សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងសិក្សាផ្លូវល្បឿនលឿនទី ៣ ភ្នំពេញ – សៀមរាប បានចាប់ផ្ដើមសិក្សាកាលពីពាក់កណ្ដាលឆ្នាំ២០២៣កន្លងទៅនេះ ហើយគម្រោងនេះគ្រោងនឹងបញ្ចប់នៅខែកុម្ភៈ ឆ្នាំ ២០២៤ខាងមុខនេះ ។ ដោយឡែកគម្រោងសិក្សាផ្លូវល្បឿនលឿនពីសៀមរាបទៅប៉ោយប៉ែតគ្រោងនឹងបញ្ចប់នៅខែឧសភា ឆ្នាំ២០២៤ ។ នេះបើតាមសេចក្ដីប្រកាសព័ត៌មានរបស់ក្រសួងសាធារណការ និងដឹកជញ្ជូន នៅព្រឹកថ្ងៃទី ១៣ ខែធ្នូ ឆ្នាំ២០២៣ ។
នៅក្នុងកិច្ចប្រជុំមួយនេះមានចូលរួមពីឯកឧត្តម ឧបនាយករដ្ឋមន្ត្រី ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា ឯកឧត្តមរដ្ឋមន្ត្រីក្រសួងសាធារណការនិងដឹកជញ្ជូន ជុំវិញការជំរុញការអនុវត្តសាងសង់គម្រោងផ្លូវល្បឿនលឿនភ្នំពេញសៀមរាប និងសៀមរាបប៉ោយប៉ែត ។
សេចចក្ដីប្រកាសព័ត៌មានបានឱ្យដឹងថា បច្ចុប្បន្ន គម្រោងនេះត្រូវបានក្រុមហ៊ុនសាជីវកម្មស្ពាន និងថ្នល់ចិន CRBC កំពុងអនុវត្តការសិក្សាបឋមសមិទ្ធិលទ្ធភាព ហើយគ្រោងនឹងបញ្ចប់ការសិក្សាកំណាត់ភ្នំពេញ-សៀមរាបក្នុងខែកុម្ភៈ និងកំណាត់សៀមរាប-ប៉ោយប៉ែត ក្នុងខែឧសភា ឆ្នាំ២០២៤ខាងមុខ ។
គម្រោងផ្លូវល្បឿនលឿនភ្នំពេញ-សៀមរាប-ប៉ោយប៉ែត គឺជាគម្រោងផ្លូវល្បឿនលឿនទី៣ របស់កម្ពុជា បន្ទាប់ពីផ្លូវល្បឿនលឿនទី១ ភ្នំពេញ-ក្រុងព្រះសីហនុ ដែលបានបើកឱ្យដំណើរការរយៈពេលជាង១ឆ្នាំមកហើយ ខណៈដែលគម្រោងផ្លូវល្បឿនលឿនទី២ ភ្នំពេញ-ក្រុងបាវិត បានបើកការដ្ឋានសាងសង់កាលពីថ្ងៃទី០៧ ខែមិថុនា ឆ្នាំ២០២៣កន្លងទៅ ហើយបច្ចុប្បន្នកំពុងស្ថិតក្នុងជំហាននៃការអនុវត្តនីតិវិធីជាបន្តបន្ទាប់ ទៅតាមផែនការដែលបានគ្រោងទុក។ ផ្លូវល្បឿនលឿនខ្សែទី៣នេះ មានប្រវែងប្រមាណជាង៤០០គ.ម ដោយឆ្លងកាត់រាជធានី-ខេត្តចំនួន៦ រួមមាន រាជធានីភ្នំពេញ ខេត្ដកណ្ដាល កំពង់ចាម កំពង់ធំ សៀមរាប និងខេត្តបន្ទាយមានជ័យ ។
តាមរយៈគម្រោងផ្លូវល្បឿនលឿនមួយនេះ នឹងជំរុញកំណើនសេដ្ឋកិច្ចកម្ពុជាបន្ថែមទៀតតាមរយៈការដឹកជញ្ជូនកាន់តែប្រសើរ ទាក់ទាញភ្ញៀវទេសចរបរទេសកាន់តែច្រើនបន្ថែមទៀត បង្កើតឱកាសការងារសម្រាប់ខេត្តសៀមរាប និងតភ្ជាប់តំបន់ទេសចរណ៍នៃខេត្តសៀមរាប និងរាជធានីភ្នំពេញកាន់តែខិតជិតគ្នា ។
ឯកឧត្តម ស៊ុន ចាន់ថុល បានមានប្រសាសន៍កន្លងមកថា បន្ទាប់ពីផ្លូវល្បឿនលឿនទី៣ កម្ពុជាអាចនឹងសាងសង់ផ្លូវល្បឿនលឿនមួយខ្សែទៀតដែលជាខ្សែទី៤ ។ ផ្លូវល្បឿនលឿនបន្ទាប់អាចជាផ្លូវដែលតភ្ជាប់នៅតំបន់ប៉ែកឦសាននៃប្រទេស រួមមាន រតនគីរី, ស្ទឹងត្រែង, មណ្ឌលគីរី និងខេត្តក្រចេះ ជាដើម ៕
Account
Security
Favourite Content