បរទេស ៖ ភាពតានតឹងដោយសារតែទណ្ឌកម្មរបស់សហរដ្ឋអាម៉េរិកទៅលើទំនិញជាច្រើនជាមួយនឹងប្រទេសចិនបានធ្វើឲ្យក្រុមហ៊ុនមួយដែលមានមូលដ្ឋាននៅប្រទេសសិង្ហបុរីបានក្លាយទៅជាឈ្មួញកណ្តាលក្នុងការជួយលួចលាក់ធ្វើការនាំចូលនាំចូលផលិតផលបន្ទះឈីបរបស់ក្រុមហ៊ុនអាម៉េរិក Nvidia ក្នុងតម្លៃដល់ទៅជិត២ពាន់លានដុល្លារពីអាម៉េរិកទៅកាន់ប្រទេសចិន។

យោងតាមការចេញផ្សាយដោយកាសែតញូវយ៉កថាមបានឲ្យដឹងថា អាម៉េរិកបានដាក់ការសង្ស័យទៅលើគោលដៅសិង្ហបុរីជាយូរមកហើយចំពោះពាណិជ្ជកម្មខុសច្បាប់នេះ ហើយជឿជាក់ថាក្នុងនោះពួកគេបានប្រើប្រាស់បណ្តាញជូញដូរមួយចំនួនដើម្បីសម្រេចបានការងារនេះ។

យ៉ាងណាក្តី បច្ចុប្បន្នគេបានស៊ើបអង្កេត និងរកឃើញក្រុមហ៊ុនមួយរួចទៅហើយដែលមានទំនាក់ទំនងពិតប្រាក់ជាមួយនឹងក្រុមហ៊ុនចិន។ ក្រុមហ៊ុនមួយនេះមានមូលដ្ឋាននៅក្នុងប្រទេសសិង្ហបុរីព្រមទាំងបានចំណាយលុយដល់ទៅជិត២ពាន់លានដុល្លារក្នុងការសម្របសម្រួលផលិតផលបន្ទះឈីបទំនើបៗរបស់ក្រុមហ៊ុន Nvidia ទៅឲ្យក្រុមហ៊ុនចិនដោយផ្ទាល់ ឬនាំចេញតាមប្រភពផ្សេងទៅកាន់ទីផ្សារប្រទេសចិន។

កាលពីឆ្នាំ២០២៤ ក្រុមហ៊ុនសិង្ហបុរី Megaspeed ដែលគ្រប់គ្រងដោយលោក Alice Huang ជាបុគ្គលមិនធ្លាប់មានការរកស៊ីជាប់ពាក់ព័ន្ធទៅនឹងឧស្សាហកម្មបច្ចេកវិទ្យាពីមុនមកដែរ ប៉ុន្តែក្រោយការចូលរួមពិធីជប់លៀងមួយជាមួយនឹងលោក Jensen Huang នៅក្នុងកម្មវិធី Computex 2024 ក្រុមហ៊ុន Megaspeed បានធ្វើការបញ្ជាទិញបន្ទះឈីបរបស់ Nvidia ដល់ទៅ២ពាន់លានដុល្លារសម្រាប់ឆ្នាំ២០២៥។

របាយការណ៍ស្រាវជ្រាវមួយបានរកឃើញថា Megaspeed បានបង្កើតឡើងកាលពីឆ្នាំ២០២៣ នៅពេលក្រុមហ៊ុនហ្គេមចិនដែលគាំទ្រ និងវិនិយោគពីក្រោយដោយរដ្ឋាភិបាលចិន 7Road បានប្រកាសបើកក្រុមហ៊ុនរបស់ខ្លួននៅក្រៅប្រទេសជាលើកដំបូង ពោលគឺនៅក្នុងប្រទេសសិង្ហបុរីតែម្តង។

ក្រុមហ៊ុនបង្កើតថ្មីនេះត្រូវបានគេជឿជាក់ថា បានធ្វើការបញ្ជាទិញបន្ទះឈីបដែលជាប់បំរាមរបស់ក្រុមហ៊ុន Nvidia ជាបន្តបន្ទាប់ និងកាន់តែច្រើនឡើង ដូចជា ម៉ូដេល H100 និង H800 ដោយម៉ូដេលបន្ទះឈីបទាំងពីរនេះគឺជាផលិតផលដែលមិនអនុញ្ញាតឲ្យមានការនាំចូលទៅកាន់ទីផ្សារប្រទេសចិននោះឡើយ។

យ៉ាងណាក្តី ចំណុចសំខាន់មួយនោះគឺថា Megaspeed មិនអាចមានសិទ្ធិទិញបន្ទះឈីប Nvidia ដោយផ្ទាល់បានទេ ប៉ុន្តែលទ្ធកម្មរបស់វាមានប្រភពមកពីក្រុមហ៊ុន Aivres Systems ដែលជាក្រុមហ៊ុនមានមូលដ្ឋាននៅរដ្ឋកាលីហ្វ័រញ៉ា និងជាបុត្រសម្ព័ន្ធរបស់ក្រុមហ៊ុន Inspur ជាក្រុមហ៊ុនបច្ចេកវិទ្យាចិនដ៏ធំមួយដែលត្រូវបានដាក់ទណ្ឌកម្មពីមុនដោយសហរដ្ឋអាម៉េរិកសម្រាប់ការផ្គត់ផ្គង់យោធាចិនជាមួយនឹងផ្នែករឹងនៃកុំព្យូទ័រទំនើប។

កាន់តែគួរឲ្យចាប់អារម្មណ៍ Megaspeed ដែលជាអ្នកបញ្ជាទិញនោះគឺបានប្រមូលផ្តុំបន្ទះឈីបទាំងនោះទៅរក្សាទុកនៅតាមឃ្លាំងក្រុមហ៊ុនបុត្រសម្ព័ន្ធរបស់ខ្លួន Speedmatrix ដែលស្ថិតនៅក្នុងប្រទេសឥណ្ឌូនេស៊ីល និងម៉ាឡេស៊ី មុនពេលនាំចេញបន្តទៅកាន់ប្រទេសចិន៕