង់ ម៉ារី រដ្ឋលេខាធិការក្រសួងសេដ្ឋកិច្ច និង ហិរញ្ញវត្ថុ និងជាអគ្គលេខាធិការនៃអគ្គលេខាធិការដ្ឋានគណៈកម្មាធិការសេដ្ឋកិច្ច និងធុរកិច្ចឌីជីថល បានថ្លែងដូច្នេះនៅក្នុងសិក្ខាសាលាផ្សព្វផ្សាយស្តីពី «ការពង្រឹងចំណេះដឹងបច្ចេកវិទ្យាហិរញ្ញវត្ថុសម្រាប់សហគ្រាសនៅកម្ពុជា» នៅសណ្ឋាគារ អូកវូដ ព្រេមៀរ ភ្នំពេញ នាព្រឹកថ្ងៃទី២១ ខែតុលា ឆ្នាំ២០២៥ ។
ឯកឧត្តមរដ្ឋលេខាធិការ បានមានប្រសាសន៍បញ្ជាក់ថា៖
«ការប្រើប្រាស់បច្ចេកវិទ្យាហិរញ្ញវត្ថុ មានដូចជា ប្រព័ន្ធទូទាត់សងប្រាក់បាគង, ខេ-អេចឃ្យូអរ (KHQR), សេវាធនាគារចល័ត (Mobile Banking), ព្រមទាំងសេវាកម្ម និងផលិតផលបច្ចេកវិទ្យាជាច្រើនទៀត បាន និងកំពុងបំពេញតម្រូវការ និងជួយសម្រួលដល់ការរស់នៅប្រចាំថ្ងៃ និងការធ្វើសុវុឌ្ឍិកម្មសេវាហិរញ្ញវត្ថុ សម្រាប់ប្រជាពលរដ្ឋទូទៅ និងសហគ្រាសផងដែរ»។
សូមជម្រាបថា៖ សិក្ខាសាលាផ្សព្វផ្សាយស្តីពី «ការពង្រឹងចំណេះដឹងបច្ចេកវិទ្យាហិរញ្ញវត្ថុសម្រាប់សហគ្រាសនៅកម្ពុជា» មានគោលបំណងពង្រឹងចំណេះដឹងទាក់ទងទៅនឹងបច្ចេកវិទ្យាហិរញ្ញវត្ថុ, ចែករំលែកបទពិសោធ, និងផ្ដល់វេទិកាសម្រាប់បង្កើតទំនាក់ទំនងជាមួយគ្នាក្នុងប្រព័ន្ធអេកូឡូស៊ីនៃធុរកិច្ចក្នុងសេដ្ឋកិច្ចឌីជីថល។ សិក្ខាកាមដែលបានចូលរួមគឺជាថ្នាក់ដឹកនាំ និងតំណាងមកពីក្រសួង ស្ថាប័ន នៃរាជរដ្ឋាភិបាល, វិស័យឯកជន, សមាគម, គ្រឹះស្ថានអប់រំ និងក្រុមហ៊ុនដំណោះស្រាយឌីជីថល។
ឯកឧត្តមបណ្ឌិត គង់ ម៉ារី បានលើកឡើងថា៖
«សិក្ខាសាលានេះគឺជាឱកាសដ៏ពិសេសសម្រាប់សហគ្រាសធុនតូច និងមធ្យម ជាពិសេសលើកទឹកចិត្តដល់ធុរជន និងម្ចាស់សហគ្រាស ក្នុងការស្វែងយល់បន្ថែមពីបច្ចេកវិទ្យាហិរញ្ញវត្ថុ និងការប្រើប្រាស់សេវាកម្ម ឬ ដំណោះស្រាយឌីជីថលដើម្បីទាញយកអត្ថប្រយោជន៍ជាអតិបរមាពីបច្ចេកវិទ្យា»។
ជាមួយគ្នានេះដែរ ឯកឧត្តមបណ្ឌិត ក៏បានលើកទឹកចិត្តដល់ក្រសួង ស្ថាប័ន និងតួអង្គពាក់ព័ន្ធទាំងអស់ចូលរួមសហការជាមួយអគ្គលេខាធិការដ្ឋានគណៈកម្មាធិការសេដ្ឋកិច្ច និងធុរកិច្ចឌីជីថល ក្នុងការបន្តរៀបចំផ្តួចផ្តើមផ្សេងៗ សំដៅដល់ការលើកកម្ពស់ និងជំរុញការបង្កើនចំណេះដឹង និងអក្ខរកម្មបច្ចេកវិទ្យាហិរញ្ញវត្ថុសម្រាប់ធុរជនកម្ពុជាឱ្យកាន់តែមានវិសាលភាពខ្ពស់នាពេលខាងមុខទៀត។
គួរជម្រាបដែរថា ៖ នៅក្នុងដំណើរការនៃសិក្ខាសាលានេះ មានបទបង្ហាញចំនួនពីរដែលផ្តោតលើ៖ (១). ទិដ្ឋភាពទូទៅ និងការអភិវឌ្ឍបច្ចេកវិទ្យាហិរញ្ញវត្ថុនៅកម្ពុជា, (២) ស្វែងយល់ពីបច្ចេកវិទ្យាហិរញ្ញវត្ថុ៖ហេតុអ្វីបានជាបច្ចេកវិទ្យាហិរញ្ញវត្ថុមានសារៈសំខាន់សម្រាប់សហគ្រាសធុនតូច និងមធ្យម,និងកិច្ចពិភាក្សាចំនួន១លើប្រធានបទ «ការទាញយកអត្ថប្រយោជន៍៖ តើអ្វីជាអាទិភាពគន្លឹះដែលសហគ្រាសធុនតូច និង មធ្យម គួរតែស្វែងយល់ពីបច្ចេកវិទ្យាហិរញ្ញវត្ថុនៅកម្ពុជា» ដោយបទបង្ហាញនីមួយៗបានផ្តល់ជាព័ត៌មានមូលដ្ឋាន បទពិសោធ ឧត្តមានុវត្តន៍ និងការបណ្តុះបណ្តាលពាក់ព័ន្ធនឹងចំណេះដឹងហិរញ្ញវត្ថុឌីជីថល និងជំនាញបច្ចេកវិទ្យាថ្មីៗដល់ធុរជន ម្ចាស់អាជីវកម្ម សហគ្រាសនៅកម្ពុជា និងអ្នកចូលរួម។
សិក្ខាសាលានេះមានអ្នកចូលរួមសរុបចំនួន១៥០នាក់។ គណៈកម្មាធិការសេដ្ឋកិច្ច និង ធុរកិច្ចឌីជីថល នឹងបន្តឱ្យមានការរៀបចំកម្មវិធីសិក្ខាសាលាបែបនេះបន្តទៀតនៅឆ្នាំបន្តបន្ទាប់ដោយផ្តោតទៅលើប្រធានបទផ្សេងៗ ពាក់ព័ន្ធនឹងសេដ្ឋកិច្ច និងធុរកិច្ចឌីជីថល៕
Account
Security
Favourite Content